މިއަހަރުގެ ފިތުރު އީދު ނަމާދު ބޮޑު ޖަމާއަތުގައި މާލެ ސިޓީގެ ހަތަރު ސަރަހައްދެއްގައި ކުރާނެ ކަމަށާއި މީގެ އިތުރުން ވެސް މާލެ ސިޓީގެ އެކި މިސްކިތްތަކުގައި އީދު ނަމާދު ކުރާނެ ކަމަށް އިސްލާމިކް މިނިސްޓްރީން ބުނެފިއެވެ.

މާލޭގެ ބޮޑު ޖަމާއަތް އޮންނާނީ އެހެން އަހަރުތަކެކޭ ވެސް އެއްފަދައިން މާފަންނު ސްޓޭޑިއަމްގައެވެ. ހުޅުމާލޭގެ ފޭސް އެކެއް އަދި ދޭއްގައި ބޮޑު ޖަމާއަތުގައި އީދު ނަމާދު ކުރުން އޮންނާނެއެވެ. މީގެއިތުރުން ވިލިމާލޭގައި ވެސް ބޮޑު ޖަމާއަތުގައި އީދު ނަމާދު ކުރުން އޮންނާނެއެވެ.

އިސްލާމިކް މިނިސްޓްރީން އާއްމު ކޮށްފައިވާ ލިސްޓުގައިވާ ގޮތުގައި މި ހަތަރު ބޮޑު ޖަމާއަތުގެ އިތުރުން ވެސް މާލެ ސަރަހައްދުގެ 23 މިސްކިތެއްގައި އީދު ނަމާދު ކުރުން އޮންނާނެއެވެ.

ފިތުރު އީދު ނަމާދު ކުރުމަށް ހާއްސަ ކޮށްފައިވާ މައިދާންތަކާއި މިސްކިތްތަކުގައި އީދު ނަމާދު ކުރުމަށް ހަމަޖެހިފައި ވަނީ ހެނދުނު 7:00ގައި ކަމަށް ވެސް އިސްލާމިކް މިނިސްޓްރީން ބުންޏެވެ.