ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އަށް އެކި ފަރާތްތަކުން ދޭ ފައިސާއަށް އެ އެސޯސިއޭޝަންގެ އިސްވެރިން ހިޔާނާތްތެރިވެ، އެ އެސޯސިއޭޝަން އަށް ބޭރުގެ ފަރާތްތަކުން އެހީގެ ގޮތުގައި ޔޫއެސް ޑޮލަރުން ލިބޭ ފައިސާ އެ އެސޯސިއޭޝަންގެ އިސްވެރިންނާއި އެސޯސިއޭޝަނާ ގުޅުން އޮންނަ ފަރާތްތަކަށާއި، ކުންފުނިތަކުގެ އެކައުންޓްތަކަށް ޖަމާކޮށް، ނަހަމަގޮތުގައި ބޭނުންކޮށް މަނީ ލޯންޑްރިންގެ އަމަލުތަކެއް ހިންގާކަމަށް ތުހުމަތުކުރެވޭ މައްސަލާގައި އިތުރު ބަޔަކަށް ދައުވާ ކުރުމަށް ކްރިމިނަލް ކޯޓަށް ހުށަހަޅައިފިއެވެ.

ޕްރޮސިކިއުޓަރު ޖެނެރަލް އޮފީސް (ޕީޖީ) އިން މިއަދު ބުނީ އެ މައްސަލާގައި ތިން ފަރާތަކަށް ދައުވާ ކުރުމަށް ހުށަހަޅާފައިވާ ކަމަށެވެ. އޭގެތެރޭގައި ކޮންސްޓްރަކްޝަންގެ މަސައްކަތްތަކާއި ރިއަލްސްޓޭޓް ވިޔަފާރި ކުރަމުން އަންނަ އަމީން ކޮންސްޓްރަކްޝަން ވެސް ހިމެނެއެވެ.

އެފްއޭއެމް ހިޔާނާތާ ގުޅިގެން ދައުވާކުރާ އިތުރު ފަރާތްތައް:

  • ގއ. ގެމަނަފުށި، ފެހިކުރި، މުހައްމަދު އަގީލް: މީނަގެ މައްޗަށް މަނީ ލޯންޑްރިން އަދި ޓެރަރިޒަމަށް ފައިނޭންސްކުރުން ހުއްޓުވުމުގެ ގާނޫނުގެ ދަށުން، މަނީ ލޯންޑާ ކުރުމަށް އެހީތެރިވުމުގެ ކުށުގެ ދައުވާ ކޮށްފައިވެއެވެ.

ޕީޖީން ބުނީ އޭނާގެ މައްޗަށް ދައުވާ ކުރަނީ އެފްއޭއެމްގެ އެކައުންޓްސް ޑިޕާޓުމަންޓުގެ ހެޑުގެ ގޮތުގައި ހުރެ، އެފްއޭއެމްގެ ކުރީގެ ރައީސް ބައްސާމް އަދީލް ޖަލީލު 2021ވަނަ އަހަރުގެ ޖެނުއަރީ މަހުގެ 26ވަނަ ދުވަހު އަމީން ކޮންސްޓްރަކްޝަންގެ އަމީން އެވެނިއު އެޕާޓްމަންޓް ގަތުމަށް އެފްއޭއެމްގެ އެކައުންޓުގައިވާ ފައިސާއިން އަމީން ކޮންސްޓްރަކްޝަން އަށް ފައިސާ ދެއްކުމަށްޓަކައި، ޗެކު ތައްޔާރުކޮށްދީ، 14 އޭޕްރީލް 2021 ދުވަހު އެ ޗެކު މެދުވެރިކޮށް އަމީން ކޮންސްޓްރަކްޝަނަށް އެއް މިލިއަން އެމެރިކާ ޑޮލަރު ޖަމާކުރި މައްސަލައާ ގުޅިގެން ކަމަށެވެ.

އެ ފައިސާއަކީ ޑޮލަރު ވިއްކުމުގެ މުާއމަލާތެއްކަމުގައި ދެއްކުމުގެ ގޮތުން އެ ޑޮލަރަށްވާ ދިވެހި ރުފިޔާ އެފްއޭއެމްއަށް ލިބިފައި ނުވަނީސް، އަމީން ކޮންސްޓްރަކްޝަނުން އެފްއޭއެމްއަށް، ޖުމްލަ 15.4 މިލިއަން ރުފިޔާ ލިބުނުކަމަށް ސްޓޭމްޕް ޖަހައި ސޮއިކޮށް އެ ލިޔުން ތައްޔާރުކޮށްފައިވާ ކަމަށްވެސް ޕީޖީން ބުންޏެވެ.

