ރާއްޖޭގެ އެކްސްޕެޓް ސިސްޓަމް ހަދަން އެއްބަސްވެފައިވާ މެލޭޝިއާގެ ބެސްޓިނެޓް ކުންފުންޏާ އެކު ކުރިޔަށް ދިއުމަށް ނިންމީ އެކަމުގެ ސަބަބުން ދައުލަތަށް އެތައް މިލިއަން ރުފިޔާއެއް ފައިދާވާނެތީ ކަމަށް ހޯމް މިނިސްޓަރު އަލީ އިހުސާން މިއަދު ވިދާޅުވެއްޖެއެވެ.

އެމްޑީޕީގެ 12 މަޖިލިސް މެންބަރަކު ސޮއި ކުރައްވަވާ އިހުސާނުގެ އިތުބާރު ނެތްކަމުގެ މައްސަލަ ވަނީ ހުށަހަޅައިފައެވެ. އަދި މިއަދު އިހުސާނަށް ޖަވާބުދާރީވުމަށް ފުރުސަތު ދީފައިވެއެވެ. އެމްޑީޕީގެ ފަރާތުން ހުށަހެޅި އިތުބާރު ނެތްކަމުގެ މައްސަލާގައި ބްލެކްލިސްޓް ކޮށްފައިވާ މެލޭޝިޔާގެ ބެސްޓިނެޓް ކުންފުންޏާއެކު ރާއްޖޭގެ އެކްސްޕެޓް ސިސްޓަމް ހަދަން އެއްބަސްވެފައިވާ މައްސަލަ ފާހަގަ ކޮށްފައިވެއެވެ.

އެމްޑީޕީން ބުނާ ގޮތުގައި އަހަރު 460 މިލިއަން ރުފިޔާ ދައްކަން ޖެހޭ ގޮތަށް އެއްބަސްވުން ހެދީ ދައުލަތަށް އެކަމުން އެއްވެސް ފައިދާއެއް ނުވާ ގޮތަކަށެވެ. ނަމަވެސް އެކަމަށް އިހުސާން ވަނީ ޖަވާބުދާރީވެވަޑައިގެންފައެވެ.

"މި ބޭފުޅުން ވިދާޅުވީ ދައުލަތަށް 400 ރުފިޔާ ގެއްލުންވެޔޭ. އަޅުގަނޑު މި ބުނަނީ ދައުލަތަށް 500 އެތައް މިލިއަން ރުފިޔާ އިތުރަށް ފައިދާ ވާ ވާހަކަ،" އިހުސާން ވިދާޅުވިއެވެ.

މިނިސްޓަރު އިހުސާން ވިދާޅުވީ ބެސްޓްނެޓާއެކު ކުރިޔަށް ދިއުމުގެ މަސައްކަތްތަކެއް ފެށީ މި ސަރުކާރުން ނޫން ކަމަށެވެ. އެ މަސައްކަތަކީ ކުރީގެ ރައީސް ޔާމީންގެ ސަރުކާރުގައި ފެށި މަސައްކަތެއް ކަމަށާއި އޭރު އެއްބަސްވެފައި އޮތީ 15 އަހަރު ދުވަހުގެ މުއްދަތަކަށް ކަމަށްވީ ނަމަވެސް ރާއްޖެއަށް ބަންގްލަދޭޝްއިން މަސައްކަތްތެރިން އެތެރެކުރުން ހުއްޓުވުމުން އެ އެއްބަސްވުމަށް އަމަލުކުރުން ވެސް ހުއްޓުނީ ކަމަށް މިނިސްޓަރު ވިދާޅުވިއެވެ.

އަދި ކުރީގެ ރައީސް އިބްރާހީމް މުހައްމަދު ސޯލިހުގެ ސަރުކާރުގައި ބެސްޓްނެޓް ކުންފުނިން އެއްވެސް ޑިމާންޑެއް ކޮށްފައި ނުވާ ކަމަށް ބުނި ނަމަވެސް، ވަކީލުން މެދުވެރިކޮށް ކުރީ ސަރުކާރަށް އެތައް ލިޔެކިއުމެއް ފޮނުވާފައިވާ ކަމަށް އިހުސާން ފާހަގަކުރެއްވިއެވެ.

އެގޮތުން ފާހަގަކުރެއްވި ބައެއް ކަންކަން:

  • 11 ޑިސެންބަރު 2019: މިކަމުގެ ސަބަބުން ދިވެހި ދައުލަތަށް މާލީ ބުރައެއް އުފުލަން ޖެހިދާނެ ކަމަށް ބުނެ، ކުރީގެ އިމިގްރޭޝަން ކޮންޓްރޯލާގެ ފަރާތުން ބަންޑާރަ ނާއިބުގެ ލަފަޔަކަށް އެދިފައިވޭ. ނަމަވެސް އޭޖީން އޭރު އެއްވެސް ލަފައެއް ދީފައެއް ނުވޭ.
  • 23 ޑިސެންބަރު 2019: އޭޖީގެ ފަރާތުން އެއްވެސް ލަފައެއް ނުލިބުމުން، އެކްސްޕެޓް ސިސްޓަމް ބަލަހައްޓަމުން އޭރު ގެންދިޔަ އިކޮނޮމިކް މިނިސްޓަރު ފައްޔާޒު އިސްމާއީލަށް ސިޓީއެއް ފޮނުވާފައިވޭ.
  • 26 ސެޕްޓެމްބަރު 2019: އެއްބަސްވުމާއިއ އެއްގޮތަށް އަމަލުކުރުމަށް ބެސްޓްނެޓްގެ ފަރާތުން ސިޓީއެއް ފޮނުވާފައިވޭ. ނަމަވެސް ސަރުކާރުން އެ ސިޓީއަށް އެއްވެސް ޖަވާބެއް ދީފައެއް ނުވޭ.
  • 10 އޮގަސްޓު 2020: ގެއްލުމުގެ ބަދަލު ހޯދުމަށް ބެސްޓްނެޓު ކުންފުނީގެ ލޯ ފާމަކުން އެދިފައިވޭ.

މީގެއިތުރުން ވެސް އެ އެއްބަސްވުމާއި މެދު އަމަލުކުރާނެ ގޮތުގެ ލަފައަކަށް އެދި ކުރީގެ ރައީސް ސޯލިހަށް ވެސް އޭރު އިމިގްރޭޝަނުން ސިޓީއެއް ފޮނުވި ކަމަށް މިއަދުގެ ޖަލްސާގައި އިހުސާން ވިދާޅުވިއެވެ. ނަމަވެސް އެމަނިކުފާނުގެ ވެރިކަން ނިމިގެން ދިޔައިރުވެސް އެ ސިޓީއަށް އެއްވެސް ޖަވާބެއް ދީފައި ނުވާ ކަމަށް ވިދާޅުވިއެވެ.