މާލޭގެ އަމީނީމަގުގައި ހުންނަ ފުރުގާން މިސްކިތުގައި ބަހައްޓާފައި ހުރި މުސްހަފްތައް މިސްކިތުގެ އެކި ތަންތަނަށް އުކާލާ، މިސްކިތަށް އެކިވަރުގެ ގެއްލުންތައް ދިން މައްސަލާގައި އަދި މީހަކު ހައްޔަރު ނުކުރާ ކަމަށް ފުލުހުން ބުނެފިއެވެ.

ފުލުހުން ތަހުގީގު ކުރަމުން އަންނަ އެ މައްސަލައާ ގުޅިގެން މީހަކު ހައްޔަރު ކޮށްފައިވޭތޯ ސުވާލު ކުރުމުން ފުލުހުންގެ މީޑިއާ އޮފިޝަލަކު "ހަތާވީސް" އަށް މިއަދު ވިދާޅުވީ އެ މައްސަލާގައި މީހަކު އަދި ހައްޔަރު ނުކުރާ ކަމަށެވެ.

ފުރުގާން މިސްކިތަށް ގެއްލުން ދީފައިވާ މައްސަލަ ތިލަކުރެއްވީ ޝެއިހް އާދަމް ނިޝާނެވެ. ފޭސްބުކްގައި ޝެއިހް ނިޝާން ކުރެއްވި ޕޯސްޓެއްގައި ވިދާޅުވީ އެކަން ކޮށްފައި ވަނީ ފުރުގާން މިސްކިތުގައި އަބަދުހެން ނަމާދުގަޑިތަކުގައި ވެސް ނިދާފައި އޮންނަ "ބުއްދިފިލާ ގޮސްފައިވާ" ޒުވާނެއް ކަމަށެވެ.

ޝެއިހް ވިދާޅުވީ މިސްކިތުގެ ފަހަތުގައި ހުރި މުސްހަފްތައް މުޅިތަނަށް އުކާލައި، އިމާމް ހުންނަ ދިމާލުގެ ކަރަންޓް ބޯޑުތަކާއި އެޔަށް ޖަހާފައިހުރި އެޑެޕްޓަރުތައް ތަޅާ ހިމުންކޮށްލައި އަދި ވުޟޫ ކުރާ ބައިގެ ބައެއް އިސްކުރުތައް ބިންދާލައި މިސްކިތުގެ ބައެއް އެއްޗެހި އެތަނަށް އުކާލާ ހަދާފައިވާ ކަމަށެވެ.

ޝެއިހް ނިޝާން ވިދާޅުވި ގޮތުގައި މިއީ އެ މީހާ މިސްކިތަށް ގެއްލުން ދިން ފުރަތަމަ ފަހަރެއް ނޫނެވެ. މީގެކުރިން ވެސް އެކި ފަހަރުތައް މަތިން މުސްހަފްތައް އުކާލުމާއި އެފަދަ އެތައް ކަމެއް އޭނާ ވަނީ ކޮށްފައެވެ.