އަންނަ ހޮނިހިރު ދުވަހު ބޭއްވުމަށް ހަމަޖެހިފައިވާ މޯލްޑިވްސް މީޑިއާ ކައުންސިލް (އެމްއެމްސީ) އިންތިހާބުގައި ވޯޓުލާ މީހުންގެ ދާއިމީ ލިސްޓު ބަދަލުކުރާތީ ބައެއް ކެންޑިޑޭޓުން އެކަމުގެ ކަންބޮޑުވުންފާޅުކޮށްފިއެވެ.

ޔޫތު މިނިސްޓަރު އިބްރާހީމް ވަހީދު (އަސްވާޑު) އަށް، އިންތިހާބުގައި ވާދަކުރާ ހަ ކެންޑިޑޭޓަކު ސޮއިކޮށް ފޮނުވާފައިވާ ސިޓީއެއްގައި ބުނެފައި ވަނީ އިންތިހާބުގައި ވޯޓުލުމަށް ރަޖިސްޓްރީ ކޮށްފައިވާ މީޑިއާތަކުގެ މަސްއޫލުވެރިންނަށް ނޭނގި ވޯޓުލުމަށް ރަޖިސްޓްރީކުރި ފަރާތްތަކުގެ ދާއިމީ ލިސްޓަށް ބަދަލު ގެނައުމަށް ޔޫތު މިނިސްޓްރީ އަށް ހުށަހަޅާފައިވާކަން އެނގިފައިވާ ކަމަށެވެ.

މީޑިއާ ކައުންސިލަށް މެންބަރުން އިންތިހާބު ކުރުމުގެ އުސޫލާ ހަވާލާދީ ކެންޑިޑޭޓުން ބުނެފައި ވަނީ އިންތިހާބު ބާއްވަން ކަނޑައަޅާފައިވާ ތާރީހުގެ 15 ދުވަސް ކުރިން އިންތިހާބުގައި ވޯޓުލުމަށް ރަޖިސްޓްރީ ކުރާ ފަރާތްތައް ހިމެނޭ ދާއިމީ ލިސްޓު އިއުލާން ކުރަން ވާނެ ކަމަށެވެ. ދާއިމީ ލިސްޓް ގެޒެޓު ކުރީ މީގެ 21 ދުވަސް ކުރިން މިދިޔަ މަހު 14 ވަނަ ދުވަހުއެވެ.

ކަންބޮޑުންފާޅު ކުރި ކެންޑިޑޭޓުންގެ ސިޓީގައި ބުނެފައި ވަނީ ވޯޓުލާން ތިން ދުވަހަށް ވެފައިވަނިކޮށް އިންތިހާބުގައި ވޯޓުލާން ރަޖިސްޓްރީ ކުރި މީޑިއާތަކާއި ބްރޯޑްކާސްޓަރުންގެ މަސްއޫލުވެރިންނަށް ނޭނގި ދާއިމީ ލިސްޓަށް ބަދަލު ގެނެވިގެން ނުވާނެ ކަމަށެވެ.

އިންތިހާބާއި ބެހޭ އުސޫލުގައި ބުނެފައި ވަނީ އިންތިހާބާއި ބެހޭ އެންމެހާ ކަންކަން އާއްމުކޮށް އިއުލާން ކުރަން ވާނީ، ދިވެހި ސަރުކާރުގެ ގެޒެޓުގައި ކަމަށެވެ. ނަމަވެސް ދާއިމީ ލިސްޓަށް ބަދަލެއް ގެންނަނަމަ އެ ބަދަލެއް ގެޒެޓު ކުރުމުގެ ވިސްނުން ޔޫތު މިނިސްޓްރީން ނުގެންގުޅޭތީ އެކަމުގެ ކަންބޮޑުވުން ވެސް ކެންޑިޑޭޓުން ވަނީ އެ ސިޓީގައި ހިއްސާ ކޮށްފައެވެ.

މީޑިއާ ކައުންސިލަށް މެންބަރުން އިންތިހާބު ކުރުމުގައި އަމަލުކުރާނެ ގޮތުގެ އުސޫލުގައި ބަޔާންކޮށްފައި ނެތް ކަމެއް ދިމާވެއްޖެ ނަމަ އެކަމެއް ހައްލު ކުރުމަށް އެ އުސޫލުގެ ފަސްވަނަ މާއްދާގެ ދަށުން އިންތިހާބުގެ ކަންކަން އިންތިޒާމުކޮށް ބެލެހެއްޓުމަށް ނަގާފައިވާ ކޮމެޓީން ގޮތެއް ނިންމާނަމަ އެކަމެއް އިންތިހާބުގައި ވާދަކުރާ ކެންޑިޑޭޓުންނާއި ވޯޓުލުމަށް ރަޖިސްޓްރީ ކޮށްފައިވާ ފަރާތްތަކަށް އަންގަން ވާނެ ކަމަށް ބަޔާންކޮށްފައިވެއެވެ.

އެހެންކަމުން އެފަދަ އެއްވެސް ބަދަލެއް ގެންނަ ކަމަށްވާ ނަމަ އެކަން އަންގައި ދިނުމަށް އެމްއެމްސީގެ އިންތިހާބުގައި ވާދަކުރާ ބައެއް ކެންޑިޑޭޓުން ސޮއިކޮށް މިނިސްޓަރަށް ފޮނުވި ސިޓީގައިވެއެވެ.

އެ ސިޓީގައި ސޮއިކޮށްފައި ކެންޑިޑޭޓުންނަކީ މިހާރު ނޫހުގެ ފަރާތުން ވާދަކުރާ ފާތިމަތު ޝަނާ މުހައްމަދާއި ހަތާވީސް އޮންލައިންގެ ފަތާރުން ހުސައިން ހަސަން އާއި އަދަދު ނޫހުގެ ފަރާތުން ހަސަން މުހައްމަދާއި ދިޔަރެސްގެ ފަރާތުން ފާތިމަތު ނަހުދާ ފާއިޒާއި އާފަތިހުގެ ފަރާތުން ހަސަން ޝާކިރު މުހައްމަދުގެ އިތުރުން އަމިއްލަ ކެންޑިޑޭޓް ފާތިމަތު ފަހުމީއެވެ.