މޯލްޑިވްސް އިސްލާމިކް ބޭންކް (އެމްއައިބީ) އަށް 4.1 މިލިއަން ރުފިޔާ ތިން މަސް ތެރޭގައި ދައްކަން ކުރީގެ ބަންޑާރަ ނައިބު އާއިޝަތު އާޒިމާ ޝަކޫރުގެ މައްޗަށް ސިވިލް ކޯޓުން އަނެއްކާވެސް ހުކުމްކޮށްފި އެވެ.

އެމްއައިބީ އިން އާޒިމާ ނެންގެވި ލޯނަކަށް ފައިސާ ނުދައްކާ ކަމަށް ބުނެ 4.1 މިލިއަން ރުފިޔާ އެ ބޭންކަށް ދައްކަން ސިވިލް ކޯޓުން މި އަހަރުގެ ކުރީކޮޅު ހުކުމްކުރީ އޭނާގެ ޣައިރު ހާޒިރުގަ އެވެ.

އެ ހުކުމް މުރާޖައާ ކުރަން އާޒިމާގެ ފަރާތުން ސިވިލް ކޯޓަށް އޮތީ ހުށަހެޅުމުން ކުރީގެ ހުކުމް ކޯޓުން ބާތިލްކުރި ނަމަވެސް ލޯނުގެ އެއްބަސްވުމާ އެއްގޮތަށް އާޒިމާ ފައިސާ ދައްކާފައި ނުވާ ކަން ސާބިތުވާ ކަމަށް ސިވިލް ކޯޓުން އިއްޔެ ކަނޑައެޅި އެވެ.

އިއްޔެގެ ނިޔަލަށް ފެސިލިޓީ އަށް ދައްކަން ޖެހި އެކަމަކު މިހާތަނަށް ނުދައްކާ ފައިސާގެ އަދަދު 4،282،514ރ. އަށް އަރަ އެވެ. ޗެރިޓީއަށް އަރާފައިވާ 266،512ރ. އަކީ އާޒިމާ ދައްކަން ޖެހޭ ފައިސާ ކަމަށް ސިވިލް ކޯޓުން ވަނީ ކަނޑައަޅައިފަ އެވެ.

އެހެންވެ, ކުރިއަށް އޮތް ތިން މަސް ތެރޭގައި އެ ފައިސާ ދައްކައި ނިންމަން އެ ހުކުމުގައި އަންގާފައިވެ އެވެ.