ސުޕްރީމް ކޯޓުގެ ފަނޑިޔާރުކަމުގެ މަގާމުން ހުސްނުއްސުއޫދު އިސްތިއުފާ ދެއްވައިފިއެވެ.

ސުއޫދު އެ މަގާމުން އިސްތިއުފާ ދެއްވީ މިއަދުއެވެ. ސުއޫދު އިސްތިއުފާ ދެއްވި ކަމުގެ ސިޓީ ސޯޝަލް މީޑިއާގައި މިހާރު ވަނީ އާއްމުވެފައެވެ. އެ ސިޓީގައި ސަރުކާރުން އަދުލު އިންސާފު ކުރުމުގެ ބާރަށް ނުފޫޒު ފޯރުވާ ކަމަށް ވިދާޅުވެފައިވެއެވެ.

ރައީސް ޑރ. މުހައްމަދު މުއިއްޒަށް ސުއޫދު ފޮނުއްވި އިސްތިއުފާގެ ސިޓީގައި ވަނީ ރައްޔިތުންގެ މަޖިލީހުގެ މެންބަރުން ޕާޓީން ވަކިވެއްޖެ ނަމަ ނުވަތަ އެ މެންބަރަކު ނިސްބަތްވާ ޕާޓީން އެ މެންބަރަކު ވަކިކޮށްފި ނަމަ ގޮނޑި ގެއްލޭ ގޮތަށް ގެނައި އިސްލާހު ބާތިލް ކޮށްދިނުމަށް އެދި އަމިއްލަ ފަރާތަކުން ސުޕްރީމް ކޯޓަށް ހުށަހަޅާފައިވާ މައްސަލަ ބެލުމުގެ އިހުތިސާސް އެ ކޯޓަށް ލިބިގެންވާ ކަމަށް ނިންމުމާ އެކު، ސަރުކާރުން އަދުލު އިންސާފު ކުރުމުގެ ބާރަށް ނުފޫޒު ފޯރުވަމުން އަންނަ ކަމަށެވެ.

އަދި އެ މައްސަލަ ސުޕްރީމް ކޯޓުގައި ބެލުން ހުއްޓުވުމުގެ ގޮގުން އެ ކޯޓުގެ ތިން ފަނޑިޔާރަކު ސަސްޕެންޑު ކޮށްފައިވާ ކަމަށާއި އަދި އެ ކޯޓުގެ ބެންޗުގެ އަދަދު މަދު ކުރުމަށް މަޖިލީހަށް ބިލެއް ހުށަހަޅައި ބިލު ފާސްކޮށް ސުޕްރީމް ކޯޓުގެ ފަނޑިޔާރުންނަށް ބިރު ދައްކަމުން އަންނަ ކަމަށްވެސް ސުއޫދުގެ ސިޓީގައި ތުހުމަތު ކުރައްވާފައިވެއެވެ. އަދި އެކަން އެމަގުން ހިނގުމަށް ނުފޫޒު ފޯރުއްވަނީ ރައީސް މުއިއްޒު ކަމަށް ވެސް ސުއޫދު ވިދާޅުވިއެވެ.

އޭނާ އިސްތިއުފާ ދެއްވީ އެކަމަށް އިހުތިޖާޖު ކުރުމުގެ ގޮތުން ކަމަށްވެސް ސުއޫދުގެ ސިޓީގައި ވިދާޅުވެފައިވެއެވެ.

ސުއޫދު އިސްތިއުފާ ދެއްވިއިރު ސުއޫދުގެ މައްސަލައެއް ޖުޑީޝަލް ސާވިސް ކޮމިޝަނުން އަންނަނީ ބަލަމުންނެވެ. އަދި ސުއޫދު ހުންނެވީ ވެސް ސަސްޕެންޑު ކޮށްފައެވެ.

ސުއޫދުގެ އިތުރުން ސުޕްރީމް ކޯޓުގެ ފަނޑިޔާރު ޑރ. އަޒްމިރާލްދާ ޒާހިރާއި ފަނޑިޔާރު މަހާޒު އަލީ ވެސް މިދިޔަ މަހުގެ 26 ވަނަ ދުވަހު ޖޭއެސްސީން ވަނީ ސަސްޕެންޑު ކޮށްފައެވެ. އެ ދެ ފަނޑިޔާރުން ސަސްޕެންޑުކުރީ އޭސީސީން ބަލަމުން އަންނަ މައްސަލައަކާއި ގުޅިގެންނެވެ.