އާސަންދަ އަދި އެންސްޕާގެ އެހީތެރިކަން ނުލިބޭނެ ދާއިރާތަކަށް ވެސް ބޮޑެތި އަދަދުތަކުން މީގެކުރިން އެހީތެރިކަން ދީފައި އެބަހުރި ކަމަށް އެންސްޕާގެ ސީއީއޯ ހީނާ ވަލީދު ވިދާޅުވެއްޖެއެވެ.

ހީނާ މިފަދައިން ވިދާޅުވީ މިއަދު ބޭއްވި ރައްޔިތުން މަޖިލީހުގެ އިޖުތިމާއީ ކޮމެޓީގައި މެންބަރަކު ކުރެއްވި ސުވާލަކަށް ޖަވާބު ދެއްވަމުންނެވެ. ހީނާ ވިދާޅުވީ މީގެކުރިން އާސަންދަ އަދި އެންސްޕާގެ މޭޒުތައް ބައެއް އިންތިހާބުތަކާއި ދިމާކޮށް ރަށްރަށުގައި ބަހައްޓައިގެން ހިދުމަތް ދެމުން ގޮސްފައިވާ ކަމަށެވެ.

އައިސީޔޫގައި އޮންނަ ބަލި މީހަކަށް އާސަންދަ ހަމަޖައްސައި ދެވޭނީ މިވެނި ފަރާތަކަށް ވޯޓުލުމުން ކަމަށް ބުނެފައި އެބަހުރި ކަމަށް ވެސް ހީނާ ވިދާޅުވިއެވެ. މީގެކުރިން އާސަންދަ އަދި އެންސްޕާގެ ހިދުމަތްތަކަށް އެދިފައިވާ ފަރާތްތަކަށް ސިޔާސީ ބޭފުޅަކު ބޭނުންވާ ފަރާތަކަށް ބޮޑެތި އަދަދުތަކުން ފައިސާ ހަމަޖައްސައި ދެއްވާފައިވާ ކަމަށް ވެސް ހީނާ ވިދާޅުވިއެވެ.

ރައްޔިތުން މަޖިލީހުގެ އިޖުތިމާއީ ކޮމެޓީގައި ހީނާ (ވ) އަދި އެންސްޕާގެ ބައެއް އިސްވެރިން ---

"އަޅުގަނޑުމެންނަށް ފެނިގެން ދިޔައީ ސިޔާސީ ގޮތުން ބޭނުންވާ ފަރާތްތަކަށް އާސަންދައިގެ ތެރެއިން ރެސްޓްރިކްޓް ކުރެވިފައިވާ ދާއިރާތަކަށް މިސާލަކަށް ކޮސްމެޓިކް ސާޖަރީ ނުވަތަ ހަށިގަނޑު ރީތި ކުރުމަށް ބޭނުންވާ ބައެއް ކަހަލަ ހިދުމަތްތައް ދުބާއީ ތަންތަނުން ވޭތުވެދިޔަ ތަނުގައި ދެވިފައި ހުރިކަން،" ހީނާ ވިދާޅުވިއެވެ.

އާސަންދަ އަދި އެންސްޕާގެ ހިދުމަތަކީ ސަރުކާރުތަކުން އެންމެ ބޮޑު ހޭދައެއް ކުރާ ކަންކަމެވެ. ރައީސް ޑރ. މުހައްމަދު މުއިއްޒުގެ ސަރުކާރުން އަންނަނީ މި ހިދުމަތްތައް މިހާރު ދެމުން އަންނަ ގޮތް އިސްލާހު ކުރުމުގެ މަސައްކަތްތައް ވެސް ކުރަމުންނެވެ.