ވަގު ލިޔެކިޔުންތަކެއް ހުށަހަޅައިގެން، ހުޅުމާލެ ދެ ވަނަ ފިޔަވަހިން ހިލޭ ގޯތި ހޯދަން އުޅުނު މައްސަލާގައި ކުރީގެ ރައީސް އިބްރާހީމް މުހައްމަދު ސޯލިހުގެ ސަރުކާރުގައި ހައުސިން މިނިސްޓްރީގެ ސްޓޭޓް މިނިސްޓަރަކަށް ހުންނެވި އަކްރަމް ކަމާލުއްދީނުގެ ނަން ގެންނަވައި، މައްސަލައިގެ މިސްރާބު ބަދަލުކޮށްފިއެވެ.

ފުލުހުން އިއްޔެ ވަނީ އެ މައްސަލައާ ގުޅިގެން ފުލުހުން ތަހުގީގު ފަށާފައިވާ ކަމަށް ބުނެފައެވެ. ފުލުހުން ބުނީ އެ ތަހުގީގުގައި ބަލަނީ ޑޮކިއުމެންޓު ފޯޖު ކޮށްފައިވާ ކަމަށް ތުހުމަތުކުރެވޭ މައްސަލައެއް ކަމަށެވެ. އަދި ބުނީ އެ ތަހުގީގަކީ ފުލުހުންނަށް ލިބިފައިވާ މައުލޫމާތަކާ ގުޅިގެން ފުލުހުން އިސްވެ ފަށާފައިވާ ތަހުގީގެއް ކަމަށެވެ.

މައްސަލައިގެ އިތުރު ތަފްސީލް ހިއްސާ ކުރުމަށް މިރޭ އިސްކަންދަރު ކޮށީގައި ފުލުހުން ބޭއްވި ނޫސްވެރިންގެ ބައްދަލުވުމެއްގައި ސެންޓްރަލް އިންވެސްޓިގޭޝަން ކޮމާންޑްގެ ހެޑް އެސިސްޓެންޓް ކޮމިޝަނަރު އޮފް ޕޮލިސް ޝަރީފް ވިދާޅުވީ އެ މައްސަލާގައި ބައެއް ފަރާތްތަކާއެކު ސުވާލުކޮށްފައިވާ ކަމަށެވެ. އަދި މައްސަލައިގެ ތަހުގީގުގައި ސުވާލުކުރި އެއް ފަރާތުން ދެއްކި ވާހަކަތައް ވެސް ކޮންމެވެސް ވަރަކަށް ޝަރީފް ނޫސްވެރިންނާއި ހިއްސާ ކުރެއްވިއެވެ.

ފުލުހުން މިރޭ ބޭއްވި ނޫސްވެރިންގެ ބައްދަލުވުމުގެ ތެރެއިން: ހަތާވީސް ފޮޓޯ | ހުސައިން ހަސަން

އެގޮތުން އެމީހާ އަކީ ކުރީ ސަރުކާރުން އިއުލާންކުރި ބިންވެރިޔާ ސްކީމުން ގޯތި ހޯދުމަށް އެދުނު ފަރާތެއް ކަމަށާއި އަދި ގޯއްޗަށް ޝަރުތު ހަމަ ނުވާތީ، އެކަމުގައި ޝަކުވާ ވެސް ހުށަހެޅި ކަމަށް ތަހުގީގުގައި އޭނާއާ ސުވާލުކުރުމުން ބުނި ކަމަށް ޝަރީފް ވިދާޅުވިއެވެ. އަދި ވިދާޅުވީ އެމީހާ ކުރީ ސަރުކާރުގެ ހައުސިން މިނިސްޓްރީގެ އިސްވެރިޔަކާއި ބައްދަލުކޮށް އެކަމުގެ ކަންބޮޑުވުންތައް ހިއްސާ ކޮށްފައިވާ ކަމަށް ތަހުގީގުގައި ކިޔައި ދީފައިވާ ކަމަށެވެ.

ޝަރީފް އެ ވާހަކަތައް ވިދާޅުވުމުން "ހަތާވީސް" އިން ވަނީ ފޯޖު ކޮށްފައިވާ ލިޔުމެއް އެފަރާތަށް ދިނީ ކުރީ ސަރުކާރުންތޯ ސުވާލު ކޮށްފައެވެ. އަދި އެހެން ބައެއް ނޫސްވެރިން ވެސް ވަނީ އެ ވާހަކަތައް ތަހުގީގަށް ކިޔައި ދިނީ ކޮން ފަރާތަކުންތޯ ސުވާލުކޮށްފައެވެ. އަދި އޭނާ ބައްދަލުކުރި ހައުސިން މިނިސްޓްރީގެ އިސްވެރިޔަކީ ކާކުތޯ ވެސް ސުވާލުކުރިއެވެ.

