ދިވެހިރާއްޖޭގެ ސުޕްރީމް ކޯޓުގެ ތިން ފަނޑިޔާރަކު ޖުޑީޝަލް ސާވިސް ކޮމިޝަން (ޖޭއެސްސީ) އިން ސަސްޕެންޑު ކޮށްފިއެވެ.

ސަސްޕެންޑު ކޮށްފައި ވަނީ ސުޕްރީމް ކޯޓުގެ ފަނޑިޔާރުންގެ ތެރެއިން ހުސްނުއްސުއޫދާއި މަހާޒު އަލީ ޒާހިރު އަދި ޑރ. އަޒްމިރަލްދާ ޒާހިރުއެވެ.

ޖޭއެސްސީން މި ތިން ފަނޑިޔާރުން ސަސްޕެންޑު ކޮށްފައި މިވަނީ ސުޕްރީމް ކޯޓުގެ ފަނޑިޔާރުންގެ އަދަދު ހަތަކުން ފަހަކަށް ބަދަލު ކުރުމަށް ރައްޔިތުންގެ މަޖިލީހަށް އިސްލާހެއް ހުށަހަޅައި އެ އިސްލާހު މިއަދު ފާސްކޮށްފައިވާ ދަނޑިވަޅެއްގައެވެ.

އެ އިސްލާހު މަޖިލީހަށް ހުށަހަޅާފައި ވަނީ، ގާނޫނުއަސާސީ އިސްލާހުކޮށް ރައްޔިތުންގެ މަޖިލީހުގެ މެންބަރުން އިންތިހާބުވާ ޕާޓީ ނޫން އެހެން ޕާޓީއަކަށް ބަދަލުކޮށްފި ނަމަ މެންބަރު ކަމުގެ ގޮނޑި ގެއްލޭ ގޮތަށް ގެނެސްފައިވާ އިސްލާހު ބާތިލް ކުރުމަށް ސުޕްރީމް ކޯޓަށް ދުސްތޫރީ މައްސަލައެއް ހުށަހަޅާފައިވާ ދަނޑިވަޅެއްގައެވެ.

މިއަދު ސުޕްރީމް ކޯޓުގައި އެ މައްސަލައާ ގުޅުންހުރި އަމުރެއް ނެރުމަށް އަޑުއެހުމެއް ބާއްވަން ވެސް އޮތީ ތާވަލު ކޮށްފައެވެ.