ދައުލަތުން އެކި ފަރާތްތަކަށް ބަދަލުގެ ގޮތުގައި ކުރީގެ ސަރުކާރުން ދީފައިވާ ފައިސާ އަނބުރާ ދައުލަތަށް ހޯއްދުމަށާއި އެ ބަދަލު ދިނުމުގައި ކުރީގެ ރައީސް އިބްރާހިމް މުހައްމަދު ސާލިހު ބައިވެރިވެފައިވާ ކަމަށް ބުނެ، އެމަނިކުފާނާއި ކުރީ ސަރުކާރުގެ ވެރިންގެ މައްޗަށް ޖިނާއީ ތަހުގީގު ހިންގުމަށް މާލިއްޔަތު ކޮމެޓީން މަޖިލީހަށް ހުށަހެޅި ރިޕޯޓާ އެކު މަޖިލީހުގައި ހޫނު ބަހުސެއް މިއަދުކޮށްފިއެވެ.

ރައްޔިތުންގެ މަޖިލީހުގެ މިއަދުގެ ޖަލްސާއަށް މާލިއްޔަތު ކޮމެޓީގެ ރިޕޯޓް ހުށަހަޅުއްވަމުން އެ ކޮމެޓީގެ ނައިބު މުގައްރިރު، މުހައްމަދު ނާޒިމް ވިދާޅުވީ ބަދަލު ދިނުމަށް އުފެއްދެވި ސެޓުލްމަންޓް ކޮމެޓީއަކީ ގާނޫނުއަސާސީ އާއި މާލިއްޔަތު ގާނޫނާއި އެ ގާނޫނުގެ ދަށުން ހަދާފައިވާ މާލިއްޔަތު ގަވާއިދާ ހިލާފަށް ކަމަށެވެ. ސެޓުލްމަންޓް ކޮމިޓީން މަސައްކަތް ކޮށްފައި ވަނީ ގާނޫނީ އެއްވެސް އަސާސެއްގެ މައްޗަށް ބިނާ ކުރުމެއް ނެތި ކަމަށާއި ބަދަލު ދިނުމަށް ހަދާފައިވާ އެއްބަސްވުންތަކަކީ އުފެދުމުގައި ވެސް ބާތިލު އެއްބަސްވުންތަކެއް ކަމަށް ނާޒިމް ވިދާޅުވިއެވެ.

ނާޒިމް ވިދާޅުވި ގޮތުގައި ބަދަލުގެ ގޮތުގައި 36 ރަށަކާއި ފަޅެއް ސެޓުލްމަންޓް ކޮމެޓީން ދީފައިވާ ކަމަށާއި ފައިސާގެ ގޮތުގައި ދެ ބިލިއަނެއްހާ ރުފިޔާގެ ބަދަލު ދީފައިވާ ކަމަށެވެ.

ކޮމެޓީން ހުށަހެޅި ރެކަމަންޑޭޝަންތައް

  • ބަދަލު ދިނުމަށް އުފައްދާފައިވާ އެގްރިމެންޓުތައް އުވާލުން
  • ބަދަލު ދިން ފަރާތްތަކުގެ މައްޗަށް ޖިނާއީ ތަހުގީގު ހިންގުމަށް

ސެޓުލްމަންޓް ކޮމެޓީގެ ކޯ ޗެއާކަން ދެ ބޭފުޅަކު ކުރައްވާފައިވެއެވެ. އެއީ އޭރުގެ ރައީސް އިބްރާހިމް މުހައްމަދު ސާލިހާއި ރައީސް އޮފީހުގެ އޭރުގެ މިނިސްޓަރު އަލީ ޝިޔާމެވެ. އަދި ސެޓުލްމަންޓުތަކަށް ވާސިލުވުމަށް މެދުވެރިއަކަށްވެފައިވާތީ، ކުރީގެ އިކޮނަމިކް މިނިސްޓަރު އަދި އެމްޑީޕީގެ ޗެއާޕާސަން ފައްޔާޒު އިސްމާއީލަށް ވެސް ޖިނާއީ ތަހުގީގު ހިންގުމަށް ނާޒިމް ހުށަހެޅުއްވި ރިޕޯޓުގައިވެއެވެ.

އެ ރިޕޯޓަށް ބަހުސް ކުރައްވަމުން ގަލޮޅު ދެކުނު ދާއިރާގެ މެމްބަރު މީކާއިލް އަހުމަދު ނަސީމް ވިދާޅުވީ ބަދަލުގެ ގޮތުގައި ކުރީގެ ސަރުކާރުން 55 މިލިއަން ޑޮލަރު ދޭންޖެހުނީ ރައީސް ޑރ. މުހައްމަދު މުއިއްޒު ސިންގަޕޫރު އާބިޓްރޭޝަނަށް ދެއްވި ބަޔާނެއް ބަދަލު ކުރެއްވުމުން ކަމަށެވެ.

"މި ބަދަލު ދޭން މި ޖެހުނީ އަދުގެ ރައީސުލްޖުމްހޫރިއްޔާ އާދައިގެ މަތިން މިހާރު ވެސް ހައްދަވަމުން ގެންދަވާ ދޮގުތައް އޭރު ވެސް ހައުސިން މިނިސްޓަރުކަމުގައި ހުންނަވައިގެން އާބިޓްރޭޝަނަށް ވަޑައިގެން، ވެރިކަން ގެއްލުމަށް ފަހު [ރައީސް ޔާމީންގެ ވެރިކަން] ނޫމަޑި ކިޔާ ކުންފުންޏަކާ ޑީލެއް ހައްދަވައިގެން އެމަނިކުފާނު ދޮގު ހައްދަވައި ދޮގު ބަޔާނެއް ދެއްވައި ދައުލަތަށް މި ވަނީ އެތައް ބޮޑު ގެއްލުމެއްވެފައި،" މީކާއިލް ވިދާޅުވިއެވެ.

އޭނާ ވިދާޅުވީ ފުލުހަށް ހާޒިރުކުރަންވީ ސާލިހާއި ފައްޔާޒު ނޫން ކަމަށާއި ފުލުހަށް ހާޒިރު ކުރަން ވީ ރައީސް މުއިއްޒު ކަމަށެވެ.

މީކާއިލަށް ރައްދު ދެއްވައި ޕީއެންސީގެ ޕާލަމެންޓްރީ ގްރޫޕުގެ ލީޑަރު އިބްރާހިމް ފަލާހު ވިދާޅުވީ ރައީސަށް ކުރައްވާ ނޫމަޑި މައްސަލައަކީ ކޯޓުން ސާބިތު ނުވި މައްސަލައެއް ކަމަށެވެ.

މަޖިލީހުގެ ބަހުސް ހޫނުވެ، ބައެއް މެންބަރުން ވިދާޅުވީ އިސްލާމީ ޝަރީއާ ރާއްޖޭގައި ތަފްފީޒު ކުރެވޭނަމަ، މިހާރު ތިއްބެވި އެމްޑީޕީ އާއި ޕީއެންސީ މެމްބަރުންގެ އަތް ކަނޑާނެ ކަމަށެވެ.