ބަލިވެ އިނދެ ކުއްލިއަކަށް މަރު، ހަށިގަނޑާ ހަވާލުވާނެ ބަޔަކު ނެތް!

"ނިދަން އަންނަނީ ދަންވަރު. އަބަދުވެސް އުޅެނީ ހޮނޑުލާތީ އާއި ބަނޑުގައި ރިއްސާތީ. ވެގެން އުޅޭ ގޮތެއް ކިޔައެއް ނުދޭ،" އުމުރުން 25 އަހަރުގެ ކަންޗަން ޑުންގެލް އާއެކު އެއް ކޮޓަރިއެއްގައި އުޅޭ އޭނާގެ އެކުވެރިޔާ "ހަތާވީސް"އަށް ބުންޏެވެ.

އެ އަންހެން މީހާ ބުނި ގޮތުގައި ކަންޗަން މަރުވުމާ ހަމައަށް އުޅުނީ އޭނާއާ އެކު އެއް ކޮޓަރިއެއް ކަމަށާއި އޭނާ ބަލިވެއިންކަން އެނގެއެވެ. ވަރުދެރަވެ، ހޮނޑުލާތީ އެހީތެރިވެ ހެދި ކަމަށް އޭނާ ބުންޏެވެ. މައްޗަންގޮޅި ކެފޭއެއްގައި މަސައްކަތް ކުރާ ނޭޕާލްގެ އެކުވެރިޔާ ބުނީ ކަންޗަންގެ ބަނޑަށް ދެ މަސްވެފައިވާ ކަމަށް މީހުން ބުނެ އުޅުނު ކަމަށާއި ބެލެވޭ ގޮތުގައި ބަނޑަށް ވާނީ މަހެއް ކަމަށެވެ.

"މާލޭގެ އެކި ކެފޭތަކުގައި ކަންޗަން މަސައްކަތްކުރި. އެ ތަންތަނުގެ ނަމެއް ނޭނގޭ،" އެންމެ ފަހުން ކަންޗަން މަސައްކަތް ކުރި ކެފޭ ހުންނަތަން ކިޔައިދެމުން ކަންޗަންގެ އެކުވެރިޔާ ބުންޏެވެ.

ކަންޗަން އުޅެނީ ކައިވެނި ކޮށްގެން ކަމަށާއި ދެ ދަރިން ރަށުގައި ހުރި ކަމަށް އެކުވެރިޔާ ބުންޏެވެ. އަދި ފިރިމީހާ އާއި ދަރިންވެސް އުޅެނީ ނޭޕާލުގައި ކަމަށެވެ. ނަމަވެސް ލޯބީގެ ގޮތުން މާލެއިން މީހަކާ ގުޅިގެން އުޅޭ ކަމަށް ކަންޗަން ބުނެފައިވާ ކަމަށާއި ނަމަވެސް އެ މީހަކީ ކާކުކަން ނޭނގޭ ކަމަށް އެކުވެރިޔާ ބުންޏެވެ. އެއީ ދިވެއްސެއް ކަމެއް އަދި ބޭރު މީހެއްކަމެއް ވެސް ނޭނގޭ ކަމަށް ބުންޏެވެ.

ކަންޗަން މަރުވި ސަބަބެއް އޭނާއަކަށް ނޭނގޭ ކަމަށް ބުންޏެވެ.

"ހަތާވީސް"އިން އެއްކުރި މައުލޫމާތުތަކުން އެނގޭ ގޮތުން ކަންޗަން ވަނީ ފުޑްކޯޓުގައި ކުރިން ހިންގި "ބަނާނާ ކެފޭ އެންޑް ކޭޓަރިން"ގައި މަސައްކަތްކޮށްފައެވެ. އެ ކެފޭ މިހާރު ވަނީ ބަންދުކޮށްފައެވެ. ކަންޗަން އެންމެ ފަހުން މަސައްކަތް ކުރީ ކޯރުކެނޑި ހިނގުމުގައި ހުންނަ މަގްހާ އިޝްރަގް ގައެވެ.

