ކުރިޔަށް އޮތް ފަސް ދުވަހަކީ މުޅި ރާއްޖެ އަށް ވެސް މޫސުން ގޯސްވާނެ ފަސް ދުވަސް ކަމަށް މޫސުމާ ބެހޭ ގައުމީ އިދާރާ (މެޓް) އޮފީހުން ލަފާ ކޮށްފައި ވާތީ، ވިއްސާރައިން ލިބިދާނެ ގެއްލުންތަކުން ރައްކާތެރިވުމަށް ފުލުހުންނާއި ސިފައިން އަދި ކަމާ ގުޅުންހުރި އެހެން އިދާރާތައް ގުޅިގެން ހާއްސަ އޮޕަރޭޝަނެއް ފަށައިފިއެވެ.

ފުލުހުންނާއި އެމްޑީއެފްއާއި އެންޑީއެމްއޭ ގުޅިގެން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ކޮމިޝަނާ އޮފް ޕޮލިސް އަލީ ޝުޖާއު ވިދާޅުވީ ރައީސް ޑރ. މުހައްމަދު މުއިއްޒުގެ ހާއްސަ އިރުޝާދުފުޅާއެކު ވިއްސާރައިން ރައްކާތެރިވުމަށް ހާއްސަ ޓާސްކް ފޯސްއެއް އެކުލަވާލާފައިވާ ކަމަށެވެ.

ރައީސް ދެއްވާފައިވާ އިރުޝާދުތަކުގެ ތެރޭގައި ފުލުހުންނާއި ސިފައިން އެންމެ ބޮޑަށް ގެއްލުން ލިބޭނެ ކަމަށް ލަފާކުރެވޭ ރަށްރަށުގައި ފެން ހިންދުމުގެ އިތުރުން ރައްޔިތުންނަށް ފޯރުކޮށްދޭން ޖެހޭ އެހީތެރިކަން ފޯރުކޮށްދިނުން ހިމެނޭ ކަމަށް ސީޕީ ވިދާޅުވިއެވެ.

"ފުލުހުންނާއި ސިފައިން ވާރޭވެހެން ފެށޭ ހިސާބަށް ފެން ހިންދުމުގެ މަސައްކަތް ކުރަމުންދާއިރު ފެންބޮޑުވާ ސަރަހައްދުގައި ދިރިއުޅޭ ރައްޔިތުންނަށާއި ވިޔަފާރިކުރާ ތަންތަނަށް ލިބޭ ގެއްލުންތައް ކުޑަކުރުމަށް 24 ގަޑިއިރު ހަރަކާތްތެރިވެ އެހީތެރިކަން ފޯރުކޮށްދެވޭ މިންވަރަށް ސިފައިންނާިއ ފުލުހުން ގާއިމް ކުރެވިގެންދާނެ،" ސީޕީ ވިދާޅުވިއެވެ.

މިއަދުން ފެށިގެން އަނެއްކާވެސް މޫސުން ގޯސްވެ، ބޯކޮށް ވާރޭ ވެހޭނެ ކަމަށް މޫސުމާ ބެހޭ ގައުމީ އިދާރާ އިން ވަނީ ލަފާ ކޮށްފައެވެ.

މެޓް އޮފީހުން ބުނީ ރާއްޖޭގެ އިރުން ހުޅަނގުދެކުނު ބޭ އޮފް ބެންގާލްގައި ކޮޅިގަނޑެއް އުފެދިފައިވާ ކަމަށެވެ. އެ ކޮޅިގަނޑު ހުޅަނގަށް ޖެހި ރާއްޖޭގެ ސަރަހައްދުގައި ބޯ ވިއްސާރަވިލާ އުފެދުމުގެ ފުރުސަތު ބޮޑުވާނެ ކަމަށް ލަފާކުރެވޭ ކަމަށް މެޓުން ބުންޏެވެ.

އެގޮތުން މިއަދުން ފެށިގެން އަންނަ ހޮނިހިރުގެ ނިޔަލަށް ރާއްޖޭގެ ބޮޑު ބަޔަކަށް ވިއްސާރަ ކުރާނެ ކަމަށް ލަފާކުރެވޭ ކަމަށާއި އެ ވިއްސާރައިގައި ބައެއް ރަށްތަކަށް ބޯކޮށް ވާރޭވެހުމާއެކު ގުގުރާނެ ކަމަށް މެޓުން ބުންޏެވެ.

އަދި އާންމުވައި ގަދަވެ ކަނޑުތައް ގަދަވާނެ ކަމަށް ބެލެވޭ ކަމަށާއި ހާއްސަކޮށް އުތުރާއި މެދުރާއްޖެތެރޭގެ ބައެއް ރަށްތަކަށް އުދައިގެ އަސަރުކުރުމުގެ ފުރުސަތު ވެސް އެބައޮތް ކަމަށް މެޓް އޮފީހުން ލަފާކުރެވޭ ކަމަށް މެޓުން ބުނެއެވެ.

ވިއްސާރާގައި ލިބިދާނެ ގެއްލުންތަކުން ރައްކާތެރިވުމަށް ހާއްސަ ފިޔަވަޅުތަކެއް އެޅުމަށް ނޭޝަނަލް ޑިޒާސްޓާ މެނޭޖުމަންޓް އޮތޯރިޓީން ވެސް ވަނީ އިލްތިމާސް ކޮށްފައެވެ. އެގޮތުން ވާރޭވެހި ފެންބޮޑުވެދާނެ ކަމަށް ސަމާލުވެ، ގެއަށް ފެން ނުވަންނާނެހެން ކުރިޔާލައި ގޭގެ ދޮރުމަތީގައި ވެލިބަސްތާ ޖެހުމަށް ވަނީ އިލްތިމާސް ކޮށްފައެވެ. އަދި ވައި ގަދަވާނެ ކަމަށް ސަމާލުވެ ފިޔަވަޅުތައް އެޅުމަށާއި ހާއްސަކޮށް ވައި ގަދަވެ، އެއްލައިލާނެ ފަދަ ތަކެތި ރައްކާތެރި ކުރުމަށް ވަނީ އިލްތިމާސް ކޮށްފައެވެ.

މިއަދު ބޭއްވި ނޫސްވެރިންގެ ބައްދަލުވުމުގައި އެންޑީއެމްއޭގެ ސީއީއޯ ހިސާން ހަސަން ވިދާޅުވީ އާންމުކޮށް ފެންބޮޑުވާ 72 ރަށަކަށް ފެން ހިންދާ ޕަމްޕާއި އެއާ ގުޅޭ ވަސީލަތްތައް ފޯރުކޮށްދެވިފައި ވާނެ ކަމަށެވެ. މީގެ އިތުރުން ފިކްސްޑް ބޭސްޑް ފެން ހިންދާ ނިޒާމެއް ވެސް ރަށްރަށުގައި ގާއިމްކުރެވިފައި ހުންނާނެ ކަމަށް ހިސާން ވިދާޅުވިއެވެ.