އެހެންކަމުން އެފްއޭއެމްގެ ފައިސާ ބޭނުންކޮށްގެން، އަމީން އެވެނިއުގެ އެޕާޓްމަންޓް ހޯދައި ލިބިގަތުމަށާއި މަނީ ލޯންޑާކުރުމަށް ބައްސާމު އަދީލް ޖަލީލްއަށް އަގީލް އެހީތެރިވެދީފައިވާ ކަމަށް ޕީޖީން ބުންޏެވެ.

  • މ. ހިރިނައިދޫ، ހަސަން ވަހީދު: މީނާގެ މައްޗަށް ވެސް ކުރަނީ މަނީ ލޯންޑާ ކުރުމަށް އެހީތެރިވުމުގެ ކުށުގެ ދައުވާ ކަމަށް ޕީޖީން ބުނެއެވެ.

ހަސަން ވަހީދަކީ 2014 ވަނަ އަހަރުން ފެށިގެން އެފްއޭއެމްގެ އެކި މަގާމުތައް އަދާކުރަމުން އައިސް، އެ އެސޯސިއޭޝަންގެ އޭރުގެ ރައީސް ބައްސާމް އަމީން ކޮންސްޓްރަކްޝަންގެ އަމީން އެވެނިއު އެޕާޓްމަންޓް ގަތުމަށް އަމީން ކޮންސްޓްރަކްޝަންއަށް ފައިސާ ދެއްކުމުގެ ގޮތުން، އެފްއޭއެމްގެ އެކައުންޓުގެ ޗެކެއް މެދުވެރިކޮށް 19 ޖަނަވަރީ 2021 ދުވަހު ޗެކްމާކް ކުންފުންޏަށް އެއްލައްކަ ޑޮލަރު ދޫކުރުމުގެ ކަންކަން އިންތިޒާމް ކުރުމުގައި އެހީތެރިވެދިން ފަރާތެއް ކަމަށް ޕީޖީން ބުނެއެވެ.

އެ ފައިސާއަށްވާ 1.54 މިލިއަން ރުފިޔާ އެފްއޭއެމް އަށް ދެއްކުމުގެ ގޮތުން ޗެކްމާކް ކުންފުންޏާއި އައިއެސް އެންޓަޕްރައިޒަސް އިން ދޫކުރި ޗެކުތަކުގައިވާ ފައިސާ އަމީން ކޮންސްޓްރަކްޝަންއަށް ޖަމާކުރުމަށް ބޭންކް އޮފް ސިލޯނަށް އިރުޝާދުދީ، އެ ފައިސާ އަމީން ކޮންސްޓްރަކްޝަން އަށް ޖަމާކުރުމަށް ވެސް އޭނާ އެހީވެދީފައިވާ ކަމަށް ޕީޖީން ބުނެއެވެ.

އަދި އެފްއޭއެމްގެ އެކައުންޓުގެ ޗެކު މެދުވެރިކޮށް 19 ޖަނަވަރީ 2021 ދުވަހު ޕްރޯ ސިނާޖީ މެޑިކަލް ސިސްޓަމްސް އަށް އެއްލައްކަ ޑޮލަރު ދޫކުރުމުގެ ކަންކަން އިންތިޒާމްކޮށް، އެ ފައިސާއަށްވާ 1.54 މިލިއަން ރުފިޔާ އެފްއޭއެމް އަށް ދެއްކުމުގެ ގޮތުން ޕްރޯ ސިނާޖީ މެޑިކަލް ސިސްޓަމްސް އިން ދޫކުރި ޗެކުގައިވާ ފައިސާ އަމީން ކޮންސްޓްރަކްޝަނަށް ޖަމާކުރުމަށް ބޭންކް އޮފް ސިލޯނަށް އިރުޝާދުދީ، އެ ފައިސާ އަމީން ކޮންސްޓްރަކްޝަނަށް ޖަމާކުރުމަށް އެހީވެދީފައި ވަނީ ވެސް ހަސަން ވަހީދު ކަމަށް ޕީޖީން ބުންޏެވެ.

