ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ބޭރުގެ ބޭންކުތަކުން ނަގާފައިވާ ލޯނުތައް ދެއްކުމަށް މިދިޔަ މަހު ސަރުކާރުން 500 މިލިއަން ރުފިޔާގެ ލޯނެއް ދީފިއެވެ.

މިކަން ހާމަކުރެއްވީ އިއްޔެ ބޭއްވި މާލިއްޔަތު ކޮމެޓީގެ ބައްދަލުވުމުގައި މަޖިލީހުގެ ނާއިބު ރައީސް އަދި ދިއްގަރު ދާއިރާގެ މެންބަރު އަހްމަދު ނާޒިމެވެ. ނާޒިމް ވިދާޅުވީ އެ ފައިސާ ސަރުކާރުން ދޫކޮށްފައި ވަނީ ލޯނުތައް ދެއްކުމަށް ބޭރު ފައިސާ (ޑޮލަރު) ގަތުމަށް ކަމަށެވެ.

އެޗްޑީސީން ނަގާފައިވާ ލޯނުތަކުގެ 85 ޕަސެންޓު ނަގާފައި ވަނީ އެގްޒިމް ބޭންކަކުން ކަމަށާއި ބާކީ 15 ޕަސެންޓު ލޯނުތައް ނަގާފައި ވަނީ ރާއްޖޭން ބޭރުގެ ކޮމާޝަލް ބޭންކުތަކުން ކަމަށް ނާޒިމް ފާހަގަކުރެއްވިއެވެ.

"އެއީ ކޮންޓްރެކްޓަރު ހަމަޖައްސައި ދީފައި ހުރި ލޯނުތައް. އެ ލޯނުތައް ދައްކަން 500 މިލިއަން ރުފިޔާ ސަރުކާރުން ދިން،" މަޖިލީހުގެ ނާއިބު ރައީސް ނާޒިމް ވިދާޅުވިއެވެ.

ސަރުކާރުން އެޗްޑީސީ އަށް ފައިސާ ދޭން ޖެހެނީ އެކުންފުންޏަށް ލިބެންޖެހޭ ފައިސާ ލިބެމުން ނުދާތީ ކަމަށާއި އެގޮތަށް ލިބެންވާ ފައިސާ ނުލިބޭ ނަމަ އަބަދުވެސް ސަރުކާރަށް ޖެހޭނީ "ފައިސާ ޕަމްޕު" ކުރަން ކަމަށް ނާޒިމް ވިދާޅުވިއެވެ.

އެޗްޑީސީ އަށް އެކި ކުންފުނިތަކުން ލިބެން ޖެހޭ 1.2 ބިލިއަން ރުފިޔާ ނުލިބި އެބަހުރިކަން ވަނީ ހާމަވެފައެވެ. ނަމަވެސް އިއްޔެގެ ކޮމެޓީ ބައްދަލުވުމުގައި ނާޒިމް ވިދާޅުވީ ލިބެންޖެހޭ ކަމަށް ބުނާ ފައިސާ، ކޮމެޓީގެ އިދާރީ ކުދިންގެ އެހީއާއެކު ހަތަރު ބަޔަކަށް ބަހާލާފައިވާ ކަމަށެވެ.

އޭގެތެރޭގައި ހުޅުމާލޭން ދޫކޮށްފައިވާ އެކި ބިންތަކަށް ލިބެންވާ ފައިސާ އާއި ތިލަފުއްޓާއި ގުޅީފަޅުން ލިބެންޖެހޭ ފައިސާ ހިމެނޭ ކަމަށް ނާޒިމް ވިދާޅުވިއެވެ. އަދި ލިބެންވާ ފައިސާ ހޯދުމަށް ބައެއް ފަރާތްތަކާއެކު ސެޓްލްމަންޓް އެގްރީމަންޓުތަކެއް ހަދާފައިވާ ކަމަށް ވެސް އޭނާ ވިދާޅުވިއެވެ.

"އޭގައި [ސެޓްލްމަންޓް އެގްރީމަންޓް] އެބަހުރި 108 މިލިއަން ރުފިޔާ އަނބުރާ ހޯދުމަށް އެބަހުރި އެމީހުންނާއެކު އެގްރީމަންޓުތަކެއް ހަދާފައި،" ނާޒިމް ވިދާޅުވިއެވެ.

އޭނާ ފާހަގަކުރެއްވި ގޮތުގައި އެގޮތަށް އެގްރީމަންޓު ހަދާފައިވާ ފައިސާތަކަކީ ނުލިބޭ ފައިސާ ކަމަށް ބަލައިގެން ކުރިޔަށް ނުދެވޭނެ ކަމަށެވެ. އެފަދަ އެގްރީމަންޓުތައް ހަދާފައިވާ ގޮތްތަކަކީ ކޮބައިކަން ވެސް ބަލަން ޖެހޭނެ ކަމަށާއި ވަކި ފަރާތަކަށް ވަކި ގޮތެއް ހަދައިގެން ވެސް ނުވާނެ ކަމަށް ނާޒިމް ވިދާޅުވިއެވެ.

އެޗްޑީސީ އަށް ލިބެންޖެހޭ ފައިސާތަކުގެ ތަފްސީލީ މައުލޫމާތުތައް ހޯދުމަށް އަންނަ ހޯމަ ދުވަހު އެކުންފުނީގެ އިސްވެރިން މާލިއްޔަތު ކޮމެޓީ އަށް ވަޑައިގަންނަވާނެއެވެ.