ނޭޝަނަލް ޖުޑީޝަލް އެކަޑަމީ އިންޑިއާ (އެންޖޭއައިއޭ) ގައި ކުރިޔަށްދާ ތަމްރީނު ޕްރޮގްރާމެއްގައި ރާއްޖޭގެ ޝަރުއީ ދާއިރާގައި މަސައްކަތް ކުރައްވާ 50 ފަރާތަކުން ބައިވެރިވެއްޖެއެވެ.

މިއަދުން ފެށިގެން މިމަހުގެ 12ވަނަ ދުވަހަށް އިންޑިއާގައި ކުރިޔަށްދާ މި ތަމްރީނު ޕްރޮގްރާމަކީ ތަމްރީނާއި ކެޕޭސިޓީ ބިލްޑިން ޕްރޮގްރާމެކެވެ. މިއީ މިދިޔަ އޮކްޓޫބަރު މަހު ރައީސް ޑރ. މުހައްމަދު މުއިއްޒު އިންޑިއާއަށް ކުރެއްވި ރަސްމީ ދަތުރުފުޅުގައި އެގައުމުގެ ނޭޝަނަލް ޖުޑީޝަލް އެކަޑަމީ (އެންޖޭއޭއައި) އާއި ރާއްޖޭގެ ޖުޑީޝަލް ސާވިސް ކޮމިޝަން (ޖޭއެސްސީ) އާ ދެމެދު ސޮއިކުރި އެމްއޯޔޫގެ ދަށުން ކުރިޔަށް ގެންދާ ފުރަތަމަ ޕްރޮގްރާމެވެ.

މިދިޔަ އަހަރު ތެރޭގައި ވެސް ސޮއި ކުރެވުނު އެއްބަސްވުމެއްގެ ދަށުން ހަތަރު ބަޔަކަށް ބަހާލައިގެން ޖުމްލަ 199 ލީގަލް އޮފިސަރުން އިންޑިއާގައި ތަމްރީނު ހާސިލް ކޮށްފައިވެއެވެ.

އިންޑިއާގެ ޖުޑީޝަލް އެކަޑަމީގެ އިސްވެރިން ---

މި ތަމްރީނު ޕްރޮގްރާމުގެ ކޯސް ކޮންޓެންޓް ތައްޔާރުކޮށްފައި ވަނީ ޖޭއެސްސީން ފާހަގަކޮށްފައިވާ ޝަރުތުތަކާ އެއްގޮތަށް އެންޖޭއޭއައިންނެވެ. މި ޕްރޮގްރާމުގައި ލެކްޗާތަކާއި މަޝްވަރާތަކުގެ އިތުރުން ބައެއް ލޯކަލް ޓުއާތައް ހިމެނެއެވެ.

މި ތަމްރީނުތަކުގެ ތެރޭގައި ޝަރުއީ ދާއިރާގެ ކުރިއަރަމުން އަންނަ ދާއިރާތަކުގެ ތެރޭގައި ހިމެނޭ ޖަޖްމަންޓް ލިޔުމުގެ ފަންނާއި، އެތިކްސް އާއި ނިއުޓްރަލިޓީ އެންޑް ޕްރޮފެޝަނަލިޒަމް އާއި އީ-ޖުޑިޝަރީ، ކޯޓް އެންޑް ކޭސް މެނޭޖްމަންޓްގައި އައިސީޓީ ބޭނުންކުރުން ހިމެނެއެވެ.

ރާއްޖޭގައި ހުންނަ އިންޑިއާގެ ހައި ކޮމިޝަނުން ބުނީ އެގައުމުން ގެންގުޅޭ "ނެއިބާހުޑް ފަސްޓް" ހާރިޖީ ސިޔާސަތާއި ބޮޑުވަޒީރު ނަރެންދުރަ މޯދީގެ "ސެކިއުރިޓީ އެންޑް ގްރޯތް ފޯ އޯލް އިން ދަ ރީޖަން" (ސާގަރު) ގެ ތަސައްވުރުގެ ދަށުން ރާއްޖެއަށް ހާއްސަ ޖާގަތަކެއް ލިބިގެން ދާނެ ކަމަށެވެ.

ތަމްރީނު ޕްރޮގްރާމުގައި ބައިވެރިވުމުގެ ކުރިން ބޭއްވި ބައްދަލުވުމުގެ ތެރެއިން ---

ތަމްރީނާއި ގާބިލްކަން އިތުރުކުރުމުގެ ރޮނގުން އެއްބާރުލުން ދިނުމަކީ ރާއްޖެ އާއި އިންޑިއާގެ ގުޅުމުގެ މުހިންމު ތަނބެއްކަން، ރައީސް މުއިއްޒު އިންޑިއާ އަށް ކުރެއްވި ދަތުރުފުޅުގައި "ކޮމްޕްރިހެންސިވް އިކޮނޮމިކް އެންޑް މެރިޓައިމް ސެކިއުރިޓީ ޕާޓްނާޝިޕް"ގެ ވިޝަން ޑޮކިއުމެންޓުގައިވެސް ހިމެނިފައިވާނެ ކަމަށް އެ ކޮމިޝަނުން ބުންޏެވެ.

ވޭތުވެދިޔަ އަހަރުތަކުގައި، އިންޑިޔާއާއި ރާއްޖޭގެ މުއައްސަސާތަކުގެ މެދުގައި އިންސްޓިޓިއުޝަނަލް އިންތިޒާމުތަކާއި، އައިޓީއީސީ ޕްރޮގްރާމްގެ ދަށުން ކުރިއަށްގެންދާ އިތުރު ސްލޮޓްތަކުގެ މައްޗަށް ބިނާކޮށް، ސިވިލް ސާވިސަސް އެންޑް ގުޑް ގަވާނަންސް، ލޯކަލް ގަވާނަންސް، ޕޮލިސިން އެންޑް ސެކިއުރިޓީ، ކަސްޓަމްސް، މީޑިއާ، ފަދަ ތަފާތު ކޮންވެންޝަނަލް އަދި ކުރިއަރަމުން އަންނަ އެކި ދާއިރާތަކުން ތަފާތު އިންޑިވިޖުއަލް ޓްރެއިނިން ޕްރޮގްރާމްތަކަށް ގިނަ އަދަދެއްގެ ދިވެހިން އިންޑިއާ އަށް ވަނީ ދަތުރު ކޮށްފައެވެ.