  • އަމީން ކޮންސްޓްރަކްޝަން ޕްރައިވެޓް ލިމިޓެޑް: އެކުންފުނީގެ މައްޗަށް ވެސް މަނީ ލޯންޑާ ކުރުމަށް އެހީތެރިވުމުގެ ކުށުގެ ދައުވާ ވަނީ ކޮށްފައެވެ.

އެކުންފުންޏަށް އެ ދައުވާ ކުރީ ބައްސާމް 2016ވަނަ އަހަރުން ފެށިގެން އެފްއޭއެމްގެ ރައީސްގެ މަގާމުގައި ހުރެ އެ އެސޯސިއޭޝަންގެ އެކައުންޓުގެ ޗެކު، 08 އޭޕްރީލް 2021 ދުވަހު ތައްޔާރުކުރުވައި، ޗެކުގައި އޭނާ ސޮއިކޮށް، 14 އޭޕްރީލް 2021 ދުވަހު ފީފާއިން އެފްއޭއެމްގެ އެކައުންޓަށް 1.9 މިލިއަން ޑޮލަރު ޖަމާކުރުމުން، އަމީން އެވެނިއުގެ އެޕާޓްމަންޓް ގަތުމަށްޓަކައި، އެ ފައިސާގެ ތެރެއިން އެއް މިލިއަން ޑޮލަރު ނެގޭ ގޮތަށް ބައްސާމު އިސްވެ ދެންނެވި ޗެކު އަމީން ކޮންސްޓްރަކްޝަން އަށް ދޫކުރުމުން، އެ ޗެކުގައިވާ ފައިސާއަކީ އެފްއޭއެމްގެ ފައިސާކަން އެނގިހުރެ، އެ ފައިސާ ބަލައިގަނެފައި ވާތީއެވެ.

ޕީޖީން ބުނި ގޮތުގައި އެ ފައިސާއަކީ ޑޮލަރު ގަތުމުގެ މުއާމަލާތެއްކަމަށް ބަޔާންކޮށް، ބޭންކް އޮފް ސިލޯނަށް ސިޓީ ފޮނުވައި، 14 އޭޕްރީލް 2021 ދުވަހު އަމީން ކޮންސްޓްރަކްޝަންގެ އެކައުންޓަށް އެ ފައިސާ ޖަމާކޮށް، އެ ފައިސާއަށްވާ ދިވެހި ރުފިޔާ އެފްއޭއެމް އަށް އަނބުރާ ދެއްކުމަކާ ނުލައި، އެ ފައިސާއަށްވާ ދިވެހި ރުފިޔާ އެ އެސޯސިއޭޝަން އަށް ނަގުދު ފައިސާއިން ދީފައިވާކަން ދެއްކުމުގެ ގޮތުން އަމީން ކޮންސްޓްރަކްޝަންގެ ނަމުގައި ކޭޝް ވައުޗަރުތަކެއް ތައްޔާރުކޮށް، މަނީ ލޯންޑާ ކުރުމަށް އަމީން ކޮންސްޓްރަކްޝަން އިން ބައްސާމު އަށް އެހީތެރިވެދީފައިވާ ކަމަށެވެ.

މިކަމުގެ ސަބަބުން އެފްއޭއެމް އަށް ލިބުނު ގެއްލުމުގެ ބަދަލުގައި އެއް މިލިއަން ޑޮލަރު އަމީން ކޮންސްޓްރަކްޝަން އިން ނަގައި ދިނުމަށާއި އަމީން ކޮންސްޓްރަކްޝަންގެ އެ އަމަލުގެ ސަބަބުން، ބައްސާމު ހޯދައި ލިބިގަނެ ބޭނުންކުރަމުން ގެންދިޔަ އަމީން ކޮންސްޓްރަކްޝަންގެ އަމީން އެވެނިއު އެޕާޓްމަންޓް A1205 އަދި A1206 ދައުލަތަށް ނަގައިދިނުމަށް ވެސް ދައުވާގައި އެދިފައިވެއެވެ.

މި މައްސަލާގައި ތުހުމަތުކުރެވޭ އެފްއޭއެމްގެ ކުރީގެ ރައީސް ބައްސާމުގެ މައްޗަށް، ހިޔާނާތްތެރިވުމުގެ ކުށުގެ ދެ ދައުވާއާއި، މަނީ ލޯންޑްރިންގެ ދެ ދައުވާ ކޯޓަށް ހުށަހެޅި ދަނީ ހިނގަމުންނެވެ.