ރައްޔިތުން މަޖިލީހުގެ މާލިއްޔަތު ކޮމެޓީ އާއި ސަލާމަތީ ހިދުމަތްތަކާއި ބެހޭ ކޮމެޓީން ހިތަދޫ މެދުދާއިރާގެ މެންބަރު އަހްމަދު އަޒާން މަރުޒޫގް ވަކި ކުރައްވައިފިއެވެ.

އަޒާން އެ ދެ ކޮމިޓީން ވަކި ކުރައްވާފައި ވަނީ ސުޕްރީމް ކޯޓުގެ ބެންޗުގެ އަދަދު ހަތަކުން ފަހަކަށް ބަދަލު ކުރުމަށް، ގާނޫނަށް ހުށަހެޅި އިސްލާހަށް ތާއީދުކޮށް ބިލު ފާސް ކުރުމަށް އަޒާން ވޯޓު ނުދެއްވި މައްސަލަ ޕީއެންސީގެ ތެރޭގައި ބޮޑުވެފައި ވަނިކޮށެވެ.

ރައްޔިތުން މަޖިލީހުގެ މިއަދުގެ ޖަލްސާގައި މަޖިލީހުގެ ރައީސް އަބްދުއްރަހީމް ވިދާޅުވީ މާލިއްޔަތު ކޮމިޓީއާއި ސަލާމަތީ ހިދުމަތްތަކާ ބެހޭ (241) ކޮމިޓީ އަށް ބަދަލު ގެންނަން ޕީއެންސީން ޕާލިމެންޓަރީ ގުރޫޕުން ނިންމާފައިވާ ކަމަށެވެ. އަދި އަޒާންގެ ބަދަލުގައި މާލިއްޔަތު ކޮމިޓީއަށް ހެންވޭރު އުތުރު ދާއިރާގެ ޕީއެންސީ މެންބަރު، އަހުމަދު އައިފާން ހަމަޖައްސާފައިވާ ކަމަށެވެ. 241 ކޮމިޓީއަށް އައްޔަން ކުރީ ވިލިމާލޭ ދާއިރާގެ މެންބަރު މުހައްމަދު އިސްމާއީލެވެ.

ކޮމެޓީތަކުން އަޒާން ވަކިކުރެއްވިއިރު އޭނާ ވަނީ ޕީއެންސީގެ ޕީޖީ ވަޓްސްއެޕް ގުރޫޕުން ވެސް ބޭރުކޮށްފައެވެ.

ސުޕްރީމް ކޯޓުގެ ބެންޗަށް ގެންނަން ނިންމި ބަދަލަށް އަޒާން ވޯޓު ނުދޭން ނިންމި މައްސަލާގައި އަޒާން ބަޔާނެއްވެސް ނެރުނެވެ.

ވިދާޅުވީ ރައްޔިތުންނާއި ގައުމީ މަސްލަހަތަށްވުރެ އިސްކަން ދޭން ޖެހޭ އެހެން އެއްވެސް މަސްލަހަތެއް ނޯންނާނެ ކަމަށެވެ. އަދި ރައްޔިތުން މަޖިލީހުގެ އިންތިހާބުގައި ވެސް ރައްޔިތުން ކުރިމައްޗަށް ހުއްޓި ހުރެ އޭނާ އެ ޔަގީންކަން ރައްޔިތުންނަށް ދީފައިވާނެ ކަމަށް ވިދާޅުވިއެވެ.

ކޯޓުތަކާ ބެހޭ ގާނޫނަށް ހުށަހެޅި އިސްލާހަށް އޭނާ ތާއީދު ނުކުރެއްވީ އިންތިހާބުކުރި ރައްޔިތުންނާއި ރާއްޖޭގެ ގާނޫނީ ދާއިރާގައި އުޅޭ ވަކީލުންނާއި ކުރީގެ ފަނޑިޔާރުން އަދި ޝަރުއީ ދާއިރާގައި ދިގު މުއްދަތަކަށް މަސައްކަތް ކުރެއްވި ބޭފުޅުންނާއި މި ސަރުކާރުގެ ކެބިނެޓުގައި ވެސް ހިމެނިވަޑައިގަންނަވާ ވަޒީރުންގެ މަޝްވަރާ އަށް ފަހު ކަމަށް އަޒާން ފާހަގަކުރެއްވިއެވެ.

އޭނާ ވިދާޅުވީ ގާނޫނުއަސާސީއާ އެ ބިލު ހިލާފު ކަމަށާއި އެހެންކަމުން އެފަދަ ބިލަކަށް ތާއީދު ކުރުމަކީ ވެސް ގާނޫނުއަސާސީއާ ހިލާފުވާނެ ކަމެއް ކަމަށެވެ.