މިހާރު ސަރުކާރު ހިންގާ ޕީއެންސީގެ ކޯލިޝަން ޕާޓްނަރު ޕްރޮގްރެސިވް ކޮންގްރެސް ޕާޓީ (ޕީޕީއެމް) އުވާލަން އެޕާޓީގެ ސެނެޓުން ނިންމާފައި ވާތީ އެޕާޓީ އުވާލައި، ސިޔާސީ ޕާޓީތަކުގެ ދަފްތަރުން އުނިކޮށްފިއެވެ.

ޕީޕީއެމް އުވާލުމަށް އެޕާޓީގެ ސެނެޓުން ފާސްކުރީ މިދިޔަ ޑިސެމްބަރު މަހުގެ ދެވަނަ ދުވަހުއެވެ. ޕީޕީއެމް އުވާލަން ނިންމާފައި ވަނީ ވޯޓުގައި ބައިވެރިވެވަޑައިގެންނެވި 42 މެންބަރުންގެ އިއްތިފާގުންނެވެ.

އެ ނިންމުމާއެކު އިލެކްޝަންސް ކޮމިޝަނުން ވަނީ މިދިޔަ ޑިސެމްބަރު މަހުގެ 18ވަނަ ދުވަހު ޕީޕީއެމް އުވާލުމުގެ މަސައްކަތްތައް ފަށައިފައެވެ.

އެ ކޮމިޝަނުން މިއަދު ބުނީ ސިޔާސީ ޕާޓީތަކުގެ ގާނޫނުގެ ދަށުން ޕީޕީއެމް އުވާލުމަށް އެ ޕާޓީގެ ސެނެޓުން ނިންމައި، ފުރިހަމަ ކުރަންޖެހޭ ކަންކަން ފުރިހަމަކޮށް އެ ކޮމިޝަނަށް ހުށަހަޅާފައިވާ ކަމަށެވެ.

އެހެންކަމުޖް މިއަދުން ފެށިގެން ޕީޕީއެމް އުވާލައި އެ ޕާޓީ ސިޔާސީ ޕާޓީގެ ދަފްތަރުން އުނިކުރިކުރުމަށް އެ ކޮމިޝަނުން ނިންމައިފައިވާ ކަމަށެވެ.

ޕީޕީއެމް އަކީ ކުރީގެ ރައީސް މައުމޫން އުފެއްދެވި ޑީއާރްޕީގެ ތެރޭގައި ހިޔާލު ތަފާތުވުންތަކާއެކު އުފެދުނު "ޒެޑް ފެކްޝަން"ގެ ތެރެއިން އުފަންވި ޕާޓީއެކެވެ. ޕާޓީ އުފެއްދިތާ މާގިނަ ދުވަސްތަކެއް ނުވަނީސް އެޕާޓީ ވަނީ 2013ވަނަ އަހަރު ބޭއްވި ރިޔާސީ އިންތިހާބު ކާމިޔާބު ކުރައްވައިފައެވެ. އަދި 2018ވަނަ އަހަރާއި ހަމައަށް އެޕާޓީ ރާއްޖޭގެ ވެރިކަމުގައި އޮތެވެ.

ނަމަވެސް ވެރިކަމުގެ ތެރޭގައި ޕީޕީއެމްގެ ރައީސްކަމުގެ މަގާމުގައި ހުންނެވި ކުރީގެ ރައީސް މައުމޫނާއި އޭރު ވެރިކަމުގައި ހުންނެވި ރައީސް ޔާމީނާ ދެބޭފުޅުންގެ މެދުގައި ހިޔާލު ތަފާތުވުންތައް އުފެދި ޔާމީނަށް ޕީޕީއެމްގެ ކޮންޓްރޯލް ގެއްލިދާނެ ކަމުގެ ބިރަށް ޕީއެންސީގެ ނަމުގައި އައު ސިޔާސީ ޕާޓީއެއް އުފެއްދިއެވެ.

ޕީޕީއެމްގެ މިލްކުވެރިކަމުގެ މައްސަލަ ކޯޓަށް ވެސް ހުށަހެޅިއެވެ. ނަމަވެސް ކޯޓުގެ މައްސަލަ ކާމިޔާބުވީ ޔާމީނާ އެއްކޮޅަށެވެ. އެއާއެކު ޕީއެންސީ އަދި ޕީޕީއެމް ވެސް ހިންގަމުން ގެންދިޔައީ އެއްފުރާޅެއްގެ ދަށުން، އެއް ލީޑާޝިޕެއްގެ ދަށުންނެވެ. އެކަމަކު 2023ވަނަ އަހަރުގެ ރިޔާސީ އިންތިހާބުގައި ޔާމީނަށް ވާދަ ނުކުރެވޭނެ ހާލަތަށް ދިއުމުން މިހާރުގެ ރައީސް ޑރ. މުހައްމަދު މުއިއްޒަށް ރިޔާސީ ޓިކެޓު އެރުވީ ޕީއެންސީގެ ޓިކެޓުގައެވެ.

ޕީއެންސީ ވެރިކަމަށް އައި ފަހުން ޕީޕީއެމްގެ ހަރަކާތްތައް މަޑު ޖެހުނެވެ. އަދި ޕީޕީއެމްގެ ރައީސްކަމުގައި ހުންނެވި ކުރީގެ ރައީސް ޔާމީނާއި ދެޕާޓީގެ ލީޑާޝިޕާއި ދެމެދު މައްސަލަ ޖެހި، އެންމެ ފަހުން ޔާމީން ވެސް އެޕާޓީން އިސްތިއުފާ ދެއްވާ އައު ޕާޓީއެއް އުފެއްދެވިއެވެ.