ރާއްޖޭގެ 57 ރަށެއްގައި 12،000 އަށްވުރެ ގިނަ ހައުސިން ޔުނިޓު ތަރައްގީ ކޮށްދޭނެ ބަޔަކު ހޯދުމަށް ފިނޭންސް މިނިސްޓްރީން އިއުލާން ކޮށްފިއެވެ.

ރާއްޖޭގެ ރަށްރަށުގައި ހިންގާ ބޯހިޔާވަހިކަމުގެ މަޝްރޫއުތައް ހިންގުމަށް ބޭނުންވާ ކޮންޓްރެކްޓަރުން ހޯދަން މިމަހު އިއުލާން ކުރައްވާނެ ކަމަށް ރައީސް ޑރ. މުހައްމަދު މުއިއްޒު ވަނީ މިމަހުގެ 22ވަނަ ދުވަހު ވިދާޅުވެފައެވެ. އެމަނިކުފާނު އިއުލާން ކުރެއްވި ގޮތަށް ފިނޭންސުން ވަނީ އެކަން ކޮށްދޭނެ ބަޔަކު ހޯދަން މިއަދު އިއުލާން ކޮށްފައެވެ.

ރ. އަތޮޅުގެ ރަށްތަކަށް މިދިޔަ ހަފްތާގައި ކުރެއްވި ދަތުރުފުޅުގައި އެ އަތޮޅު އިންނަމާދޫ އަށް ވަޑައިގެން ވާހަކަދައްކަވަމުން ރައީސް ވިދާޅުވީ މިއަހަރުގެ ބަޖެޓުގައި ވެސް އެންމެ ބޮޑަށް އިސްކަމެއް ދެއްވާފައި ވާނީ ރާއްޖޭގައި ދިމާވެފައިވާ އެންމެ ބޮޑު މައްސަލަ ކަމަށްވާ ބޯހިޔާވަހިކަމުގެ މައްސަލައަށް ކަމަށެވެ.

ފިނޭންސް މިނިސްޓްރީން ބުނީ އެ މަޝްރޫއުތައް ކުރިޔަށް ގެންދިއުމަށް ހަމަޖެހިފައި ވަނީ އިންޓަނޭޝަނަލް ކޮމްޕެޓިޓިވް ބިޑިން (އައިސީބީ) އާއި ނޭޝަނަލް ކޮމްޕެޓިޓިވް ބިޑިން (އެންސީބީ) އުސޫލުތަކާއި، އެއްގޮތްވާ ގޮތުގެ މަތީން ކަމަށެވެ. އަދި ދައުލަތުގެ މާލިއްޔަތު ގަވާއިދުގައި ބަޔާން ކުރާ ހަމަތަކުގެ މަތީން ކަމަށެވެ.

ބީލަށް ހުށަހެޅުމަށް ފިނޭންސުން ހުޅުވާލާފައި ވަނީ ޖުމްލަ ހަތަރު ކެޓަގަރީއަކުންނެވެ. އެގޮތުން 50 ހައުސިން ޔުނިޓަށްވުރެ މަދުން ތަރައްގީ ކުރާ ރަށްތަކުގައި އެ މަސައްކަތް ކުރިޔަށް ގެންްދާނީ ރާއްޖޭގެ ކޮންޓްރެކްޓަރުންނެވެ.

ނަމަވެސް 51 ހައުސިން ޔުނިޓާއި 150 ހައުސިން ޔުނިޓު އަދި 200 އާއި 250 ހައުސިން ޔުނިޓާއި 300 އަށްވުރެ ގިނަ ހައުސިން ޔުނިޓު ތަރައްގީ ކުރުމަށް ރާއްޖޭން ބޭރުގެ ކޮންޓްރެކްޓަރުންނަށް ވެސް ބިޑު ހުށަހެޅިގެން ދާނެއެވެ.

އެންމެ މަދުން ހައުސިން ޔުނިޓުތައް އަޅާ ރަށުގެ ގޮތުގައި އޮތީ އދ. ދިގުރަށެވެ. އެ ރަށުގައި ވެސް 30 ހައުސިން ޔުނިޓު އެޅުމަށް ވަނީ ނިންމައިފައެވެ. އައްޑޫ ސިޓީގެ ވެސް ހަތަރު ރަށެއްގައި ޖުމްލަ 400 ހައުސިން ޔުނިޓު އަޅައެވެ. އެއީ މަރަދޫ އާއި މަރަދޫ ފޭދޫ އާއި ހުޅުދޫ އަދި މީދޫއެވެ. މިއިން ކޮންމެ ރަށެއްގައިވެސް 100 ހައުސިން ޔުނިޓު އަޅައެވެ.

މި ލިސްޓުގައި އެންމެ ގިނައިން ހައުސިން ޔުނިޓު އަޅާނެ ކަމަށް ބުނެފައި އޮތީ ކުޅުދުއްފުށީ ސިޓީގައެވެ. އެއީ 2،000 ހައުސިން ޔުނިޓެވެ.