ހުޅުމާލޭގައި ކާރެއްގެ ތެރޭގައި މީހަކު ރަހީނުކުރި މައްސަލައިގެ ތުހުމަތުގައި ހައްޔަރުކުރި އެންމެން ދޫކޮށްލައިފިއެވެ.

އެ މައްސަލާގައި ހައްޔަރުކުރީ ދަފްތަރު ނަމްބަރު 9022 ތޮލާލް މޫސާ އާއި ހދ. ކުމުންދޫ، ރަތްބަގީޗާގޭ ހުޝާމް އިބްރާހިމާއި ހަމަ އެ ގޭ އާދަމް ޝަރީފާއި ގ. ކަޅަގާރިމާގޭ، ހުސެއިން ހައިކަލް ނިޔާޒު އަދި ހުޅުމާލެ ފްލެޓް ނަންބަރު 71-1-04 އަހުމަދު ރިޝްފާންއެވެ.

ފުލުހުން މީގެކުރިން ބުނީ ދިވެހި ފިރިހެނަކު ރަހީނުކޮށް އޭނާއަށް އަނިޔާކުރި މައްސަލައެއް ހުށަހެޅުމުން މިމަހުގެ 11ވަނަ ދުވަހު ބަލަން ފަށާފައިވާ ކަމަށެވެ.

އެ މައްސަލާގައި ހައްޔަރުކުރި މީހުންނަށް ފުރަތަމަ ހުޅުމާލެ މެޖިސްޓްރޭޓު ކޯޓުން ހަތް ދުވަހުގެ މުއްދަތެއް ދިނެވެ.

ނަމަވެސް މިއަދު ފުލުހުން ބުނީ އެ މައްސަލާގައި ހައްޔަރުކުރި މީހުން އިތުރަށް ބަންދުގައި ބަހައްޓަން ނުފެންނާތީ އެ އެންމެން ވެސް މިހާރު ދޫކޮށްލާފައިވާ ކަމަށެވެ. އަދި ބުނީ އެ މައްސަލަ ތަހުގީގު ކުރަމުން އަންނަ ކަމަށެވެ.