ކުރީގެ ރައީސް އިބްރާހީމް މުހައްމަދު ސޯލިހްގެ ސަރުކާރުގެ ވެރިކަމުގައި އޭރުގެ އިދިކޮޅު ފަރާތްތަކުން ހިންގި "އިންޑިއާ އައުޓް" ކެމްޕެއިނަކީ ކުރީގެ ރައީސް ޔާމީން ހިންގެވި ކެމްޕެއިނެއް ކަމަށް ފޮރިން މިނިސްޓަރު ޑރ. ހަލީލް ވިދާޅުވެއްޖެއެވެ.

އިންޑިއާ އަށް މިހާރު ކުރައްވާ ރަސްމީ ދަތުރުފުޅުގައި އެގައުމުގެ "ވިއޯން" ނަމަކަށް ކިޔާ ޗެނަލް އަކަށް ދެއްވި އިންޓަވިއުއެއްގައި ވާހަކަދައްކަވަމުން ހަލީލް ވިދާޅުވީ "އިންޑިއާ އައުޓް" ހަރަކާތަކީ ކުރީގެ ރައީސް ޔާމީން ފެއްޓެވި ހަރަކާތެއް ކަމަށާއި އެމަނިކުފާނު ރައީސް ޑރ. މުހައްމަދު މުއިއްޒުގެ ސަރުކާރާ ދުރަށް ވަޑައިގެން އައު ޕާޓީއެއް ހައްދަވައިގެން ސަރުކާރާ ދެކޮޅަށް މަސައްކަތް ކުރައްވަމުން ގެންދަވާ ކަމަށެވެ.

އަދި މިހާރުވެސް އެޕާޓީން އިންޑިއާ އާއި ދެކޮޅަށް ވާހަކަތައް ދައްކަމުން އަންނަކަން ހަލީލް ފާހަގަކުރެއްވިއެވެ.

"އިންޑިއާ އައުޓު ހަރަކާތް ކުރިއަށް ގެންދެވީ ކުރީގެ ރައީސް ޔާމީނު، އެމަނިކުފާނު މިހާރު އެ ހުންނެވީ އަޅުގަނޑުމެންނާ މުޅިން ވަކިވެވަޑައިގެން އަމިއްލަ ޕާޓީއެއް އުފައްދަވައިގެން. އެ ޕާޓީން އެ ހަރަކާތް އަދިވެސް ކުރިއަށް އެބަ ގެންދޭ" ހަލީލް ވިދާޅުވިއެވެ.

އެމަނިކުފާނު ވިދާޅުވީ އެ ހަރަކާތާއި މި ސަރުކާރުން ފެއަށް ޖެހިފައިވާ ކަމަށާއި ރައީސް މުއިއްޒު ބޭނުންފުޅު ވަނީ އިންޑިއާއާއެކު އޮތް ގުޅުން އިތުރަށް ވަރުގަދަ ކުރަން ކަމަށެވެ. އެހެންނަމަވެސް ބައެއް ފަހަރު ޖަޒުބާތުގައި ޖެހި، ސަރުކާރުހެ ތެރޭގައި ތިއްބެވި ބައެއް ފަރާތްތަކުން އިންޑިއާ އަށް ބަދުބަސް ބުނާ ކަމަށާއި އެކަމަކު އެއީ ސަރުކާރުގެ ސިޔާސަތެއް ނޫން ކަމަށް އެމަނިކުފާނު ވިދާޅުވިއެވެ.

އަދި ވިދާޅުވީ އެފަދައިން އަމަލު ކޮށްފައިވާ ފަރާތްތަކަށް ފިޔަވަޅުވެސް އަޅާފައިވާ ކަމަށެވެ.