ފަހު 10އެއްގެ ބަންދު ދުވަސްތަކާއި އީދު ބަންދުގެ ދުވަސްތައް ހިމަނައިގެން 15 ދުވަހުގެ ބޮޑު ބަންދެއް ލިބޭނެ ގޮތް ސަރުކާރުން ހަމަޖައްސައިފިއެވެ.

މިދިޔަ އަހަރުގެ ރަމަޟާން މަހުން ފެށިގެން ސަރުކާރުން އަންނަނީ ކޮންމެ އަހަރެއްގެ ވެސް ރަމަޟާން މަހުގެ ފަހު 10އެއް ސަރުކާރު ބަންދު ކުރުމަށް ނިންމައިފައެވެ. މިއަހަރުގެ ވެސް ރޯދަމަހުގެ ފަހު 10އެއް ސަރުކާރު ބަންދުވާނެއެވެ.

މިއާއެކު ސަރުކާރުން މިއަދު ވަނީ އީދު ބަންދުގެ ގޮތުގައި ލިބޭނެ ދުވަސްތައް ކަނޑައަޅައިފައެވެ.

އެގޮތުން، 1446ވަނަ އަހަރުގެ ޝައްވާލް މަހުގެ 1ވަނަ ދުވަހަކީ، (ފިތުރު އީދު ދުވަހަކީ) މިހާރު ކަލަންޑަރުގައިވާ ގޮތުގެމަތީން، މި މާޗު މަހުގެ 31 ވާ ހޯމަ ދުވަސް ކަމަށް، މިނިސްޓްރީ އޮފް އިސްލާމިކް އެފެއާޒުން ކަނޑައަޅުއްވައި އިއުލާން ކޮށްފި ނަމަ، ފިތުރު އީދު ބަންދު ތިން ދުވަސް ކަމުގައިވާ، މާޗު 31، އެޕްރީލް 1، އަދި 2 އާއެކު، އެޕްރީލް 3 ވާ ބުރާސްފަތި ދުވަހަކީވެސް ސަރުކާރު ބަންދު ދުވަހެއްގެ ގޮތުގައި ނިންމައިފައެވެ.

އަދި، މާޗު މަހުގެ 29 ވާ ހޮނިހިރު ދުވަހުގެ ރޭ ޝައްވާލް މަހުގެ ހަނދު ސާބިތުވެ، މާޗު 30 ވާ އާދީއްތަ ދުވަހަކީ، ޝައްވާލު މަހުގެ 1ވަނަ ދުވަސް ކަމަށް އެ މިނިސްޓްރީއިން ކަނޑައަޅައި އިއުލާންކޮށްފި ނަމަ އީދުގެ ބަންދު ތިން ދުވަސްކަމުގައިވާ، މާރިޗު 30، 31 އަދި އެޕްރީލް 1 އަށްފަހު، އެޕްރީލް 2 ވާ ބުދަ ދުވަހާއި، އެޕްރީލް 3 ވާ ބުރާސްފަތި ދުވަހަކީވެސް ސަރުކާރު ބަންދު ދުވަހެއް ކަމުގައި ވެސް ސަރުކާރުން ވަނީ ނިންމައިފައެވެ.

އެގޮތަށް ހަމަޖެއްސެވީ، ފިތުރު އީދުގެ ބަންދާ ގުޅިގެން، އާއިލާއާއެކު ވީހާވެސް ގިނަދުވަސްތަކެއް އެކުގައި ހޭދަކުރުމަށް ފުރުސަތު ފަހިކޮށްދިނުމުގެ ގޮތުން، މެދުނުކެނޑޭގޮތަށް ބަންދު ދުވަސްތައް މުވައްޒަފުންނަށް ލިބޭގޮތަށް ހަމަޖައްސަވައި ދެއްވުމުގެ މަގުސަދުގައި ކަމަށް ރައީސް އޮފީހުން ބުންޏެވެ.

މި ނިންމެވުމާއެކު، ފިތުރު އީދުގެ ބަންދު ދުވަސްތަކަށްފަހު، ސަރުކާރުގެ އޮފީސްތައް ހުޅުވޭނީ، އަންނަ އެޕްރީލް މަހުގެ 6 ވާ އާދީއްތަ ދުވަހުއެވެ.