ސުޕްރީމް ކޯޓުގެ ފަނޑިޔާރުންގެ ބެންޗް ކުޑަކުރަން ކޯޓުތަކުގެ ގާނޫނަށް ހުށަހަޅާފައިވާ އިސްލާހު ފާސްނުކުރަން އެދި 70 އަށް ވުރެ ގިނަ ވަކީލުންގެ ޕެޓިޝަނެއް ރައްޔިތުންގެ މަޖިލީހަށް މިއަދު ހުށަހަޅައިފި އެވެ.

ސުޕްރީމް ކޯޓުގެ ފަނޑިޔާރުންގެ އަދަދު ފަހަކަށް މަދުކުރަން ޕީއެންސީގެ ހޮޅުދޫ ދާއިރާގެ މެމްބަރު އަބްދުއްސައްތާރު މުހައްމަދު ހުށަހެޅުއްވި ބިލް ބަލައިގަތުމަށް މަޖިލީހުން މިއަދު ނިންމާފައިވާއިރު, އެ ބިލްގެ މަސައްކަތް މި ހަފުތާ ނިމުމުގެ ކުރިން ނިންމައި ފާސްކުރާނެ ކަމަށް ބެލެވެ އެވެ.

އެ ބިލް ފާސް ނުކުރަން އެދި މަޖިލީހުގެ ރައީސް އަބްދުއްރަހީމް އަބްދުالله އަށް ހުށަހެޅި ޕެޓިޝަންގައި 71 ވަކީލަކު ސޮއިކޮށްފައިވެ އެވެ.

އޭގެ ތެރޭގައި ކުރީގެ ނައިބު ރައީސް ޑރ. މުހައްމަދު ޖަމީލް އަހުމަދާއި ކުރީގެ ބަންޑާރަ ނައިބު ޑރ. އަހުމަދު އަލީ ސަވާދާއި ކުރީގެ ބަންޑާރަ ނައިބު އިބްރާހިމް ރިފްއަތާއި ކުރީގެ ޕްރޮސެކިއުޓާ ޖެނެރަލް ހުސައިން ޝަމީމް ވެސް ސޮއި ކުރައްވާފައިވެ އެވެ. އަދި 71 ވަކީލަކު އެ ޕެޓިޝަންގައި ސޮއިކޮށްފައިވެ އެވެ.

އެ ޕެޓިޝަންގައި, އެ ބިލަކީ ގާނޫނު އަސާސީއާ ހިލާފް ބިލެއް ކަމަށާއި އަދި ސުޕްރީމް ކޯޓުގައި މުހިންމު ދުސްތޫރީ މައްސަލައެއް ހިނގަމުން ދަނިކޮށް އެފަދަ ބިލެއް ފާސް ކުރުމަކީ އާންމު މަސްލަހަތު ގެއްލޭނެ ކަމަށް ބުނެ އެ ބިލް ފާސް ނުކުރަން އެދިފައިވެ އެވެ.