މަރުވިތާ ދެ ހަފްތާ ފަހުން، ތަހުގީގަށް މައުލުމާތު އެއްކުރަނީ

ކަންޗަންގެ މަރުގެ މައްސަލަ މީޑިއާގެ ސަމާލުކަމަށް އައުމާ ގުޅިގެން އޭނާ ކުރިން މަސައްކަތް ކުރި ބައެއް ކެފޭތަކަށް ފުލުހުން ގޮސް މައުލޫމާތު އެއްކުރަން ފަށާފައިވާކަން "ހަތާވީސް"އަށް ވަނީ އެނގިފައެވެ. އެގޮތުން އިއްޔެ ހަވީރު މަގްހާ އިޝްރަގް އެތަނަށް ފުލުހުން ގޮސް، އެތަނުގައި އުޅޭ މީހުންނާއި ސުވާލުކޮށް ހަދާފައިވެއެވެ.

ފުލުހުން އިއްޔެ ބުނީ ނޭޕާލް އަންހެނެއްގެ ހަށިގަނޑާ ހަވާލުވާނެ މީހަކު ނެތުމުން ގަލޮޅު މޯޗަރީގައި އެބަ އޮތް ކަމަށެވެ. ކަންޗަން މަރުވިތާ، 15 ދުވަސް ފަހުން އެ މަރާ ގުޅޭ ވާހަކަތައް އިއްޔެ ފުލުހުން ހާމަ ކޮށްފައި ވަނީ ފުލުހުންގެ މީޑިއާ ވަޓްސްއެޕް ގްރޫޕްގައި "ހަތާވީސް" އިން ކުރި ސުވާލަކާ ގުޅިގެންނެވެ.

ފުލުހުން ބުނީ އެ އަންހެން މީހާއަކީ ބަނޑުގައި ރިއްސާތީ، ހަބަރު ހުސްވެގެން ހޮސްޕިޓަލްގެ އެމެޖެންސީ ރޫމް (އީއާރް)އަށް ގެނައި މީހެއް ކަމަށާއި އޭނާގެ ހަބަރު ހުސްވީ ހޮސްޕިޓަލަށް ގެނައި މަގުމަތީގައި ކަމަށެވެ. އަންހެން މީހާ މަރުވެފައިވާ ކަމުގެ ރިޕޯޓެއް ފުލުހުންނަށް ލިބުނީ ހަމަ އެ ދުވަހު ކަމަށާއި އޭއީ މިދިޔަ މަހުގެ ނުވަ ވަނަ ދުވަހު ކަމަށް ފުލުހުން ބުންޏެވެ.

"ހަތާވީސް"އަށް ލިބިފައިވާ "މަރު ސާބިތުކުރި ކަމުގެ ލިޔުން"އިން އެނގޭ ގޮތުން އޭނާ މަރު ސާބިތުކޮށްފައި ވަނީ މި މަހުގެ ނުވަ ވަނަ ދުވަހު އައިޖީއެމްއެޗުންނެވެ. މިދިޔަ މަހުގެ ނުވަ ވަނަ ދުވަހު ކަމަށް ފުލުހުންނަށް ބުނެވިފައި ވަނީ ލިޔުމުގެ ކުށަކުން ކަމަށް ބެލެވެއެވެ.

ކަންޗަން މަރުވި ސަބަބު ދެނެގަނެވިފައި ނުވާ ކަމަށް މެޑިކޯ-ލީގަލް ރިޕޯޓާ ހަވާލާދީ ފުލުހުން ބުންޏެވެ. އަދި ޖިންސީ އަނިޔާއެއް އޭނާއަށް ލިބިފައިވާކަން އެ ރިޕޯޓުން އެއްވެސް ވަރަކަށް އެނގެން ނެތް ކަމަށެވެ. އޭނާ އަކީ އެނީމިއާ ބަލީގެ ހިސްޓްރީ އޮތް މީހެއް ކަމަށް ފުލުހުން ބުންޏެވެ.

އެނީމިއާގެ އަލާމާތްތަކީ ވަރުބަލިވުމާއި ނޭވާލާން އުނދަގޫވުމެވެ. އެ ބައްޔަކީ ބައެއް ހާލަތްތަކުގައި ސީރިއަސް އަދި ފުރާނައަށް ނުރައްކާތެރި ބައްޔެކެވެ. ހަށިގަނޑުގައި އޮކްސިޖަން އުފައްދާ ސެލްތައް މަދުވުމުން، އެނީމިއާ ބައްޔޭ ބުނެއެވެ.

