ސައްހަ ނޫން ފޯމު ހުށަހަޅައިގެން ޕީއެންސީ އަށް މެންބަރުން އިތުރު ކުރާ މައްސަލައިގެ ތަހުގީގެއް ހިންގުމަށް ޕްރޮސިކިއުޓަރު ޖެނެރަލް (ޕީޖީ) އިން އަމުރެއް ނެރެން ޖެހޭ ކަމަށް އިދިކޮޅު އެމްޑީޕީގެ ގާނޫނީ ވަކީލުންގެ ޓީމުން މިއަދު ބުނެފިއެވެ.

އެމްޑީޕީގެ ގާނޫނީ ވަކީލުންގެ ޓީމުގެ ފަރާތުން މިއަދު ބޭއްވި ނޫސްވެރިންގެ ބައްދަލުވުމުގައި އެ ޕާޓީގެ ޑިރެކްޓަރު މަހްފޫޒް ސައީދު ވިދާޅުވީ ސައްހަ ނޫން ފޯމު ހުށަހަޅައިގެން ޕީއެންސީ އަށް މީހުން ވައްދާފައިވާ މައްސަލައިގެ 3،000 ޝަކުވާ މިހާތަނަށް އެޕާޓީ އަށް ލިބިފައިވާ ކަމަށެވެ.

އެ އަދަދު މިހާރަށްވުރެ އިތުރު ވާނެ ކަމަށް ބެލެވޭ ކަމަށާއި އެހެންކަމުން އެ މައްސަލަ ތަހުގީގު ކުރުމަށް ޕީޖީން އަމުރެއް ނެރެން ޖެހޭ ކަމަށް ގަބޫލުކުރައްވާ ކަމަށް މަހްފޫޒު ވިދާޅުވިއެވެ. އަދި އެއީ އާއްމު މަސްލަހަތު ހިމެނޭ ކަމެއް ކަމަށް މަހްފޫޒު ފާހަގަކުރެއްވިއެވެ.

އާއްމު މަސްލަހަތު ހިމެނޭ މިފަދަ އެހެން މައްސަލަތައް ތަހުގީގު ކުރުމަށް ޕީޖީން އަމުރު ނެރެފައިވާއިރު މިހާރު ފެންމަތިވެފައިވާ ވަގު ފޯމު ހުށަހެޅުމުގެ މައްސަލަ އަކީ ޕީޖީން ކުރިން އަމުރު ކުރެއްވި މައްސަލަތަކަށްވުރެ ފުޅާކޮށް އައްމު މަސްލަހަތު ހިމެނޭ ކަމެއް ކަމަށް މަހްފޫޒު ވިދާޅުވިއެވެ.

އޮޅުވާލައިގެން ސިޔާސީ ޕާޓީތަކަށް ވައްދާފައިވާ މީހުންގެ މައްސަލަތަކުގައި ހިލޭ ގާނޫނީ އެހީތެރިކަން ދޭން އެމްޑީޕީން ވަނީ މީގެކުރިން ނިންމައިފައެވެ.

ވެރިކަންކުރާ ޕީއެންސީއަށް މެމްބަރުން އިތުރުކުރިއިރު, އޮޅުވާލައިގެން އެކި މީސްމީހުންގެ ސޮއި ފޯޖްކޮށްގެން އެ ޕާޓީއަށް ވައްދާފައިވާ ގިނަ މައްސަލަތަކެއް ވަނީ ފެންމަތިވެފަ އެވެ. އެގޮތުން އެމްޑީޕީއަށް ނިސްބަތްވާ ރައްޔިތުންގެ މަޖިލީހުގެ ވައިކަރަދޫ ދާއިރާގެ މެމްބަރު ހުސައިން ޒިޔާދާއި ކުރީގެ ބައެއް ސްޓޭޓް މިނިސްޓަރުގެ ނަމުގައި ފޯމްތައް ހުށަހަޅާފައިވެ އެވެ.

ސައްހަ ނޫން ފޯމްތަކުގެ މައްސަލަ ބޮޑުވެ, އެ މައްސަލަ އިލެކްޝަންސް ކޮމިޝަނަށް ވެސް އެމްޑީޕީން ވަނީ ހުށަހަޅާފައިވެ އެވެ. އަދި ޕީއެންސީން ވެސް ފަހުން ވަނީ އެކަމަށް އެއްބަސްވެ, އެކަން ހިނގި ގޮތް ބަލަމުންދާ ކަމަށް ބުނެފަ އެވެ.