ފުލުހުންގެ އިކޮނަމިކް ކްރައިމް އިންވެސްޓިގޭޝަންގެ ވެރިޔާ، ސުޕްރިޓެންޑެންޓް ރަޖުނީ ޝުއައިބާއި އޭނާގެ އަންހެނުންނަށް ފޯމް ހުށަހެޅުމަކާ ނުލައި، ހުޅުމާލެ ވިނަރެސް ފްލެޓްތަކެއް ހޯދި ކަމަށް ބުނެ، ސޯޝަލް މީޑިއާގައި ކުރާ ތުހުމަތުތައް ސާފުކުރަމުންދާ ކަމަށް ފުލުހުން މިއަދު ބުނެފިއެވެ.

ވިނަރެސް ފްލެޓް ލިބުނު މީހުންގެ ދާއިމީ ލިސްޓުގައި ރަޖުނީގެ ނަން ނެތީސް، އޭނާއަށް ފްލެޓް ދީފައިވާތީ، ނާޖައިފް މަންފާ ރަޖުނީ ހޯދި ކަމަށް ސޯޝަލް މީޑިއާގައި ދަނީ ތުހުމަތު ކުރަމުންނެވެ. ރަޖުނީއަށް ވިނަރެސް ފްލެޓް ދީފައި ވަނީ އޭނާއަށް ކ. އަތޮޅު ރަށަކުން ގޯތިވެސް ލިބިފައިވަނިކޮށެވެ.

"ބިންވެރިޔާ ސްކީމް"ގެ ގޯތި ވައްކަމާއި ދައުލަތުގެ އިދާރާތަކުގެ ކޮރަޕްޝަންގެ މައްސަލަތައް ތަހުގީގުކުރާ ފުލުހުންގެ ޑިޕާޓްމަންޓުގެ ވެރިއަކަށް ހުރެ އެފަދަ ނާޖައިޒް މަންފާއެއް އޭނާ ހޯދާފައިވާނަމަ، ފުލުހުންގެ މުއައްސަސާއަށް ކުރާ އިތުރުބާރު ގެއްލިފައިވާ ކަމަށް ބައެއް މީހުންދަނީ ބުނަމުންނެވެ.

ފުލުހުންގެ ސްޕޯކްސްޕާސަން އެސިސްޓެންޓް ކޮމިޝަނާ އަހުމަދު ޝިފާން "ހަތާވީސް"އަށް މިއަދު ވިދާޅުވީ ރަޖުނީއާ ގުޅިގެން ދެކެވޭ ވާހަކަތައް ފުލުހުން ސާފުކުރަމުންދާ ކަމަށެވެ.

އެކަން ފުލުހުން ބަލަމުންދާއިރު، ރަޖުނީ މަސައްކަތުން އެކަހެރި ކުރުމުގެ ވިސްނުމެއް ނުގެންގުޅެންތޯ ސުވާލު ކުރުމުން ޝިފާން ޖަވާބެއް ނުދެއްވައެވެ. ހަމައެކަނި ވިދާޅުވީ އެކަން ސާފުކުރަމުންދާ ކަމަށެވެ.

އޮޅުވާލައިގެން، ފޯޖުކޮށްފައިވާ "ބިންވެރިޔާ" އެގްރިމެންޓުތަކާއި ގޯތީގެ ރަޖިސްޓްރީތަކެއް ހުށަހަޅައިގެން ހުޅުމާލެ ދެ ވަނަ ފިޔަވަހިން ގޯތި ހޯދަން އުޅުނު މައްސަލާގައި އެޗްޑީސީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދާ އެކު 20 މީހެއްގެ ޕާސްޕޯޓް ވަނީ ހިފަހައްޓާފައެވެ.

ފޯޖުކޮށްފައިވާ އެގްރިމެންޓަކާއި ވަގު ރަޖިސްޓްރީއެއް ހުށަހަޅައިގެން ހުޅުމާލެއިން ހިލޭ ގޯތި ހޯދަން އުޅުނު ކަމުގެ ތުހުމަތު ކުރެވެނީ ފަޒުލްގެ އެއްބަނޑުއެއްބަފާ، ބޭބެ، ފަޒީލް ރަޝީދަށެވެ. ފަޒީލަކީ އެމްޑަބްލިއުއެސްސީގެ ޑެޕިއުޓީ މެނޭޖިން ޑިރެކްޓަރެވެ. އޭނާ ވަނީ އެ ކުންފުނިން ސަސްޕެންޑްކޮށްފައެވެ.