ކުރީގެ ރައީސް އިބްރާހީމް މުހައްމަދު ސޯލިހުގެ ސަރުކާރުން ކުރިޔަށް ގެންދިޔަ "ބިންވެރިޔާ ސްކީމާ" ގުޅޭ، ވަގު ލިޔުންތަކެއް ހުށަހެޅި މީހަކަށް ހުޅުމާލެ ދެވަނަ ފިޔަވަހިން ގޯއްޗެއް ހޯދައި އެ ގޯތީގައި ވަށާފާރު ރޭނުމަށް އެޗްޑީސީން ހުއްދަ ދީފައިވާ މައްސަލައާ ގުޅިގެން ފުލުހުން ހިންގަމުން ގެންދާ ތަހުގީގަށް މައުލޫމާތު ހިއްސާ ކުރުމަށް ގާއިމް ކުރި ޕޯޓަލްއިން މިހާތަނަށް 16 މީހަކު މައުލޫމާތު ހިއްސާކޮށްފިއެވެ.

ކުރީ ސަރުކާރުން ކުރިޔަށް ގެންދިޔަ "ބިންވެރިޔާ" އަދި "ގެދޮރުވެރިޔާ" ސްކީމާ ގުޅިގެން ފުލުހުން ކުރިޔަށް ގެންދާ ތަހުގީގަށް ބޭނުން ކުރެވިދާނެ ކަމަށް ބެލެވޭ އެއްވެސް މައުލުމާތެއް ނުވަތަ ހެއްކެއް އޮތް ނަމަ، ހިއްސާކޮށްދިނުމަށް މިމަހުގެ 22ވަނަ ދުވަހު ފުލުހުން ވަނީ އެދިފައެވެ.

ފުލުހުން ބުނީ މިހާތަނަށް 16 މީހަކު އެ ޕޯޓަލް އަށް މައުލޫމާތު ހިއްސާ ކޮށްފައިވާ ކަމަށެވެ. އަދި އޭގެ ތެރެއިން ހަތަރު ފަރާތަކުން ގުޅުންހުރި ލިޔެކިޔުން ހިއްސާ ކޮށްފައިވާ ކަމަށް ވެސް ބުންޏެވެ.

ފުލުހުން މީގެކުރިން ވެސް ބުނީ މައުލޫމާތު ހިއްސާކުރާއިރު، އަމިއްލަ މައުލޫމާތު ހާމަނުކޮށް ވެސް ހުށަހެޅިދާނެ ކަމަށެވެ ނުވަތަ ތަހުގީގު ކުރާ ފަރާތްތަކުން ގުޅަން ބޭނުންވެއްޖެ ހާލަތުގައި ގުޅޭނެ މައުލޫމާތާ އެކު ވެސް ހިއްސާކުރެއްވިދާނެ ކަމަށެވެ.

މި މައްސަލަ ފެންމަތިވުމުން އެޗްޑީސީގެ ޗެއާމަން ފިޔަވައި އެހެން ހުރިހާ ބޯޑު މެންބަރުން ސަސްޕެންޑު ކުރިއެވެ. އަދި ސަސްޕެންޝަނުގައި ހުންނެވުމަށްފަހު އެކުންފުނީގެ މެނޭޖިން ޑިރެކްޓަރަށް ހުންނެވި ފަޒުލް ރަޝީދު ވަނީ މަގާމުން އިސްތިއުފާ ވެސް ދެއްވައިފައެވެ. ވަގު ލިޔުންތަކެއް ހުށަހަޅައިގެން ހުޅުމާލެ ދެވަނަ ފިޔަވަހިން ގޯތި ލިބުނީ ފަޒުލް އެއްބަނޑު އެއްބަފާ ބޭބެ ފަޒީލް ރަޝީދަށެވެ.