ޝަރީފް ވިދާޅުވީ ތަހުގީގަށް އެ ވާހަކަތައް ކިޔައި ދިނީ މި މައްސަލާގައި ހިމެނޭ އެމްޑަބްލިއުއެސްސީގެ ޑެޕިއުޓީ މެނޭޖިން ޑިރެކްޓަރު މުހައްމަދު ފަޒީލް ރަޝީދު ކަމަށެވެ. އަދި ފަޒީލް ބައްދަލުކުރެއްވި އޭރުގެ ހައުސިން މިނިސްޓްރީގެ އިސްވެރިޔަކީ ކުރީގެ ސްޓޭޓް މިނިސްޓަރު އަކްރަމް ކަމާލުއްދީން ކަމަށް ޝަރީފް ވިދާޅުވިއެވެ.

އެމްޑަބްލިއުއެސްސީގެ ޑެޕިއުޓީ މެނޭޖިން ޑިރެކްޓަރު މުހައްމަދު ފަޒީލް ރަޝީދު-- ފޮޓޯ/ އެމްޑަބްލިއުއެސްސީ

"ބިންވެރިޔާ ސްކީމު"ގެ ދަށުން ފަޒީލު ގޯއްޗަށް ޝަރުތު ހަމަނުވާ ކަމަށް ކަނޑައަޅާފައިވަނިކޮށް، އެޗްޑީސީއަށް ވަގު ލިޔެކިޔުންތަކެއް ހުށަހަޅައިގެން ހުޅުމާލެ ދެ ވަނަ ފިޔަވަހިން ގޯތި ހޯދަން އުޅުނު މައްސަލަ ފެންމަތިވީ ސޯޝަލް މީޑިއާމެދުވެރިކޮށެވެ.

ޝަރީފް ވިދާޅުވީ ފުލުހުން މަސައްކަތް ކުރަމުން އަންނަނީ ފޯޖު ކޮށްފައިވާ ކަމަށް ބުނާ ލިޔުންތަކަކީ ސައްހަ ލިޔުންތަކެއްތޯ ނުވަތަ ނޫންތޯ ބެލުމުގެ މަސައްކަތް ކަމަށެވެ. ތަހުގީގު ފެށިތާ 24 ގަޑިއިރުވެފައިވާއިރު އެކަމުގައި ގިނަ ހެކިތަކެއް މިހާތަނަށް ލިބިފައިވާ ކަމަށާއި އެހެންނަމަވެސް އަދި އެއްވެސް ފަރާތަކަށް ތުހުމަތު ނުކުރާ ކަމަށް ޝަރީފް ވިދާޅުވިއެވެ.

އެ މައްސަލާގައި ޝާމިލުވާ ފަރާތްތަކުގެ ޕާސްޕޯޓު ނުހިފަހައްޓަނީ ކީއްވެތޯ ސުވާލު ކުރުމުން ޝަރީފް އެންމެ ފުރަތަމަ ވިދާޅުވީ ޕާސްޕޯޓު ހިފަހައްޓަން ޖެހިއްޖެ ހާލަތެއް އަތުވެއްޖެ ނަމަ އެކަން ކުރާނެ ކަމަށެވެ. ތަކުރާރުކޮށް އެ ސުވާލު ނޫސްވެރިން ސުވާލު ކުރުމުން ވެސް ޝަރީފް ދެއްވީ އެ ޖަވާބެވެ.

އެކަމަކު ނޫސްވެރިންގެ ބައްދަލުވުން ނިންމާލުމަށްފަހު ނޫސްވެރިންނާއި ވާހަކަދައްކަވަމުން ޝަރީފް ވަނީ ޕާސްޕޯޓު ހިފެހެއްޓުމަށްޓަކައި ކޯޓަށް ލިޔެކިއުންތައް ހުށަހެޅުމުގެ މަސައްކަތް ފުލުހުން ކުރަމުން އަންނަ ކަމަށާއި މައްސަލާގައި ޝާމިލުވާ ފަރާތްތަކުގެ ޕާސްޕޯޓު ހިފަހައްޓާނެ ކަމަށް ވިދާޅުވެފައެވެ.