އެޗްޑީސީގެ ތެރެއިން ފެންމަތިވި "ގޯތި ވައްކަމުގެ" ތަހުގީގު އަވަސްކޮށް، ކޮންމެ ހަފްތާއަކު އެއް ފަހަރު އެކަން ހިނގާގޮތް ޙިއްޞާކުރަމުން ގެންދިއުމަށް ޕްރޮސެކިއުޓަރު ޖެނަރަލް (ޕީޖީ) ޢައްބާސް ޝަރީފު އަމުރު ކުރައްވައިފިއެވެ.

ޕީޖީ އޮފީހުން މިއަދު ނެރުނު ބަޔާނެއްގައި ބުނީ ސަރުކާރުން ހިންގާ "ބިންވެރިޔާ'' އަދި ''ގެދޮރުވެރިޔާ'' ސްކީމަށް އެދި ފޯމު ބަލައިގަތުމުގައާއި ގޯއްޗާއި، ފްލެޓް ލިބޭ ފަރާތްތައް ކަނޑައެޅުމުގައި އަދި ގޯއްޗާއި ފްލެޓް ދޫކުރުމުގައި، ކަނޑައެޅިފައިވާ އުޞޫލުތަކާއި ގަވާއިދުތަކާ ޚިލާފަށް ޢަމަލުކޮށްފައިވުމުގެ ކަންބޮޑުވުން ލިބިފައިވާ ކަމަށެވެ.

އެކަމަކީ ޢާންމު މަސްލަޙަތު މަތީ މިންވަރަކަށް އެކުލެވޭ ކަމަކަށްވާތީ، މިއީ ފުރިހަމަ ޖިނާއީ ތަޙުޤީޤެއް ހިންގަންޖެހޭ ކަމެއް ކަމަށް ޕީޖީ ދެކެވަޑައިގަންނަވާ ކަމަށާއި ޤާނޫނުއަސާސީ އާއި ޕީޖީއަށް ލިބޭ ބާރުގެ ދަށުން، އެކަމާ ގުޅޭ ފުރިހަމަ ޖިނާއީ ތަޙުޤީޤެއް ހިންގުމަށްފަހު ޕީޖީ އަމުރު ކުރައްވާފައިވާ ކަމަށެވެ.

ގޯތި ވައްކަމުގައި އެއްވެސް މީހެއްގެ މައްޗަށް ޖިނާއީ ތުހުމަތެއް ކުރެވޭނެމަ، އެކަން ތަޙުޤީޤުކުރުމަށްފަހު ދަޢުވާކުރުމަށްޓަކައި ހުށަހެޅުމަށް، ފުލުހުންނަށާއި އެންޓި ކޮރަޕްޝަން ކޮމިޝަން (އޭސީސީ)ގެ މައްޗަށް ޕީޖީ އަމުރުކުރައްވާފައިވެއެވެ.

ވަގު ލިޔެކިޔުންތަކެއް ހުށަހަޅައިގެން، ހުޅުމާލެ ދެ ވަނަ ފިޔަވަހިން ހިލޭ ގޯތި ހޯދަން އުޅުނު މައްސަލައާ ގުޅިގެން، އެމްޑަބްލިއުއެސްސީގެ ޑެޕިއުޓީ މެނޭޖިން ޑިރެކްޓަރު މުހައްމަދު ފަޒީލް ރަޝީދު މިއަދު ވަނީ ސަސްޕެންޑްކޮށްފައެވެ. ފަޒީލަކީ އެޗްޑީސީގެ މެނޭޖިން ޑިރެކްޓަރު އިބްރާޙިމް ފަޒުލް ރަޝީދުގެ އެއްބަނޑުއެއްބަފާ ބޭބެއެވެ.

ވަގު ލިޔުންތަކެއް ހުށަހަޅައިގެން އެއް ބިމަކަށް ދެ ބޭފުޅަކު ކުރިމަތިލައްވާފައިވާކަން އެނގިހުރެ، ވޭތުވެދިޔަ ހަ މަސް ދުވަހު އެކަން ސިއްރު ކުރައްވައި، ފުލުހުންނަށް ހުށަނާޅުއްވައި ހުންނެވުމުން، ފަޒުލް މަސައްކަތް ކުރެއްވީ ބޭބެގެ މަސްލަހަތު ހިމާޔަތް ކުރެއްވުމަށް ކަމަށް ބެލުމުގެ ޖާގަ އެބަ އޮތެވެ.

އެ މައްސަލައާ ގުޅިގެން ފުލުހުން އިއްޔެ ވަނީ އެޗްޑީސީއަށް ވަދެ، އެތަން ބަލައިފާސްކޮށްފައެވެ.

ކޮރަޕްޝަންގެ މި މައްސަލައާ ގުޅިގެން، އެޗްޑީސީގެ މެނޭޖިން ޑިރެކްޓަރުގެ މަގާމުން ފަޒުލްއާ އެކު އެ ކުންފުނީގެ ބޯޑުގެ 10 މެމްބަރަކު ވަނީ ސަސްޕެންޑްކޮށްފައެވެ. އެ ބޯޑުގައި މިހާރު އިންނެވީ އެޗްޑީސީގެ ޗެއާމަން އަހުމަދު ނާސިފް އެކަންޏެވެ.