ސައްހަ ނޫން އެއްބަސްވުމެއް ހަދައިގެން، ބިންވެރިޔާ ސްކީމްގެ ދަށުން ހުޅުމާލެއިން ގޯތި ހޯދަން އުޅުނު މައްސަލާގައި އެޗްޑީސީގެ މެނޭޖިން ޑިރެކްޓަރު ފަޒުލް ރަޝީދުގެ ބޭބެ މުހައްމަދު ފަޒީލް ރަޝީދުގެ ބައިވެރިވުން އޮތް ނަމަވެސް ތަނާޒުލް ނުވާނެ ކަމަށް ފަޒުލް ވިދާޅުވެއްޖެއެވެ.

ބިންވެރިޔާ ސްކީމުގެ ބޭރުން ހުޅުމާލެ އިން "ވަގަށް" އެޗްޑީސީން ގޯތިތަކެއް ދޫކުރި މައްސަލައެއް ފެންމަތިވެ، އެ މައްސަލަ ފުލުހުން އަންނަނީ ބަލަމުންނެވެ.

ސޯޝަލް މީޑިއާގައި އާންމުވެފައިވާ ސިޓީގައިވާ ގޮތުން ބިންވެރިޔާ ސްކީމުގެ ދަށުން ގޯއްޗަށް ޝަރުތު ހަމަނުވާ ބަޔަކަށް ހުޅުމާލެ އިން ގޯތިތަކެއް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ދޫކޮށްފައި ވަނިކޮށް، އޭގެ ތެރެއިން ދެ ބިމެއްގެ އިންފާރު ރޭނުމުގެ ހުއްދަ އަށް ހައުސިން މިނިސްޓްރީގައި ވަނީ އެދިފަ އެވެ. ނަމަވެސް އެއީ އެ ސްކީމުގައި ހިމެނޭ ގޯތިތަކެއް ނޫން ކަން ހައުސިން މިނިސްޓްރީން ވަނީ އަންގައިފައެވެ.

އެ މައްސަލާގައި އާއްމުންގެ ގިނަ ބައެއްގެ ފާޑު ކިޔުންތައް އެޗްޑީސީ އަށް އަމާޒުވެފައި ވަނިކޮށް މިރޭ ފަޒުލް ވަނީ ނޫސްވެރިންނާއި ބައްދަލު ކުރައްވައިފައެވެ.

ފަޒުލް ވިދާޅުވީ ސައްހަ ނޫން އެއްބަސްވުމެއް ހަދައިގެން، ބިންވެރިޔާ ސްކީމްގެ ދަށުން ހުޅުމާލެއިން ގޯތި ހޯދަން އުޅުނުކަން ހައުސިން މިނިސްޓްރީގެ ސަމާލުކަމަށް އެންމެ ފުރަތަމަ ގެނައީ އެ ކުންފުނިން ކަމަށެވެ. އަދި އެ މައްސަލަ ފާހަގަވި ހިސާބުން އެކަން ހައުސިން މިނިސްޓްރީ އަށް އެންގީ މައްސަލާގައި އެއްވެސް ކަމެއް ފޮރުވަން ބޭނުން ނުވާތީ ކަމަށް އޭނާ ވިދާޅުވިއެވެ.

"އަޅުގަނޑު މިކަން ބަލަން ބޭނުންވާ ކަމުގެ ޔަގީންކަމެއް ނޫންތޯ ތި ވިދާޅުވިކަން ފާހަގަވެގެން މި އަންނަނީ، އަޅުގަނޑުގެ ލޭ ހިނގާ އަޅުގަނޑުގެ ކޮއްކޮއެއް ނޫން އަޅުގަނޑުގެ ބޭބެގެ ވާހަކަ ތި ފާހަގަކުރައްވަނީ. ވަކި އާއިލާ ގުޅުމެއް ނުބަލާ މިކަން އަޅުގަނޑު ޔަގީން ކުރުމުގެ ގޮތުންތާ އަޅުގަނޑުމެން މި ޕްރޮސެސް އިނީޝިއޭޓު ކޮށްގެން އަޅުގަނޑުމެން މި ގެންދިޔައީ. މިއަކު ނެތް ސާފު ނުވާން ޖެހޭ މައުލޫމާތެއް. އަދި ވަޒީފާގެ ދެމި ހުރުމަށްޓަކައި އަޅުގަނޑު ކުރާ މަސައްކަތެއް ނޫން މިއީއެއް،" ފަޒުލް ވިދާޅުވިއެވެ.

