މި ރަށުގައި ދިރިއުޅޭ އާބާދީއަކީ 67 އެވެ. މީހުން ދިރިއުޅޭ 30 ގޭބީސީއަކަށް ކަރަންޓު ފޯރުކޮށްދެއެވެ. ގޭބީސީތަކަށާއި ސަރުކާރުގެ އިމާރާތްތަކަށް ވެސް ކަރަންޓު ދެނީ ސްޓޭޓް އިލެކްޓްރިކް ކޮންޕެނީ (ސްޓެލްކޯ)އިންނެވެ. މި މަހުން ފެށިގެން ސްޓެލްކޯއިން މި ރަށުގެ ގެތަކަށް ދެމުންދާ ކަރަންޓު ބިލުތަކުގެ "އަގު" އިންތިހާއަށް ކުޑަވެގެންދާނެއެވެ. ބައެއް ގެތަކުން ބިލު ދައްކާކަށް ވެސް ނުޖެހޭނެއެވެ.

ސްޓެލްކޯގެ ރިނިއުއަބަލް އެނަރޖީ ޑިޕާޓްމަންޓްގެ ޖެނެރަލް މެނޭޖަރު އިބްރާހީމް ނިޒާމް ވިދާޅުވީ ރަކީދޫއަށް ބައެއް ގެތަކުގެ ބިލު މި މަހު "ޒީރޯ"އަށް ވެއްޓިގެންދާނެއެވެ.

"އަޅުގަނޑުމެން ސޯލާ ޖަހާފައި މި ހުރީ އެ ގޭބީސީތަކުގައި. އޭގެ މާނައަކީ މި މަހުގެ ބިލުން އެ ގޭބީސީތަކަށް އެނގުމެއް ވެގެންދާނޭ. އެ ގޭގޭ ބިލު އެއްކޮށް ޒީރޯ ވެގެންދާނެ،" ރަކީދޫ ސޯލާއަށް ބަދަލު ކުރުމަށް ކުރާ މަސައްކަތް މީޑިއާތަކަށް ދައްކާލުމަށް ހުކުރު ދުވަހު އެ ރަށުގައި ވާހަކަ ދައްކަވަމުން ނިޒާމް ވިދާޅުވިއެވެ.

ވ. ރަކީދޫ: ބައެއް ގެތަކުން ކަރަންޓު ބިލު ދައްކާކަށް ވެސް ނުޖެހޭނެ-- ފޮޓޯ/ ސްޓެލްކޯ

ކަރަންޓު ބިލުގެ ގޮތުގައި އެއްވެސް ފައިސާއެއް ދައްކަން ނުޖެހޭ މިންވަރަށް ކަރަންޓު ބިލު ކުޑަވެގެން މި ދަނީ އެ ގެއެއްގެ ފުރާޅުގައި ސޯލާ ޖަހާފައިވުމުންނެވެ. އެގޮތުން ރަކީދޫގެ 12 ގެއެއްގެ ފުރާޅުގައި ސޯލާ ޖަހާފައިވެއެވެ. އިތުރު ތިން ގެއެއްގެ ފުރާޅުގައި ސޯލާ ޖަހާނެއެވެ.

ނާޒިމް ވިދާޅުވި ގޮތުގައި އެ ގެއަކަށް ބޭނުންވާ މިންވަރަށް ވުރެ އިތުރަށް ސޯލާއިން ކަރަންޓު އުފައްދާނަމަ، އެ އިތުރުވާ މިންވަރަށް އެ ގެއަކަށް ފައިސާ ސްޓެލޯއިން ދައްކާނެއެވެ.

"މީގެ އިތުރުން ބައެއް ގެތަކަށް ސްޓެލްކޯއިން ލާރި ދޭންޖެހޭ ހާލަތަށް އެބަ އާދޭ. އެއީ ބޭނުންކުރެވޭ ނިސްބަތް ކުޑަވެފައި، ބޮޑު ފުރާޅެއް އޮތީމަ ސޯލާ ޖެހިފަ އޮތީމަ. ސޯލާ ޖެހިފަ އޮތް ނިސްބަތަށް ބަލާފަ އެ ގޭގެއަށް ފައިސާ މި ދެވެނީ،" ނިޒާމް ވިދާޅުވިއެވެ.

ވ. ރަކީދޫ މަގެއްގައި ބަޔަކު މަޑުކޮށްލައިގެން: މި ރަށުގައި ދިރިއުޅޭ އާބާދީއަކީ 67-- ފޮޓޯ/ ހުސައިން ހަސަން | ހަތާވީސް

ސޯލާ އިން ކަރަންޓު ނަގައިގެން، ކަރަންޓު ރައްކާ ކުރުމަށް ސްޓެލްކޯ އިން ވަނީ ރަކީދޫގައި ބެޓަރި ވެސް ބަހައްޓާފައެވެ. އެއީ ދުވާލު ގަޑީގައި އިރުގެ އަވިން ކަރަންޓު އުފެއްދުމަށްފަހު ބެޑަރިއަށް ކަރަންޓު ރައްކާކުރުމުގެ ގޮތުންނެވެ. ނަތީޖާއެއްގެ ގޮތުން ރޭގަނޑު ވެސް އިންޖީނު ނުހިންގައި، ބެޓަރިން ރަށަށް ކަރަންޓު ދެވޭނެއެވެ. ސޯލާ ހަކަތައިން މި ރަށަށް ކަރަންޓު ދޭން ފެށިފަހުން، ޖަނަރޭޓަރު ހިންގަންޖެހެނީ އެންމެ ދެ ގަޑިއިރަށެވެ.

ވ. ރަކީދޫ: މި ރަށުގެ 12 ގެއެއްގައި މިހާރު ވަނީ ސޯލާ ޖަހާފައި--- ފޮޓޯ/ ސްޓެލްކޯ

ނިޒާމް ވިދާޅުވީ ކުރިއަށް އޮތް ދެ ހަފްތާގެ ތެރޭގައި އިންޖީނުތައް ނިންވާލައި، މުޅި ރަށް އެކުއެކީގައި ސޯލާއިން ކަރަންޓު ދެވިގެންދާނެ ކަމަށް އުންމީދު ކުރައްވާ ކަމަށެވެ. އެ އޮޕަރެޝަނަށް ރަކީދޫ ސްޓެލްކޯ ވަނީ ތައްޔާރުވެފައެވެ.