ހުޅުމާލެ ދެވަނަ ފިޔަވަހީގައި އެސްޖޭ ކުންފުންޏާއި ހަވާލު ކޮށްގެން އިމާރާތް ކުރުމުގެ މަސައްކަތް ކުރަމުން އަންނަ މިސްކިތް ނިންމުމަށް އެ ކުންފުނީގެ އެއްބާރުލުން ލިބެމުން އަންނަ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު މިއަދު ވިދާޅުވެއްޖެއެވެ.

އިސްލާމިކް މިނިސްޓްރީގެ މީޑިއާ ވަޓްސްއަޕް ގްރޫޕަށް މިނިސްޓަރު ފޮނުއްވި މެސެޖެއްގައި މިއަދު ވިދާޅުވީ 2022 ވަނަ އަހަރުގެ 23 ޖެނުއަރީ ގައި އެސްޖޭ ކުންފުނިން ހުޅުމާލެގައި އަޅަން ފެށި މިސްކިތް ގިނަ ދުވަސްތަކެއް ވަންދެން މަސައްކަތް ހުއްޓިފައި އޮތް ކަމަށެވެ. އަލުން މަސައްކަތް ފެށުނީ މި ސަރުކާރު އައިފަހުން ކަމަށް މިނިސްޓަރު ވިދާޅުވިއެވެ.

އެމަނިކުފާނު ވިދާޅުވީ އެ މިނިސްޓްރީ އިން ބާރު އަޅައިގެން މިސްކިތް އަވަހަށް ނިންމުމަށް ކުރަންޖެހޭ ކަންކަން ކުރަމުން އަންނަ ކަމަށެވެ.

"އަޅުގަނޑުވާނީ އެތަނަށް ޒިޔާރަތްކޮށް ދިމާވެފައި ހުރި ދަތިތައް ވެސް ބަލާފައި. ހައްލުކުރަން ޖެހޭ ކަންކަން ހައްލުކޮށްދެމުން މިދަނީ،" މިނިސްޓަރުގެ މެސެޖުގައި ވިދާޅުވިއެވެ.

އެސްޖޭ އިން ހުޅުމާލޭގައި އަޅާ މިސްކިތަށް ގެންނަ ތަކެއްޗަކީ ޑިއުޓީ މާފު ތަކެތި ކަމަށް ދެކެވޭ ވާހަކައާ ގުޅިގެން މިނިސްޓަރު ޝަހީމް ވިދާޅުވީ އެ ވާހަކައަކީ ދޮގު ވާހަކައެއް ކަމަށެވެ. 2022ވަނަ އަހަރު މިސްކިތުގެ މަސައްކަތް ފެށި ފަހުން މިއަދާއި ހަމައަށް އެ މިސްކިތުގެ މަސައްކަތަށް ގެނެސްފައިވާ އެއްވެސް އެއްޗަކުން ޑިއުޓީ މާފު ކޮށްދީފައި ނުވާނެ ކަމަށް މިނިސްޓަރު ވިދާޅުވިއެވެ.

"މިސްކިތް ނިންމުމަށް ކުރެވޭ މަސައްކަތުގައި އެސްޖޭ ކުންފުނީގެ އެހީތެރިކަން ލިބެމުންދޭ،" ޝަހީމް ވިދާޅުވިއެވެ.

ދާދިފަހަކުން އެސްޖޭ އިން ހުޅުމާލެ އިން އިތުރު ބިމެއް ގަތް މައްސަލައާ ގުޅިގެން ގިނަ ބަޔަކު އަންނަނީ އެސްޖޭ އަށް ފާޑު ކިޔަމުންނެވެ. އަދި ވަކީން ހާއްސަކޮށް ފޭސް ދޭއްގައި އިމާރާތް ކުރަން ފެށި މިސްކިތް ފެށިގެން ތިންވަނަ ރޯދަމަސް އަންނައިރުވެސް މިސްކިތުގެ މަސައްކަތް ނުނިމި ދިގުލައިގެން ދާތީ ސޯޝަލް މީޑިއާގައި އާއްމުންގެ ފާޑުކިޔުން އެ ކުންފުންޏަށް ވަނީ އަމާޒުވެފައެވެ.