ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ގެ ގޯތި ވައްކަމާއި ގުޅިގެން އެކުންފުނީގެ އިސް މުވައްޒަފުންތަކެއް ވެސް ސަސްޕެންޑުކޮށްފިއެވެ.

އެ ކުންފުނީގެ އިސް މުވައްޒަފުންތަކެއް ސަސްޕެންޑު ކޮށްފައިވާއިރު، ހަމަ އެ މައްސަލައާ ގުޅިގެން އެޗްޑީސީގެ ޗެއާމަން އަހުމަދު ނާސިފް ފިޔަވައި، އެ ބޯޑުގައި ހިމެނޭ 10 މެމްބަރުން ވެސް ވަނީ ސަސްޕެންޑު ކޮށްފައެވެ.

ސަސްޕެންޑުކުރި އިސް މުވައްޒަފުންގެ ތެރޭގައި ހިމެނެނީ އައިޓީ ކޮންސަލްޓެންޓް ޝުހޫދާއި ޗީފް ފައިނޭންޝަލް އޮފިސަރު ފާއިދާއި ޗީފް ބިޒްނަސް އޮފިސަރު އަދި މީޑިއާ ޑިޕާޓްމެންޓްގެ ހެޑް އަހުމަދު ޔާމީން އަދި ރިއަލްއެސްޓޭޓް ޑެޕިއުޓީ ޑިރެކްޓަރު އަހުމަދު އައިމަންއެވެ.

މީގެތެރޭގައި ހިމެނޭ ޝުހޫދު އަކީ 2019ވަނަ އަހަރު އައިޖީއެމްއެޗްގެ ކޮންސަލްޓެންޓްގެ ގޮތުގައި ހުރެ އާންމުންގެ ޒާތީ މައުލޫމާތުތަކެއް ވިއްކި ކަމަށް ތުހުމަތުވި މީހެކެވެ. އޭނާގެ މައްސަލަ މީގެކުރިން ވެސް ފުލުހުން ބަލާފައިވެއެވެ.

މީގެއިތުރުން މިހާރު ޗީފް ފައިނޭންޝިއަލް އޮފިސަރުގެ މަގާމުގައި ހުންނެވި ފާއިދަކީ އެ މަގާމަށް އޭނާގެ ޝަރުތު ހަމަނުވާ މައްސަލައެއް ފެންމަތިވެފައިވާ މީހެކެވެ. އޭނާ އެޗްޑީސީއާ ގުޅުނީ ކުރީގެ ރައީސް އިބްރާހީމް މުހައްމަދު ސޯލިހުގެ ވެރިކަމުގައެވެ.

ޔާމީނަކީ ކުރީގެ ރައީސް ޔާމީންގެ ވެރިކަމުގައި އެމްޑަބްލިއުއެސްސީގެ މެނޭޖިން ޑިރެކްޓަރަކަށް ފަޒުލް ހުންނެވިއިރު އެކުންފުނީގެ އިސް އެކި މަގާމުތައް ފުރުއްވި މީހެކެވެ.

އާންމުވެފައިވާ އެޗްޑީސީގެ ލިޔެކިޔުންތަކުން އެނގޭ ގޮތުން ހުޅުމާލެ ދެ ވަނަ ފިޔަވަހިން ގޯތި ހޯދަން އުޅެފައި ވަނީ ބިންވެރިޔާ ސްކީމުގެ ދަށުން ގޯތި ލިބުނު ފަރާތްތަކުގެ އެއްބަސްވުންތައް ފޯޖުކޮށްގެންނެވެ. އަދި އެ ގޯތިތައް ދޫކުރުމަށް އެދި އެޗްޑީސީން ހައުސިން މިނިސްޓްރީއަށް އެދި ހުށަހެޅުމުން އެޗްޑީސީން އެދުނު ފަރާތްތަކަކީ ބިންވެރިޔާ ސްކީމުގެ ދަށުން ގޯތި ލިބިފައިވާ ފަރާތެއް ނޫންކަން އެނގިފައިވެއެވެ.

އެޗްޑީސީން ގޯތި ދޭން މަސައްކަތްކޮށްފައި ވަނީ ފަޒުލްގެ އެއްބަނޑުއެއްބަފާ ބޭބެ، އަދި އެމްޑަބްލިއުއެސްސީގެ ޑެޕިއުޓީ މެނޭޖިން ޑިރެކްޓަރު މުހައްމަދު ފަޒީލު ރަޝީދަށެވެ. މިވަގުތު ފަޒީލް ވެސް ހުންނެވީ ސަސްޕެންޑު ކޮށްފައެވެ.