ފަޒުލް ވިދާޅުވީ ސޯޝަލް މީޑިއާގައި ދައުރުވާ ލިޔެކިއުންތަކަކީ މައްސަލަތަކެއް އުޅޭތީ ހައުސިން މިނިސްޓްރީން އެޗްޑީސީ އަށް ފޮނުވާފައިވާ ލިޔެކިއުންތަކެއް ކަމަށެވެ. ފަޒުލް ވިދާޅުވީ ހައުސިން މިނިސްޓްރީން ނާންގާ ފަރާތަކަށް އެޗްޑީސީން އެއްވެސް ފަރާތަކަށް އެއްވެސް ބިމެއް ހަވާލު ކޮށްފައި ނުވާނެ ކަމަށެވެ.

"އަޅުގަނޑުގެ ކޮންފްލިކްޓް އޮފް އިންޓްރެސްޓެއް މިއަކު ނުވޭ. ނުވާކަމުގެ ޔަގީންކަމެއް ދެއްތޯ އަޅުގަނޑު މި ދެންނެވީ މިކަން އަޅުގަނޑުމެން އިނީޝިއޭޓު ކޮށްފައި އޮތްކަން. އެއީ އަޅުގަނޑަކަށް ދަންނަވާކަށް ނޭނގޭ ސައްހަ ލިޔުމެއްތޯ ސައްހަ ނޫން ލިޔުމެއްތޯ ވެސް،" ފަޒުލް ވިދާޅުވިއެވެ.

ތަކުރާރުކޮށް ނޫސްވެރިންގެ ބައްދަލުވުމުގައި ފަޒުލް އެއް ވާހަކައެއް ވިދާޅުވަމުން ގެންދެވިއެވެ. މައްސަލަ ފާހަގަވެގެން އެ މައްސަލަ ނެގީ އެޗްޑީސީގެ ފަރާތުން ކަމަށެވެ. އަދި އޭނާގެ ބައިވެރިވުން އެކަމުގައި ނެތް ކަމަށް ވެސް ވިދާޅުވިއެވެ. އަދި އޭނާގެ ޒިންމާއާ ކުންފުނީގެ ޒިންމާ ވަރަށް ފުރިހަމަ އަށް އަދާކޮށްފައި ވާނެ ކަމަށްވެސް ވިދާޅުވިއެވެ.

"އެހެންވީމާ އަޅުގަނޑު މިތާ ހުރުމަކުން ނެތް ނެތުމަކުން ނެތް މިއަކަށް ހުރަހެއް ނާންނާނެ،" ފަޒުލް ވިދާޅުވިއެވެ.

އާންމުވެފައިވާ ސިޓީގައިވާ ގޮތުން ގޯތީގައި ފާރު ރޭނުމުގެ ހުއްދަ އަށް އެދިފައިވަނީ އެޗްޑީސީގެ މެނޭޖިން ޑިރެކްޓަރު ފަޒުލް ރަޝީދުގެ ބޭބެ މުހައްމަދު ފަޒީލް ރަޝީދާއި އަބްދުލްމަޖީދު މާހިރު ކިޔާ މީހެކެވެ. ނަމަވެސް ހައުސިން މިނިސްޓްރީގެ ސިޓީގައިވާ ގޮތުން އެ ދެ ފަރާތަކީ ބިންވެރިޔާ ސްކީމްގެ ދަށުން ގޯއްޗަށް އެދުނު ފަރާތްތަކެއް ނޫނެވެ.