ސަރުކާރާ ދެކޮޅަށް، އިދިކޮޅު އެންމެ ބޮޑު ޕާޓީ، އެމްޑީޕީން މާލޭގައި ކުރަމުން ގެންދާ ސިލްސިލާ މުޒާހަރާތައް ރޯދަ މަހުގެ ފަހު 10އަށް މެދުކަނޑާލައިފިއެވެ.

ނަަމަވެސް މުޒާހަރާތަކާ ގުޅިގެން ފުލުހަށް ހާޒިރުވުމަށް ފޮނުވާ ޗިޓުތައް ނުހުއްޓެއެވެ. މާދަމާ ވެސް މުޒާހަރާގެ ބައިވެރިން ފުލުހަށް ހާޒިރުވުމަށް އަންގާފައިވެއެވެ.

"ފްލެޓްވެރިންގެ ހައްގުގައި" އެމްޑީޕީން ސިލްސިލާ މުޒާހަރާތައް ފެށީ މި މަހުގެ ހަތް ވަނަ ދުވަހުގެ ރޭ އެމްޑީޕީ ހަރުގެ ކުރިމަތިންނެވެ. އެ ރެއަށްފަހު، ކޮންމެ ރެއަކު އެމްޑީޕީން މާލޭގެ މަގުތަކަށް ނުކުމެ، ރައީސް ޑރ. މުހައްމަދު މުއިއްޒުގެ އިސްތިއުފާއަށް ގޮވާލާފައިވެއެވެ. އެގޮތުން އެމްޑީޕީ ގައުމީ މަޖިލީހުގެ މެމްބަރުން އިސްވެ ތިބެ، ސިލްސިލާ 13 މުޒާހަރާއެއް ކުރިއަށް ގެންގޮސްފައިވެއެވެ.

މުޒާހަރާތަކުގައި އިސް ދައުރެއް އަދާކުރައްވާ މަކުނުދޫ ދާއިރާގެ ކުރީގެ މެމްބަރު މުހައްމަދު ރާއީ މިރޭ ވިދާޅުވީ ރޯދަ މަހުގެ ފަހު 10އަށް މުޒާހަރާތައް މެދުކަނޑާލިޔަސް، އެމްޑީޕީގެ ހަރަކާތްތައް ކުރިއަށްގެންދާނެ ގޮތާ ގުޅޭ ގޮތުން އެމްޑީޕީ ގައުމީ މަޖިލީހުން ގޮތްތަކެއް ނިންމާނެ ކަމަށެވެ.

"ސިލްސިލާ މުޒާހަރާތައް ރޯދަ މަހުގެ 10އަށް މެދުކަނޑާލީ. އަދި ފާހަގަކޮށްލަން މެދުކަނޑާލިޔަސް، މާދަމާ ރޭ އެމްޑީޕީ ގައުމީ މަޖިލީހުގެ ބައްދަލުވުމެއް އެބަ އޮތް. އަޅުގަނޑު މި ބަލަނީ އޭގެއިން ގޮތްތަކެއް ނިމިގެންދާނެ ކަަމށް، ދެން އަޅުގަނޑުމެން ކިހިނެއްތޯ ކުރިއަށް ގެންދާނީ،" ދުއާއިން މުޒާހަރާ ނިންމާލުމުގެ ކުރިން މަޖީދީމަގާއި ޗާންދަނީ މަގު ގުޅޭ، ހަތަރު އަނގޮޅި ކަންމަތީގައި ރައީ މިރޭ ވިދާޅުވިއެވެ.

އެމްޑީޕީ މުޒާހަރާއާ ގުޅިގެން 12 މީހަކު ފުލުސް އޮފީހަށް ހާޒިރުވުމަށް ޗިޓު ފޮނުވާފައިވެއެވެ. އޭގެ ތެރޭގައި އެމްޑީޕީގެ އިސް އެކްޓިވިސްޓުންނާއި ގައުމީ މަޖިލީހުގެ މެމްބަރުންގެ އިތުރުން އެމްޑީޕީގެ ޒުވާނުންގެ ހިތްވަރުގެ ބައެއް މެމްބަރުން ވެސް ހިމެނެއެވެ.

އެމްޑީޕީގެ މުޒާހަރާތައް ފަށާފައި ވަނީ ސުޕްރީމް ކޯޓުގެ ފަނޑިޔާރުންގެ ބެންޗު ހަތަކުން، ފަހަކަށް ކުޑަކުރަން ކޯޓުތަކާ ބެހޭ ގާނޫނަށް ކުއްލި ބަދަލެއް މަޖިލީހުން ގެނެސްފައިވަނިކޮށެވެ. އަދި ޖޭއެސްސީ މެދުވެރިކޮށް، ސުޕްރީމް ކޯޓުގެ ތިން ފަނޑިޔާރަކު ސަސްޕެންޑްކޮށްފައިވަނިކޮށެވެ. މީގެ އިތުރުން ފައިސާ ޗާޕު ކުރަން ސަރުކާރުން ނިންމާފައިވަނިކޮށް، އެކަމާ ދެކޮޅަށް ވެސް މުޒާހަރާގައި އަޑު އުފުލާފައިވެއެވެ.

މާލޭގެ މަގުތަކަށް ނުކުމެ، މުޒާހަރާ ކުރަމުން ގެންދާތީ، އިލެކްޝަންސް ކޮމިޝަން (އީސީ)އިން ވަނީ އެމްޑީޕީއަށް އިންޒާރު ދީފައެވެ.