ރައްޔިތުން މަޖިލީހަށް ހުށަހެޅުނު ހޯމް މިނިސްޓަރު އަލީ އިހުސާންގެ އިތުބާރު ނެތްކަމުގެ މައްސަލާގައި ޖަވާބުދާރީވެވަޑައިގެން އެމަނިކުފާނު ދެއްކެވި ވާހަކަފުޅުތައް ކުށްވެރިކޮށް މަގާމުން އިސްތިއުފާ ދެއްވުމަށް އިދިކޮޅު އެމްޑީޕީން ގޮވާލައިފިއެވެ.

އެމްޑީޕީން މިރޭ ނެރެފައިވާ ނޫސް ބަޔާނެއްގައި ބުނީ އިހުސާންގެ އިތުބާރު ނެތްކަމުގެ މައްސަލަ މަޖިލީހަށް ވައްދާފައި ވަނީ ޕީއެންސީއަށް މެންބަރުން އިތުރުކުރުމަށް ހިންގި ހަރަކާތުގައި ސައްހަ ނޫން ފޯމުތައް އިލެކްޝަންސް ކޮމިޝަނަށް ހުށަހަޅާފައިވާކަން އިލެކްޝަންސް ކޮމިޝަންގެ ބަހުންނާއި، ޕީއެންސީގެ އަމިއްލަ އިއުތިރާފުން ޝައްކެއް ނެތް މިންވަރަށް ހާމަވެ އެކަމުގައި އެންމެ އިސްކޮށް ހަރަކާތްތެރިވެފައިވަނީ އިހުސާން ކަމަށް ވުމުން ކަމަށެވެ.

މިއަދު އޮތް ރައްޔިތުންގެ މަޖިލީހުގެ ޖަލްސާގައި އިހުސާން ވަނީ ޑިޕާޓްމަންޓް އޮފް ނެޝަނަލް ރެޖިސްޓްރޭޝަންގެ މުވައްޒަފުންނާއި، ވަސީލަތްތަކާއި އެ އިދާރާގައި ހުރި މައުލޫމާތު ބޭނުންކޮށްގެން ޕީއެންސީއަށް މީހުން ވެއްދުމަށް ފޯމު ފުރުމުގެ ހުތުރު އަމަލު ހިންގާފައިވާ ކަމަށް އިއުތިރާފުވެވަޑައިގެންފައި ކަމަށް އެމްޑީޕީން ބުނެއެވެ.

ސިޔާސީ ޕާޓީގެ މެންބަރަކަށް ވުމަށް ފޯމު ފުރާއިރު ހެކިވެރިއެއްގެ ހައިސިއްޔަތުން ސޮއި ކުރާ މީހަކު ސޮއި ކުރަން އޮންނަނީ، އެ ފޯމު އެެ މީހެއްގެ ނަމުގައި ފުރާ މީހެއްގެ ހާޒިރުގައި ކަމަށްވާއިރު ހޯމް މިނިސްޓްރީގެ ދަށުން ހިންގާ މުއައްސަސާތަކުގައި ތިބި ސިޔާސީ މުވައްޒަފުން ގެނައި ފޯމުތަކުގައި ހެކިވެރިން ސޮއިކޮށްފައި ނުވާ ކަމަށް އިހުސާން ވަނީ އެއްބަސްވެވަޑައިގެންފައިވާ ކަމަށް އެޕާޓީގެ ބަޔާނުގައިވެއެވެ.

އިހުސާން އިސްވެ ހުންނަވައި ފުރި އެތައް ސަތޭކަ ފޯމެއްގައިދޮގު ހެކި ދީފައިވާއިރު އެއީ ޖިނާއީ ކުށެއް ކަމަށް ފެނިވަޑައިގަނުގަންވާ ވަޒީރަކު ރާއްޖޭގެ ދާހިލީ ކަންކަމާއި ތަހުގީގީ އިދާރާތައް ބެލެހެއްޓުމުގެ ޒިންމާތަކާ ހަވާލުވެ ހުންނެވުމަކީ މި ޕާޓީ ކަންބޮޑުވާ ކަމެއް ކަމަށް އެމްޑީޕީން ބުންޏެވެ.

