Thoddoo rayyithun beynunvaa gothah rashuge magu hedhun ahnna aharu fesheyne: Raees

އއ. ތޮއްޑޫގެ ރައްޔިތުން ބޭނުންވާ ގޮތަށް އެރަށުގެ މަގު ހެދުމުގެ މަސައްކަތް އަންނަ އަހަރު ފެށިގެން ދާނެ ކަމުގެ ޔަގީންކަން ރައީސް ޑރ. މުހައްމަދު މުއިއްޒު ދެއްވައިފިއެވެ.

އއ. އަދި ކ. އަތޮޅުގެ ރަށްތަކަށް ކުރައްވާ ދަތުރުފުޅުގައި މިއަދު އެންމެ ފުރަތަމަ ރައީސް ވަޑައިގަތީ އއ. ތޮއްޑޫ އަށެވެ. އެރަށަށް ވަޑައިގެން ރަށުގެ ކައުންސިލާއި އަދި އަންހެނުންގެ ތަރައްގީ އަށް މަސައްކަތް ކުރާ ކޮމެޓީގެ މެންބަރުންނާއި ރައީސް މުއިއްޒު ބައްދަލުކުރެއްވިއެވެ.

އެއަށްފަހު ރަށުގެ ރައްޔިތުންނާއި ބައްދަލުކުރައްވަވާ ވާހަކަދައްކަވަމުން ރައީސް ވިދާޅުވީ ތޮއްޑޫގެ މަގުތަކުގެ ހާލަތު ދަށް ކަމަށެވެ. މީގެކުރިން ވެސް އެރަށަށް ވަޑައިގެންނެވިފައި ވާތީ މަގުތަކުގެ ހާލަތު އެމަނިކުފާނަށް ވެސް ވަރަށް ރަނގަޅަށް އެނގިލައްވާ ކަމަށާއި ރަށުގެ ރައްޔިތުން ބޭނުންވާ ގޮތަށް އެ މަސައްކަތް ކުރެވިގެން ދާނެ ކަމަށް ރައީސް ވިދާޅުވިއެވެ.

ރަށްރަށުގެ ތަރައްގީގެ މަޝްރޫއުތަކުގެ ތެރެއިން އެންމެ މުހިއްމު ކަންކަމުގެ ތެރޭގައި ހިމެނެނީ ފެނާއި ނަރުދަމާގެ އިތުރުން މަގުތައް ތަރައްގީ ކުރުން ކަމަށް ރައީސް ފާހަގަކުރެއްވިއެވެ. ތޮއްޑޫގައި ފެނާއި ނަރުދަމާގެ މަސައްކަތް މިހާރު ނިމިފައިވާ ކަމަށާއި ދެން އޮތީ މަގުތައް ތަރައްގީ ކުރުން ކަމަށް ރައީސް ވިދާޅުވިއެވެ.

ތޮއްޑޫގެ ރައްޔިތުންނާއި ބައްދަލުކުރައްވާ ރައީސް މުއިއްޒު ވާހަކަދައްކަވަނީ: ތޮއްޑޫ އަށް ވެފައިވާ ވައުދުތައް ފުއްދުމުގެ މަސައްކަތް އަންނަ އަހަރު ފަށާނެ ކަމަށް ވިދާޅުވި --- ފޮޓޯ | ރައީސް އޮފީސް

އެރަށުގެ ރައްޔިތުން ބޭނުން ވަނީ މަގުތަކުގައި ގައު އަތުރައިގެން މަގުތައް ތަރައްގީ ކުރަން ކަމަށާއި އެހެންކަމުން އަންނަ އަހަރު ރައްޔިތުން ބޭނުންވާ ގޮތަށް މަގުތައް ތަރައްގީ ކުރުމުގެ މަސައްކަތް ފެށިގެން ދާނެ ކަމަށް ރައީސް ފާހަގަކުރެއްވިއެވެ.

"އެހެންވީމާ ރަށުގެ ރައްޔިތުން އެދިވަޑައިގަންނަވާ ގޮތަށް މިއަންނަ އަހަރު ވެގެން ދާނީ މިރަށުގެ މަގު ހެދުން ފެށިގެން ދާނެ އަހަރަށް. އެކަމުގެ ޔަގީންކަން އަޅުގަނޑު ތިޔަ ލޮބުވެތި ރައްޔިތުންނަށް ދެން،" ރައީސް މުއިއްޒު ވިދާޅުވިއެވެ.

ރަށަކަށް އިގްތިސޯދީ ކުރިއެރުން އައުމުގައި ފެންވަރު ރަނގަޅަށް ހެދިފައިވާ މަގުތަކެއް ހުރުމަކީ، އެތައް ގުނައަކަށް ވިޔަފާރިތަކަށް ކުރިއެރުން ލިބިގެން ދާނެ ކަމެއް ކަމަށް ރައީސް ވިދާޅުވިއެވެ.