ޕާޓީ ބަދަލުކޮށްފިނަމަ، މަޖިލިސް މެމްބަރުންގެ ގޮނޑި ގެއްލޭ ގޮތަށް ގާނޫނުއަސާސީ އިސްލާހު ކުރުމަށް ސަރުކާރުން ހުށަހަޅާ ބިލު މަޖިލީހުގެ މާދަމާ ޖަލްސާއަށް ހުށަހަޅައި، ބަހުސްކޮށް، ގޮތެއް ނިންމުމަށް އެޖެންޑާކޮށްފިއެވެ.

މަޖިލީހުގެ އާންމު އުސޫލަކީ ބިލުގެ ސުރުޚީ މަޖިލީހަށް އިއްވުމަށްފަހު، ބިލު ކިޔާލައި ދިރާސާ ކޮށްލުމަށް މެމްބަރުންނަށް ދުވަސް ދިނުމެވެ. ނަމަވެސް މާދަމާގެ ޖަލްސާއަށް ހުޅުދޫ ދާއިރާގެ މެންބަރު މުހައްމަދު ޝާހިދު ހުށަހަޅުއްވާފައިވާ ބިލު، އެޖެންޑާކޮށްފައި ވަނީ ދެ ކިޔުން އެއްކޮށްލައިގެން މަސައްކަތް ކުރިއަށްގެންދާ ގޮތަށެވެ.

މަޖިލީހުގެ ގަވާއިދުގައި ބުނެފައިވާ ގޮތުން ގޮތުން، ފުރަތަމަ ކިޔުމަކީ ބިލުގެ ސުރުހީ މަޖިލީހަށް އިއްވުމެވެ. ދެ ވަނަ ކިޔުން ބެހިގެންވަނީ ތިން މަރުހަލާއަކަށެވެ. އެއީ ބިލުގެ އިބްތިދާއީ ބަހުސްގެ މަރުހަލާ އާއި ބިލު ކޮމިޓީއަކުން ދިރާސާކޮށް، އިސްލާުކުރާ މަރުހަލާ އާއި މަރުހަލާ ނިމުމުން ބިލު މަޖިލީހުން ރިޔާއަތްކޮށްދިނުމަށް އެދި އަނބުރާ މަޖިލީހަށް ހުށަހެޅުމުގެ މަރުހަލާއެވެ.

ގާނޫނުއަސާސީގެ ފަސް މާއްދާއެއް އިސްލާހު ކުރުމަށް ހުށަހަޅާފައިވާ ބިލުގައި އެންމެ ބޮޑު އިސްލާހަކަށް ހުށަހަޅާފައި ވަނީ މެމްބަރުންގެ ޝަރުތުތައް ތަފްސީލު ކުރުމަށް ބަޔާންކުރާ މާއްދާއެވެ.

ހުޅުދޫ ދާއިރާގެ މެންބަރު މުހައްމަދު ޝާހިދު (ޝާޑު): ސަރުކާރުގެ ފަރާތުން ގާނޫނުއަސާސީއަށް އިސްލާހު ހުށަހެޅުއްވި-- ފޮޓޯ | މަޖިލިސް

އިސްލާހު ކުރުމަށް ހުށަހަޅާ ބިލުގައި ބުނެފައި ވަނީ ވަކި ސިޔާސީ ޕާޓީއެއްގެ ފަރާތުން ވާދަކޮށްގެން ރައްޔިތުންގެ މަޖިލީހަށް އިންތިހާބުވުމަށްފަހު، އިންތިހާބުވި އުމުރުގެ ތެރޭގައި އެ މެންބަރަކު ތަމްސީލުކުރާ ސިޔާސީ ޕާޓީން އަމިއްލައަށް ވަކިވުން ނުވަތަ ސިޔާސީ ޕާޓީގެ މެންބަރުކަމުން ގާނޫނުގައި ބަޔާންކުރާ ގޮތުގެމަތިން ވަކިކުރުން ނުވަތަ އެ މެމްބަރަކު ތަމްސީލުކުރާ ސިޔާސީ ޕާޓީ ނޫން އެހެން ސިޔާސީ ޕާޓީއެއްގެ މެމްބަރަކަށްވުމުން މެމްބަރުކަމުގެ ގޮނޑި ގެއްލޭނެއެވެ.

މީގެ އިތުރުން އަމިއްލަ ގޮތުން ވާދަކޮށްގެން ރައްޔިތުންގެ މަޖިލީހަށް އިންތިހާބުވުމަސްފަހު، އެ މެމްބަރަކު ރައްޔިތުންގެ މަޖިލީހަށް އިންތިހާބުވި އުމުރުގެ ތެރޭގައި ސިޔާސީ ޕާޓީއެއްގެ މެމްބަރަކަށްވުމަކީ ވެސް ގޮނޑި ގެއްލޭނެ ސަބަބެއް ކަމަށް އަލަށް ހުށަހަޅާ އިސްލާހުގައިވެއެވެ.

މި ގޮތަކަށް އިސްލާހު ހުށަހަޅާފައި މި ވަނީ އެންޓި ޑިފެކްޝަން ގާނޫނާ ދެކޮޅަށް ހައި ކޯޓަށް މައްސަލަ ހުށަހަޅާފައިވަނިކޮށެވެ.

މީގެ ކުރިން ދެ ފަހަރެއްގެ މަތިން، ޕާޓީ ބަދަލު ކުރުމުން ގޮނޑި ގެއްލޭނެ ކަމަށް ގާނޫނުގައި ބަޔާންކުރުމުން ސުޕްރީމް ކޯޓުން ވަނީ އެ މާއްދާތައް ބާތިލުކޮށްފައެވެ. އެއީ ކައުންސިލަރުން ޕާޓީ ބަދަލުކޮށްފިނަމަ، ގޮނޑި ގެއްލޭނެ ކަމަށް ބަޔާންކުރުމުން ސިޔާސީ ޕާޓީތަކުގެ ގާނޫނުން އެ މާއްދާ ސުޕްރީމް ކޯޓުން ވަނީ ބާތިލުކޮށްފައެވެ. އަދި 18 ވަނަ މަޖިލީހުގެ 12 މެމްބަރަކު ޕާޓީ ބަދަލުކުރުމުން ގޮނޑި ގެއްލުވާލި ގޮތާ ގުޅިގެން ވެސް، ސުޕްރީމް ކޯޓުން ހުކުމް ކުރީ ގޮނޑި ނުގެއްލޭނެ ކަމަށެވެ.