ނ. ހޮޅުދޫގައި ޒަހަމްތަކަކާއެކު މަރުވެފައި އޮއްވާ ފެނުނު އުމުރުން 50 އަހަރުގެ ޒަކިއްޔާ މޫސާގެ މަރުގެ ތަހުގީގު ހިންގުމުގައި ފުލުހުންގެ އެއްވެސް އިހުމާލެއް އޮތްތޯ ބެލުމަށް ނެޝަނަލް އިންޓަގްރިޓީ ކޮމިޝަނުން (އެންއައިސީ) އިން ނިންމައިފިއެވެ.

ޒަހަމްތަކަކާ އެކު ޒަކިއްޔާ މަރުވެފައި އޮއްވައި ފެނުނީ މިދިޔަ ސެޕްޓެމްބަރު މަހުގެ 10 ވަނަ ދުވަހު ހެނދުނުއެވެ. އެ މައްސަލާގައި މިހާތަނަށް އެއްވެސް މީހަކު ހައްޔަރު ކޮށްފައެއް ނުވެއެވެ. ނަމަވެސް ޒަކިއްޔާގެ ރަށް ހޮޅުދޫގައި މި މަރާއި ގުޅިގެން ދާދިފަހުން ވަނީ އިހުތިޖާޖު ވެސް ކޮށްފައެވެ.

އެންއައިސީން މިއަދު ބުނީ މި މައްސަލަ ބަލަން ފެށީ ޒަކިއްޔާގެ މަރުގެ މައްސަލަ ތަހުގީގު ކުރުމުގައި ފުލުހުން އިހުމާލުވެފައިވާ ކަމަށް ބުނެ، އާންމު ރައްޔިތުން ފުލުހުންގެ މައްޗަށް ސީރިއަސް ތުހުމަތުތަކެއް ކުރަމުންދާތީ އާއި އަދި މިއީ އާންމު ރައްޔިތުންގެ ކަންބޮޑުވުން އޮތް މައްސަލައަކަށް ވާތީ ކަމަށެވެ.

އެގޮތުން ޒަކިއްޔާގެ މަރުގެ މައްސަލަ ތަހުގީގު ކުރުމުގައި ގާނޫނާއި ގަވާއިދުގެ ބޭރުން އެއްވެސް ކަމެއް ފުލުހުން ކޮށްފައިވޭތޯ ބަލާނެ ކަމަށް އެންއައިސީން ބުނެ އެވެ.

މިދިޔަ ޑިސެމްބަރު މަހުގެ ތިންވަނަ ދުވަހު ފުލުހުންގެ ފަރާތުން ބޭއްވި ނޫސްވެރިންގެ ބައްދަލުވުމެއްގައި ފުލުހުން ބުނީ ޒަކިއްޔާ މަރުވެފައި ވަނީ މީހެއްގެ ފުށުން ލިބުނު އަނިޔާއެއްގެ ސަބަބުންކަން މިހާތަނަށް ތަހުގީގުން ފެނިފައިވާ ނުވާ ކަމަށެވެ.

ނަމަވެސް ޒަކިއްޔާ އަށް އަނިޔާގެ ގިނަ ޒަހަމްތަކެއް ލިބިފައިވާ ކަމަށާއި އެގޮތުން ކަރުގެ ދެފަރާތުގައި ތޫނު އެއްޗަކުން ލިބިފައި ހުރި އަނިޔާގެ ޒަހަމްތައް ހުރި ކަމަށް ފުލުހުން ބުންޏެވެ.

މި މައްސަލާގައި އެމެރިކާގެ ފެޑެރަލް ބިއުރޯ އޮފް އިންވެސްޓިގޭޝަންގެ އެހީތެރިކަން ހޯދަމުން އަންނަ ކަމަށް މިދިޔަ މަހުގެ 1ވަނަ ދުވަހު ފުލުހުން ބުނެފައިވެއެވެ.