ރައްޔިތުންގެ މަޖިލީހަށް އިންތިހާބުވި ޕާޓީން ވަކިވާ މެމްބަރުންގެ ގޮނޑި ގެއްލޭ ގޮތަށް ގާނޫނުއަސާސީއަށް ގެނައި އިސްލާހުގެ މައްސަލަ ސުޕްރީމް ކޯޓަށް ނުބެލޭނެ ކަމަށް އެޓާނީ ޖެނެރަލްގެ އޮފީހުން ސުޕްރީމް ކޯޓުގައި މިއަދު ބުނެފި އެވެ.

މަޖިލީހަށް އިންތިހާބުވި ޕާޓީން ވަކިވުމުން ނުވަތަ ވަކިކުރުމުން މެމްބަރުކަމުގެ ގޮނޑި ގެއްލޭ ގޮތަށް ޕީއެންސީގެ ސުޕަ މެޖޯރިޓީ އޮތް މަޖިލީހުން މިދިޔަ އަހަރު ގާނޫނުއަސާސީއަށް ގެނައި އިސްލާހު ބާތިލްކުރަން ސުޕްރީމް ކޯޓަށް ހުށަހެޅުއްވީ މަޖިލީހުގެ ކެންދޫ ދާއިރާގެ ކުރީގެ މެމްބަރު އަލީ ހުސައިނެވެ.

ސުޕްރީމް ކޯޓުގައި މިއަދު ބޭއްވި އަޑުއެހުމުގައި އެޓާނީ ޖެނެރަލްގެ އޮފީހުގެ ވަކީލާ ފާތިމަތު ހަލީމް ވިދާޅުވީ ގާނޫނުއަސާސީއަށް ގެނެވޭ އިސްލާހެއްގެ މައްސަލަ ސުޕްރީމް ކޯޓަށް ނުބެލޭނެ ކަމަށެވެ. އަދި ގާނޫނުއަސާސީގެ ދަށުން ސުޕްރީމް ކޯޓަށް ބެލޭނީ ގާނޫނެއް ނުވަތަ ގަވާއިދުތަކުގެ މައްސަލަތައް ކަމަށްވާތީ އެ މައްސަލަ ސުޕްރީމް ކޯޓަށް ނުބެލޭނެ ކަމަށް ވަކީލާ ވިދާޅުވެ, އިޖްރާއީ އިއުތިރާޒެއް ސުޕްރީމް ކޯޓުގައި މިއަދު ދައުލަތުން ނެގި އެވެ.

މަޖިލީހުން ހިތުހުރި ގޮތަކަށް އަމަލުކުރުމުން ވެސް ސުޕްރީމް ކޯޓަށް އެ މައްސަލަ ނުބެލޭނެތޯ ބެންޗުން ސުވާލު އެއްސެވި އެވެ. އަދި ދައުލަތުން ވަކާލާތު ކުރާގޮތުގެ ސަބަބުން މުޅި ދައުލަތުގެ ބާރުތައް އެއްކޮށް ހަނިވެގެން ހިނގައިދާނެ ކަމަށް ފަނޑިޔާރުން ވިދާޅުވި އެވެ.

މިސާލަކަށް ދައުލަތުގެ ދީނަކީ އިސްލާމްދީން ކަމަށް ގާނޫނުއަސާސީގައި އޮންނަ މާއްދާ ބަދަލުކޮށްފިނަމަ ދެން ހަދާނީ ކިހިނެތްތޯ ސުވާލު ކުރެއްވިއެވެ.

"މިއީ ވަރަށް ހުތޫރަތްތެރި ކަމެއް." ސުއޫދު ވިދާޅުވި އެވެ.

ޖަވާބުގައި ވެސް ދައުލަތުން ބުނީ ގާނޫނުއަސާސީއާ ހިލާފަށް ނިންމާފައިވާ ނިންމުންތައް ކޯޓަށް ބާތިލް ކުރެވޭނެ ކަމަށެވެ.

އަލީ ހުސައިންގެ ވަކީލް މަހްފޫޒް ސައީދު ވިދާޅުވީ ގާނޫނުއަސާސީގެ އަސާސީ ހައްގަކާ ގުޅޭ ކަމެއްނަމަ އެ މައްސަލަ ސުޕްރީމް ކޯޓަށް ބެލޭނެ ކަމަށެވެ.

ސުޕްރީމް ކޯޓުގެ ފުލް ބެންޗުން ބައްލަވާ އެ މައްސަލާގައި އިތުރު އަޑުއެހުމެއް މާދަމާ ވެސް ބާއްވާނެ އެވެ.

އެ މައްސަލާގެ ތެރެއަށް އެމްޑީޕީ އާއި ޑިމޮކްރަޓްސް ޕާޓީން ވެސް ވަނީ ތަދައްހުލްވެފަ އެވެ.