މޯލްޑިވްސް މީޑިއާ ކައުންސިލް (އެމްއެމްސީ)ގެ ރައީސް ކަމުގެ މަގާމަށް ހުސައިން ޝަގީފް އިންތިހާބު ކޮށްފިއެވެ.

މީޑިއާ ކައުންސިލްގެ ރައީސާއި ނާއިބު ރައީސް އިންތިހާބު ކުރަނީ، އެ ކައުންސިލްގެ މެންބަރުންގެ މެދުގައި ނެގޭ ސިއްރު ވޯޓަކުންނެވެ. "ތިލަދުން" ނޫހުގެ ފަރާތުން އެމްއެމްސީ އަށް އިންތިހާބުވެވަޑައިގެންނެވި ޝަގީފް އާއެކު ދެން ރައީސް ކަމަށް ވާދަކުރެއްވީ "މިހާރު" ނޫހުގެ ފަރާތުން ކައުންސިލަށް އިންތިހާބުވެވަޑައިގެންފައިވާ ފާތިމަތު ޝަނާއެވެ.

އެ ވޯޓުގެ ނަތީޖާ ދައްކާ ގޮތުން ޝަގީފަށް 8 ވޯޓު ލިބިވަޑައިގެންނެވިއިރު ޝަނާ އަށް ލިބިވަޑައިގަތީ ހަތް ވޯޓެވެ. އެ ކައުންސިލްގެ ނާއިބު ރައީސަކަށް އިންތިހާބުވެވަޑައިގަތީ އިބްރާހީމް މުހައްމަދެވެ. އޭނާއާއެކު ނާއިބު ރައީސްގެ މަގާމަށް އިބްރާހީމް ފައުޒީ ވާދަކުރެއްވިއެވެ. އޭނާ އަށް ލިބިވަޑައިގަތީ ހަތަރު ވޯޓެވެ.

މީގެ ދެއަހަރު ކުރިން އިންތިހާބުވި އެމްއެމްސީ މެންބަރުންގެ ދައުރު ހަމަވާތީ މިމަހުގެ ހަތްވަނަ ދުވަހު އެމްއެމްސީ އަށް 10 މެންބަރުން އިންތިހާބު ކޮށްފައިވެއެވެ.

މީޑިއާތަކުން އިންތިހާބުވި މެންބަރުން

1. ފާތިމަތު ޝަނާ މުހައްމަދު - މިހާރު

2. ނަޖާހު މަސްއޫދު - ވަގުތު

3. ހުސައިން ހަސަން - ހަތާވީސް އޮންލައިން

4. ނަހުދާ ފާއިޒު - ދިޔަރެސް

5. ހަސަން ޝާކިރު - އާފަތިސް

6. ހަފްސީ - ހަފްސީ ޑޮޓް ކޮމް

7. ހުސައިން ޝަގީފު - ތިލަދުން

އާންމުންގެ ތެރެއިން އިންތިހާބު މެންބަރުން

1. ފާތިމަތު ފަހުމީ، ސީނަރީ ގދ. މަޑަވެލި

2. އިބްރާހިމް ފައުޒީ، ހުޅުމާލެ، ފްލެޓް ނަންބަރު 04-1-73

3. އިބްރާހީމް މުހައްމަދު، ގ. ވިންޑް، މާލެ