އަލްހިޖްރަ ޓެރެވަލް އެންޑް ޓްއާރސް ޕްރައިވެޓް ލިމިޓެޑްގެ ފަރާތުން އުމްރާއަށް މިދިޔަ މަހު ދިޔަ އުމްރާވެރިން މާލެ ނާދެވި މައްކާގައި ތާށިވި މައްސަލާގައި އެ ކުންފުނީގެ ހުއްދަ އިސްލާމިކް މިނިސްޓްރީން ހިފަހައްޓައިފިއެވެ.

އިސްލާމިކް މިނިސްޓްރީން މިއަދު ނެރުނު ބަޔާނެއްގައި ބުނީ ޑިސެންބަރު މަހުގެ އުމްރާ ދަތުރުގައި ހިޖްރަ ގްރޫޕުގެ ފަރާތުން ބައިވެރިވި އުމްރާވެރިން ދެއްކި ފައިސާއިން އުމްރާވެރިންގެ ދެކޮޅު ޓިކެޓް ހަމަނުޖައްސާ އެ ފައިސާ އެ ކުންފުނިގެ އެހެން ކަމަކަށް ބޭނުންކޮށްފައިވާ ކަމަށެވެ.

އެ ކުންފުނީގެ ހަވާލުގައި މައްކާއަށް ދިޔަ އުމްރާވެރިން އެނބުރި ރާއްޖެ ގެނައުމަށްޓަކާ އިސްލާމިކް މިނިސްޓްރީގެ އިރުޝާދުގެ ދަށުން ހައްޖު ކޯޕަރޭޝަނުން އެ މީހުންނާ ވަނީ ހަވާލުވެފައެވެ.

ހިޖްރަ ގްރޫޕަށް އެޅި ފިޔަވަޅުތައް:

  1. އުމްރާއަށް ގެންދިއުމުގެ ހުއްދަ ހިފެހެއްޓުން
  2. އެއް ލައްކަ ރުފިޔާއިން ޖޫރިމަނާކުރުން
  3. ހިޖުރަ ގްރޫޕުގެ ހިއްސާއެއް ހިމެނޭ އެއްވެސް ކުންފުންޏަކަށް އުމްރާއަށް ގެންދިއުމުގެ ހުއްދަ ނުދިނުން
  4. މައްކާގައި ތިބި މީހުން މާލެ ގެނައުމަށް ހިނގާ ޚަރަދު ކުންފުނިން އަނބުރާ ހޯދުން
  5. މައްސަލަ ފުލުހުންނަށް ހުށަހެޅުން

ހިޖްރަ ގްރޫޕުގެ ޑިރެކްޓަރު މުސްތަފާ މުހައްމަދު "ހަތާވީސްއަށް ވިދާޅުވީ އެ ކުންފުނީގެ ހަވާލުގައި އުމްރާއަށް ދިޔައީ 24 ބޭފުޅުންނެވެ. އޭ ތެރެއިން 18 ބޭފުޅުންނަކީ ފައިސާ ދައްކައިގެން ވަޑައިގެންނެވި ބޭފުޅުން ކަމަށާއި ޝެއިހްއަކާ އެކު، ދެން ވަޑައިގެންނެވި ބޭފުޅުންނަކީ އެހީތެރިންގެ ގޮތުގައި ވަޑައިގެންނެވި ބޭފުޅުން ކަމަށެވެވެ.

އެ ގްރޫޕުގެ ހަވާލުގައި އުމްރާއަށް ދިޔަ އުމްރާވެރިންނާ ހައްޖު ކޯޕަރޭޝަނުން ހަވާލުވެފައިވާކަން މުސްތަފާ ކަށަވަރުކޮށްދެއްވިއެވެ.