ސަރުކާރުގެ އިސް މަގާމުތަކަށް ބޭފުޅުން އައްޔަން ކުރައްވަނީ ވައްކަން ކުރަން ނުވަތަ ކޮރަޕްޝަން ހިންގާކަށް ނޫން ކަމަށާއި އެފަދަ ކަމެއް ކުރާކަން އެނގިއްޖެ ނަމަ ލަސް ނުކުރައްވާ ފިޔަވަޅު އަޅުއްވާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވެފައި މިވަނީ ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ގެ ތެރޭގައި ކޮރަޕްޝަނަށް މަގުފަހިވާ ގޮތަށް ހިންގާފައިވާ އެތައް ކަމެއް ފެންމަތިވެ، އެތަނުގެ އެމްޑީއަކަށް ކުރިން ހުންނެވި އިބްރާހީމް ފަޒުލް ރަޝީދަށް ބޮޑެތި ތުހުމަތުތަކެއް ކުރެވިފައިވާ ދަނޑިވަޅެއްގައެވެ.

އެކަން ފެންމަތިވުމާއެކު ރައީސް ވަނީ ފަޒުލް ހިމެނޭހެން އެޗްޑީސީ ބޯޑުގެ 10 މެންބަރަކު ސަސްޕެންޑު ކުރައްވައިފައެވެ. އަދި ރޭގެ ވަގުތެއްގައި ފަޒުލް ވަނީ މަގާމުން އިސްތިއުފާ ވެސް ދެއްވައިފައެވެ.

"ސަންގު ޓީވީ" އަށް ދެއްވި އިންޓަވިއުއެއްގައި ރައީސް މުއިއްޒު މިއަދު ވިދާޅުވީ އެމަނިކުފާނު ބޭނުންފުޅުވަނީ މި ސަރުކާރަކީ ކޮރަޕްޝަނުގެ އަމަލުތަކާއި ދުރު ސަރުކާރަކަށް ހެދުން ކަމަށެވެ. އެޗްޑީސީގެ ކަންކަން އެމަނިކުފާނަށް އެނގިވަޑައިގެންނެވި ހިސާބުން އެކަން ބެލުމަށް ފުލުހުންނަށް އެންގެވިން ކަމަށާއި އަދި ފުލުހުންގެ ގާނޫނީ ޒިންމާ މިހާރު އެފަރާތުން އަދާ ކުރައްވަމުން ގެންދަވާ ކަމަށް ރައީސް ވިދާޅުވިއެވެ.

ރައީސް ވިދާޅުވީ ސަރުކާރުގެ އެއްވެސް ދިމާލެއްގައި ގާނޫނާއި ގަވާއިދާ ހިލާފު އެއްވެސް ކަމެއް، އެއްވެސް ބޭފުޅަކު ކުރައްވާކަށް އެމަނިކުފާނު ބޭނުންފުޅު ނުވާ ކަމަށެވެ.

"އަޅުގަނޑު މަގާމުތަކަށް މީހުންލަނީ ވައްކަން ކުރާކަށް ނޫން. ކޮރަޕްޝަން ހިންގާކަށް ނޫން. ގަވާއިދާ ހިލާފު ކަމެއްވެސް ކުރާކަށް ނޫން. އޭގެ ބަދަލުގައި ތެދުވެރިކަމާއި އަމާނާތްތެރި ކަމާއެކީގައި ރައްޔިތުންނަށް ހިދުމަތް ދިނުމަށް [މަގާމުތަކަށް މީހުންލަނީ]،" ރައީސް ވިދާޅުވިއެވެ.

އެއާ އިދިކޮޅަށް އެއްވެސް ފަރާތަކުން މަސައްކަތް ކުރާކަން އެނގިވަޑައިގަންނަވާ ހިސާބުން އެކަމެއް ކުރައްވާ ބޭފުޅަކު އެތަނުން ދުރު ކުރައްވާނެ ކަމަށް ރައީސް ވިދާޅުވިއެވެ. ކުރިޔަށް އޮތް ތަނުގައި ވެސް އެމަނިކުފާނު ކަން ކުރައްވާނީ އެގޮތަށް ކަމަށް ރައީސް ވިދާޅުވިއެވެ.

"މި ސަރުކާރުގެ ތެރެއަކު ކޮރަޕްޝަނަކަށް ޖާގައެއް ނޯންނާނެ. އެއްވެސް ވަރަކަށް ޖާގައެއް ނޯންނާނެ. މިނިސްޓްރީއެއްގައި ވިއަސް ކުންފުންޏެއްގައި ވިއަސް މުއައްސަސާއެއްގެ ތެރޭގައިވެސް ދައުލަތުގެ މުއައްސަސާއެއްގައި ވެސް އެކަހަލަ ކަމެއް ހިނގަންޏާ އަޅުގަނޑު އެދެން އޭސީސީއާ ކަމާބެހޭ ފަރާތްތަކުން އެކަންކަން ބަލަން،" ރައީސް މުއިއްޒު ވިދާޅުވިއެވެ.

އެމަނިކުފާނު ވިދާޅުވީ އަމިއްލަ މަންފާއަށް ކަންކަން ހާސިލް ކުރުމަކީ ޖާގަ ދެއްވާނެ ކަމެއް ނޫން ކަމަށެވެ.