އަވައްޓެރި އިންޑިއާ އާއެކު ރާއްޖޭގެ ރަށްތަކުގައި މަޝްރޫއުތަކެއް ކުރިޔަށް ގެންދިއުމަށްޓަކައި އެއްބަސްވުންތަކެއްގައި ސޮއިކޮށްފިއެވެ.

މި އެއްބަސްވުންތަކުގައި ސޮއިކޮށްފައި މިވަނީ ފޮރިން މިނިސްޓަރު ހަލީލް މިހާރު އިންޑިއާ އަށް ކުރައްވަމުން ގެންދަވާ ރަސްމީ ދަތުރުފުޅުގެ ތެރެއިންނެވެ. އެމަނިކުފާނު މިއަދު ވަނީ އިންޑިއާގެ އެކްސްޓާނަލް އެފެއާޒު މިނިސްޓަރާއި ބައްދަލުކުރައްވައިފައެވެ.

ފޮރިން މިނިސްޓްރީން ބުނީ އެ ބައްދަލުކުރެއްވުމުގައި ރައީސް ޑރ. މުހައްމަދު މުއިއްޒު 2024 ވަނަ އަހަރުގެ އޮކްޓޫބަރު މަހު އިންޑިއާއަށް ކުރެއްވި ފުރަމާނަ ދަތުރުފުޅުގައި ދެގައުމުގެ ލީޑަރުން އިސްކަންދެއްވާ ދާއިރާތަކާއި، ބެހޭގޮތުން ދެފަރާތުން މަޝްވަރާކުރެއްވި ކަމަށެވެ.

އެއްބަސްވުންތަކުގައި ސޮއި ކުރައްވާފައި ވަނީ، އެ ބައްދަލުވުމުގެ ތެރެއިންނެވެ. ހައި އިމްޕެކްޓް ކޮމިއުނިޓީ ޑިވެލޮޕްމަންޓް ޕްރޮޖެކްޓްސް (އެޗްއައިސީޑީޕީ)ގެ ދަށުން ރާއްޖޭގައި މިހާތަނަށް ގިނަ މަޝްރޫއުތަކެއް ފުރިހަމަކޮށްފައިވެއެވެ. މިފަހަރު ވެސް ސޮއި ކޮށްފައި މިވަނީ އެޗްއައިސީޑީޕީގެ މަޝްރޫއުތަކެއްގައެވެ.

މިއީ ސީދާ ރައްޔިތުންނަށް މަންފާ ހޯދައިދިނުމުގެ މަގްސަދުގައި އިންޑިއާއި ރާއްޖެއާ ދެމެދު އޮންނަ ބަދަހި ގުޅުމުގެ ދަށުން ކުރިއަށް ގެންދާ މަޝްރޫއުތަކެކެވެ. މި މަޝްރޫއުތަކުގެ ސަބަބުން ސީދާ ރައްޔިތުންނަށް އެކަމުގެ ފައިދާ ލިބިގެން ދާނެއެވެ.