އެއްވެ އުޅުމާއި ހިޔާލުފާޅު ކުރުމަށް ސަރުކާރުން އަހައްމިއްޔަތުކަން ދޭ މިންވަރު ފެނިއްޖެ ކަމަށް ސަރުކާރުގެ ތަރުޖަމާން ހީނާ ވަލީދު ވިދާޅުވެއްޖެއެވެ.

އެމްޑީޕީން ރޭ މާލޭގައި ބޭއްވި ހިނގާލުމާ ގުޅިގެން އެކްސްގައި ހީނާ ކުރެއްވި ޕޯސްޓެއްގައި ވިިދާޅުވީ، އެ އެއްވުމުގެ ސަލާމަތީ ކަންކަން ބެލެހެއްޓުމުގައި ފުލުހުން ހަރަކާތްތެރިވެފައިވާއިރު އެ އެއްވުން އެއްވެސް ހުރަހެއް ނެތި ކުރިޔަށް ގެންދަން ފުރުސަތު ދިނުމުން، އެއްވެ އުޅުމާއި ހިޔާލުފާޅުކުރުމުގެ ހައްގުތަކަށް، މި ސަރުކާރުން ގަދަރުކުރާ މިންވަރު ސާފުކޮށް ފެނިގެން ގޮސްފައިވާ ކަމަށެވެ.

ރޭގެ އެއްވުމަކީ ސަރުކާރަށް އެމްޑީޕީގެ "ސައިޒު" ދައްކާލުމަށް ބޭއްވި އެއްވުމެކެވެ. އެ އެއްވުމުގައި ގިނަ އަދަދެއްގެ އާއްމުންނާ އެމްޑީޕީ ލީޑާޝިޕްގެ ބޭފުޅުން ބައިވެރިވެވަޑައިގަތެވެ.

އެއްވުމުގެ ބައިވެރިން ވަނީ ސަރުކާރަށް ފާޑު ކިޔައި، ސަރުކާރާ ދެކޮޅަށް ވަރަށް ބޮޑަށް އަޑު އުފުލައިފައެވެ. މި އެއްވުން ކުރިޔަށް ގެންދިޔައީ ސުލްހަވެރިކަމާއެކުގައެވެ.