އިންޑިއާ ސަރުކާރުން ދިވެހިރާއްޖެއަށް ކަނޑައެޅުއްވި އައު ސަފީރު، ޖީ. ބާލަސުބްރަމާނިއަން، ފޮރިން މިނިސްޓަރު ހަލީލާ ބައްދަލުކުރައްވައިފިއެވެ.

ފޮރިން މިނިސްޓްރީގައި މިއަދު ބޭއްވި އެ ބައްދަލުވުމަކީ މަގާމުގެ މަސްއޫލިއްޔަތާއި ބާލަސުބްރަމާނިއަން ހަވާލުވެވަޑައިގެންނެވި ފަހުން، ފޮރިން މިނިސްޓަރު ހަލީލާ ބައްދަލުކުރެއްވި ފުރަތަމަ ފަހަރެވެ. ފޮރިން މިނިސްޓްރީން ބުނީ އެ ބައްދަލުކުރެއްވުމުގައި ދެ ގައުމުގެ ގުޅުން ބަދަހި ކުރެވޭނެ ދާއިރާތަކާއި ގުޅޭ ގޮތުން މަޝްވަރާ ކުރެއްވުނު ކަމަށެވެ.

އިންޑިއާ ސަރުކާރުން ދިވެހިރާއްޖެއަށް ކަނޑައެޅުއްވި އައު ސަފީރު، ޖީ. ބާލަސުބްރަމާނިއަން، ސަފީރުކަމުގެ ފަތްކޮޅު ރައީސުލްޖުމްހޫރިއްޔާ ޑރ. މުހައްމަދު މުއިއްޒަށް އެރުވީ މިމަހުގެ ހަވަނަ ދުވަހުއެވެ.

ދާދިފަހުން ފޮރިން މިނިސްޓަރު ހަލީލް ވަނީ އިންޑިއާ އަށް ރަސްމީ ދަތުރުފުޅެއްގައި ވަޑައިގެންފައެވެ. އެއީ ފޮރިން މިނިސްޓަރުކަމާ ހަލީލް ހަވާލުވެވަޑައިގެންނެވި ފަހުން އިންޑިއާ އަށް ކުރެއްވި ފުރަތަމަ ދަތުރުފުޅެވެ. އެ ދަތުރުފުޅުގައި އިންޑިއާގެ އެކްސްޓާނަލް އެފެއާޒު މިނިސްޓަރު ޖައިޝަންކަރާ ބައްދަލުކުރެއްވިއެވެ.