ކަންޗަންގެ ހަށިގަނޑު މިހާ ދުވަސްވީއިރު، ވެސް މޯޗަރީގައި އޮތީ އޭނާ ރާއްޖެ ގެނައި ފަރާތުން ހަށިގަނޑާއި ހަވާލުވެފައި ނުވާތީ ކަމަށް ފުލުހުން ބުންޏެވެ. އޭނާގެ ހަށިގަނޑު މޯޗަރީއަށް ލާފައި ވަނީ ފުލުހުންގެ ބެލުމުގެ ދަށުންނެވެ.

އިމިގްރޭޝަނުން މައުލޫމާތު ނުލިބޭތީ އޭނާ ރާއްޖެ ގެނައީ ކޮން ބައެއް ކަމާއި ރާއްޖެ އައި ތާރީހެއް އެނގެން ނެތެވެ.

ކަންޗަންގެ މަރުގެ މައްސަލަ މީޑިއާގެ ސަމާލުކަމަށް އައީ އިންޑަނެޝިއާ އަންހެނަކު ރާއްޖޭގައި ރޭޕްކޮށް މަރާލި ކަމަށް ބުނެ، އެނޮނިމަސް އެކައުންޓް، "ހަސަން ކުރުސީ" އިން ފެތުރި ހަބަރަކާ ގުޅިގެންނެވެ.

ނޭޕާން މަސައްކަތްތެރިންގެ މެދުގައި ކަންޗަން މަގުބޫލު

މާލޭގެ އެކި ކެފޭތަކުގައި މަސައްކަތްކުރާ ނޭޕާން މީހުންނާ ވާހަކަ ދައްކާލުމުން އޭނާ މަރުވިކަން ގިނަ މީހުންނަށް އެނގެއެވެ. އަދި މަރުވީ ބަލިވެ އިންދާކަން ވެސް އެނގެއެވެ.

ނޭޕާލް ބައެއް މީހުންނަށް ކަންޗަން އިނގެނީ "ޓިކްޓޮކް" އިން އޭނާ ފެންނާތީ ކަމަށް ބައެއް މަސައްކަތްތެރިން ބުންޏެވެ.

ކަންޗަން މަސައްކަތް ކުރި ކެފޭތަކުގައި ހުރެ ނަގާފައިވާ ވީޑިއޯތަކާއި ރަށުގައި މަންމައާ އެކު ނަގާފައިވާ ފޮޓޯތަކާއި އޭނާގެ ދަރިންގެ ބައެއް ވީޑިއޯތައް ވެސް "ޓިކްޓޮކް"އަށް އަޕްލޯޑްކޮށްފައިވެއެވެ. އަދި މާލޭގެ ސުނާމީ ބިނާ މައިޒާނާއި ރަސްފަންނުގައި ނަގާފައިވާ ވީޑިއޯތަކާއި ޕީޓްރަލް ޕާކު ފަދަ ތަންތަނުގައި އޭނާ ނަގާފައިވާ ފޮޓޯތައް އާންމުކޮށްފައިވެއެވެ.

އޭނާ މަރުވުމުގެ އެއް ދުވަސްކުރިން، މި މަހުގެ އަށް ވަނަ ދުވަހު ނަގާފައިވާ ފޮޓޯއެއް، ލަވަޔަކާ އެކު އޭނާ ވަނީ އާންމުކޮށްފައެޗެ. އެ ފޮޓޯއަކީ ލޮނުޒިޔާރަތްޕާކުގައި ނަގާފައިވާ ފޮޓޯއެއް ކަމަށް ބެލެވެއެވެ.

ކަންޗަން މަރުވީ ދަރި ވައްޓާލަން ބޭސްނެގުމުން ކަމަށް "ޓިކްޓޮކް"ގައި ވާހަކަ ދެކެވުނު ނަމަވެސް، އެއަށް ބާރު ލިބޭ ވާހަކަތަކެއް ހޯދިފައެއް ނުވެއެވެ.