"އޭގެ އިތުރުން، ވަގު ފޯމު ފުރުމުގެ ދިފާއުގައި ރައީސް އިބްރާހިމް މުހައްމަދު ސާލިހުގެ އަނބިކަނބަލުން ފަޒްނާ އަހްމަދުގެ ފޮޓޯއެއް މަޖިލީހުގެ ތަޅުމުގައި އިހުސާން ހިއްސާކުރެއްވީ ވަރަށް ޣައިރު ޒިންމާދާރު ގޮތެއްގައިކަން ފާހަގަކުރަމެވެ. އެއީ އެމްޑީޕީގެ އެތެރޭގެ އިންތިހާބެއްގެ ކެމްޕޭނަށް ތައްޔާރުކޮށްފައިވާ ލިސްޓެއްގެ ފޮޓޯއެއް ކަމަށްވާއިރު އެމްޑީޕީއަކީ މި ޕާޓީގެ މެންބަރުންގެ މައުލޫމާތު ފުރިހަމައަށް ބަލަހައްޓަމުންދާ ޕާޓީއަކަށްވާތީ ފޮޓޯ ޖެހި އެތައް ލިސްޓެއް މި ޕާޓީގެ ކެމްޕޭންތަކާއި އެތެރޭގެ އިންތިހާބުތަކުގައި ބޭނުންކުރާތާ އެތައް އަހަރެއް ވަނީ ފާއިތުވެފައެވެ،" ބަޔާނުގައިވެއެވެ.

އެ ބަޔާނުގައި އެއާ މުޅިން ހިލާފަށް އިހުސާން ދައުލަތުގެ މުދަލާއި ވަސީލަތްތައް ބޭނުންކޮށްގެން ފޯމު ފުރާފައިވަނީ ސަރުކާރުގެ ވުޒާރާއެއްގެ ތެރޭގައި ހުންނަވައި ރަސްމީ މަސައްކަތު ގަޑީގައި އެތައް ބައެއްގެ މައުލޫމާތު ވަގަށް ނަގައި ސޮއި ފޯޖުކޮށްގެން ކަމަށާއި ހަމައެހެންމެ، ކުރީގެ ފަސްޓް ލޭޑީ ފަޒްނާ އަހްމަދު ހާޒިރުވެވަޑައިގެން ނެތް، ދިފާއު ނުވެވޭނެ ފަދަ ތަނެއްގައި އެފަދަ ތުހުމަތެއް އިހުސާން ކުރެއްވީ އޭނާ ކޮށްގެން ހުންނެވި ޖިނާއީ ކުށް ފޮރުވުމުގެ ބޭނުމުގައި ކަމަށް ވެސް އެމްޑީޕީން ބުންޏެވެ.

ރައްޔިތުންގެ މަޖިލީހުގައި އޮތް ޕީއެންސީގެ ސުޕަ މެޖޯރިޓީން އިހުސާންގެ އިތުބާރު ނެތްކަމުގެ މައްސަލަ ފެއިލްކޮށްލި ނަމަވެސް މިއަދު މަޖިލީހުގައި އިއުތިރާފުވެވަޑައިގެންނެވި ކުށްތަކާއި އަދި ދެއްކެވި ޣައިރު ގާނޫނީ ވާހަކަތަކަކީ އޭނާ އިތުރަށް އެ މަގާމުގައި ހުންނަން ނުޖެހޭކަން ދަލީލުކޮށްދޭ ކަމެއް ކަމަށް ވެސް ބަޔާނުގައިވެއެވެ.

"ދިވެހި ރައްޔިތުންގެ ޓެކްސް ފައިސާއިން އިތުރަށް މުސާރަ ނުނަންގަވައި ދައުލަތުގެ މުދަލާއި ވަސީލަތްތަކަށް ނަހަމަ ނުފޫޒު ނުފޯރުވައި ވަގުތުން މަގާމުން އިސްތިއުފާ ދިނުމަށް އިހުސާނަށް ގޮވާލަމެވެ" ބަޔާން ނިންމާލަމުން ބުނެފައިވެއެވެ.