މިނިވަން މުއައްސަސާތަކާއި ބެހޭ ކޮމެޓީއަށް ސިވިލް ސާވިސް ކޮމިޝަނުގެ ރައީސް މުހައްމަދު ނާސިހުގެ މައްޗަށް ބޮޑެތި ތުހުމަތުތަކެއްކޮށް މައްސަލަތަކެއް ހުށަހެޅިފައިވީ ނަމަވެސް، އެފަދަ އެއްވެސް ކަމެއް ނާސިހުގެ މައްޗަށް ސާބިތު ނުވާ ކަމަށް އެ ކޮމެޓީން ނިންމައިފިއެވެ.

ސިވިލް ސާވިސްގެ ރައީސް ނާސިހު މަގާމުން ވަކި ކުރުމުގެ މައްސަލަ މިނިވަން މުއައްސަސާތަކާއި ބެހޭ ކޮމެޓީ އަށް ފޮނުވީ މިމަހުގެ 12ވަނަ ދުވަހު ބޭއްވުނު ރައްޔިތުން މަޖިލީހުގެ ޖަލްސާގައެވެ. އެ ޖަލްސާ އިން އެ މައްސަލަ ކޮމެޓީ އަށް ފޮނުވީ ސީއެސްސީގެ ރައީސް ނާސިހް އެ ކޮމިޝަނުގެ ރައީސްގެ މަސްއޫލިއްޔަތުތަކާ ހިލާފަށް އަމަލުކޮށްފައިވާ ކަމަށާއ،ި އެ ކޮމިޝަނުގެ މެންބަރުކަމުގެ މަގާމާ އެކަށީގެންނުވާ ފަދަ އަމަލުތަކެއް ކޮށްފައިވާ ކަމަށް ތުހުމަތުކޮށް މިދިޔަ އޮކްޓޫބަރު އެ ކޮމެޓީ އަށް ހުށަހެޅުނު މައްސަލައަކާއި ގުޅިގެންނެވެ.

އެ މައްސަލަ އަށް ޖަވާބުދާރީވުމަށް ސީއެސްސީގެ ރައީސް ނާސިހު އަށް ކޮމެޓީން ފުރުސަތު ދިނުމުން ލިޔުމުން އޭނާ ވަނީ ޖަވާބުދާރީވެފައެވެ.

ނާސިހުގެ މައްޗަށް ކޮށްފައިވާ ތުހުމަތުތައް:

  • ސިވިލް ސާވިސް ކޮމިޝަންގެ ބައެއް ވެރިންގެ ކޮމްޕިއުޓަރު ސިސްޓަމަށާއި ސިވިލް ސާވިސް ޓްރެއިނިން އިންސްޓިޓިއުޓްގައި ތިއްބަވާ ބައެއް ފަރާތްތަކުގެ ކޮމްޕިއުޓަރު ސިސްޓަމަށް ސޮފްޓްވެއާއެއް އަޅައިގެން އެމުވައްޒަފުންނަށް ޖާސޫސުކޮށް ފާރަލާކަމަށް
  • ސިވިލް ސާވިސް ކޮމިޝަންގެ އެޑްމިނިސްޓްރޭޓިވް ސެކްޝަން އަދި ފައިނޭންސް ސެކްޝަނަށް ދެ ޑިރެކްޓަރުން ހޮވުމަށްޓަކައ،ި ވަކި ފަރާތްތަކަކަށް ހާއްސަކޮށްގެން ގަވާއިދަށް ނުވަތަ އުސޫލަށް ބަދަލު ގެންނަން ނިންމި ކަމަށް
  • ސިވިލް ސާވިސް ކޮމިޝަންގެ ކައުންސެލް ޖެނެރަލް ޗުއްޓީއަށް ވަޑައިގަތުމުނ،ް ސީނިއާ ލީގަލް ކައުންސެލްއާ އެ މަގާމުގެ މަސްއޫލިއްޔަތު ހަވާލުކުރުމުގެ ބަދަލުގައި އުސޫލާ ހިލާފަށް ޖޫނިއާ މަގާމެއްގެ މުވައްޒަފަކާއި މަސްއޫލިއްޔަތު ހަވާލުކުރުމަށް ނިންމިކަމަށް
  • ޕްރޮބޭޝަންގައި ފެއިލްވެފައިވާ މުވައްޒަފެއްގެ ޕްރޮބޭޝަން ފޯމް ފުރުމަށްފަހު އެ މުވައްޒަފު ވަޒީފާއިން ވަކިކުރުމަށް އޭނާގެ ސުޕަވައިޒަރު ލަފާދީފައި ވަނިކޮށ،ް އެ މުވައްޒަފު ވަޒީފާއިން ވަކިނުކުރުމަށް ނިންމި ކަމަށް

މީގެއިތުރުން ވެސް ސިވިލް ސާވިސްގެ ގާނޫނާއި ހިލާފަށް ދިވެހި ސިވިލް ސާވިސް އިން ވަޒީފާ ދިނުމުގައ،ި އެމީހެއްގެ ތައުލީމީ ފެންވަރާއ،ި މަސައްކަތު ހުނަރާއި ގާބިލްކަމާއ،ި ތަޖުރިބާއަށް ބެލުމެއް ނެތި ވަޒީފާ ހަމަޖެއްސުމަށް ނިންމި ކަމަށް ވެސް ތުހުމަތު ކޮށްފައިވެއެވެ.

"އެގޮތުން ކުރީގެ ސަރުކާރުގެ ބައެއް މިނިސްޓަރުންނާއި ރައްޔިތުންގެ މަޖިލީހުގެ ކުރީގެ މެންބަރުންގެ އެދުމަށް ވަޒީފާތަކަށް އެކި މީހުން ހަމަޖައްސަން ނިންމިކަމާއ،ި އެގޮތުން އޭރު ބޭއްވި ސިޔާސީ ޕާޓީއެއްގެ އެތެރޭގެ އިންތިހާބަށް ނުފޫޒު ފޯރުވުމުގެ ބޭނުމުގައި ކުރީގެ މިނިސްޓަރެއް ވަކި ބަޔަކަށް ވަޒީފާ ދިނުމަށް އެދުމުން އެފަދައިން ވަޒީފާ ހަމަޖައްސައިދީފައިވާ ކަމަށާއި...،" ކޮމެޓީ ރިޕޯޓުގައިވެއެވެ.

އަދި ކުރީގެ މިނިސްޓަރެއް ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑުގެ މަގާމަކަށް މީހަކު އައްޔަންކޮށްދިނުމަށް އެދުމުން އެފަދައިން އެކަން ހަމަޖައްސައިދީފައިވާ ކަމަށާއ،ި އަދި 19ވަނަ ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީގެ މެންބަރުން އެދިފައިވާ ގޮތަށް ވަޒީފާތަކަށް މީހުން ހަމަޖައްސައިދީފައިވާ ކަމަށް ވެސް ނާސިހުގެ މައްޗަށް ތުހުމަތު ކޮށްފައިވެއެވެ.

ނަމަވެސް މިނިވަން މުއައްސަސާތަކާއި ބެހޭ ކޮމެޓީން ނިންމީ ނާސިހުގެ މައްޗަށް ކޮށްފައިވާ އެއްވެސް ތުހުމަތެއް ކޮމެޓީ އަށް ސާބިތު ނުވާ ކަމަށެވެ.