ބްރޯޑްކާސްޓަރުންނާއި ނޫސްމަޖައްލާތައް ކޮންޓްރޯލް ކުރެވޭ ގޮތަށް އަމިއްލަ މެމްބަރަކު މަޖިލީހަށް ހުށަހެޅުއްވި ބިލާ ދެކޮޅަށް މޯލްޑިވްސް ޖާނަލިސްޓް އެސޯސިއޭޝަން (އެމްޖޭއޭ)އިން އިސް ނަގައިގެން ކެމްޕެއިނެއް ފަށައިފިއެވެ.

ރައީސުލްޖުމްހޫރިއްޔާ އައްޔަން ކުރާ މެމްބަރުންގެ މެޖޯރިޓީ އޮންނަ ގޮތަށް "މޯލްޑިވްސް މީޑިއާ އެންޑް ބްރޯޑްކާސްޓިންގ ކޮމިޝަންގެ ބިލު" މަޖިލީހަށް ހުށަހެޅުއްވީ ތުޅާދޫ ދާއިރާގެ މެމްބަރު އަބްދުލްހަންނާން އަބޫބަކުރެވެ.

ބިލާ ދެކޮޅަށް އެމްޖޭއޭ ފެށި ހަރަކާތަށް ދީފައިވާ ނަމަކީ "ހަތަރެއްގެ ހައްގުގައި" އެވެ. އެ ނަމުގެ މާނައަކީ ޑިމޮކްރަސީގެ ހަތަރު ވަނަ ބާރަކީ ނޫސްވެރިކަން ކަމަށާއި ނޫސްވެރިކަމުގެ ހައްގުގައި މަސައްކަތް ކުރަންޖެހިފައިވާ ކަމަށެވެ. އެމްޖޭއޭއިން ފެށި ހަރަކާތާ މޯލްޑިވްސް މީޑިއާ ކައުންސިލް (އެމްއެމްސީ) އާއި ޓްރާންސްޕޭރެންސީ މޯލްޑިވްސް އާއި ގިނަ އަދަދެއްގެ މީޑިއާތަކުގައި މަސައްކަތްކުރާ ނޫސްވެރިން ގުޅިފައިވެއެވެ.

މި ހަރަކާތުން މިއަދު ބޭއްވި ޕްރެސް ކޮންފަރެންސްގައި އެމްޖޭއޭގެ ސެކްރެޓަރީ ޖެނަރަލް އަހުމަދު ނާއިފް ވިދާޅުވީ ހަންނާން ހުށަހެޅުއްވި ބިލަކީ އެއްވެސް މަޝްވަރާއެއް ކުރުމެއް ނެތި ހުށަހެޅުއްވި ބިލެއް ކަމަށާއި ނޫސްވެރިކަންފަދަ ޕްރޮފެޝަންއަކާ ގުޅިގެން ބިލެއް ހުށަހަޅަންޖެހޭނީ ކަމާގުޅޭ ފަރާތްތަކާ މަޝްވަރާކޮށް، އެ ފަރާތްތަކުން ދޭ ހިޔާލުގެ މައްޗަށް ކަމަށެވެ. އެ ބިލު އޮތީ ސަރުކާރުން މީގެ ކުރިން ބުނި ގޮތްތަކާ ހިލާފަށްކަން ފާހަގަކޮށް، ނާއިފް ވިދާޅުވީ އެ ބިލު މަޖިލީހަށް ބަލައިނުގަނެ ބޭރުކޮށްލުމަށް އެދޭ ކަމަށެވެ.

އެމްޖޭއޭ، މީޑިއާ ކައުންސިލް، އަދި ޓްރާންސްޕޭރެންސީ ގުޅިގެން ބޭއްވި ޕްރެސް ކޮންފަރެންސްގެ ތެރެއިން-- ފޮޓޯ/ އެމްޖޭއޭ

ބިލުގައި ބުނެފައިވާ ގޮތުން މޯލްޑިވްސް މީޑިއާ ކައުންސިލް (އެމްއެމްސީ) އާއި މޯލްޑިވްސް ބްރޯޑްކާސްޓިން ކޮމިޝަން (ބްރޯޑްކޮމް) އުވާލައި، އަލަށް އުފައްދާ ކޮމިޝަންގެ ހަތް މެމްބަރުންގެ ތެރެއިން، ހަތަރު މެމްބަރުންނަކީ ރައީސުލްޖުމްހުރިއްޔާ މަޖިލީހަށް ހުށަހަޅުއްވައިގެން ފާސްކޮށްގެން އައްޔަންކުރާ މެމްބަރުންނެވެ. އަނެއް ތިން މެމްބަރުންނަކީ މީޑިއާތަކުން ވޯޓުދީގެން އައްޔަން ކުރާ މެމްބަރުންނެވެ.

ބިލުގައި ހިމެނޭ ނުރައްކާތެރި މާއްދާތަކުގެ ތެރޭގައި ގާނޫނުއަސާސީގައި ކަށަވަރުކޮށްދީފައިވާ މަސްދަރު ހާމަކުރަން ލާޒިމު ކުރުން ހިމެނެއެވެ. އަދި މީޑިއާތައް ޖޫރިމަނާކޮށް ނޫސްވެރިން ވެސް ޖޫރިމަނާކުރަން ހުށަހަޅާފައިވެއެވެ. މީގެ އިތުރުން ނޫސްވެރިން ހިފަހައްޓަންވީ ހަމަތައް ބަޔާންކޮށް، "މައިކްރޯ ލެވެލް"ގައި މާއްދާތައް ލިޔެފައިވެއެވެ.

"ހަތަރެއްގެ ދިފާއުގައި" ހަރަކާތުން މިއަދު ވަނީ އެޓާނީ ޖެނަރަލް އަހުމަދު އުޝާމްއާ މިއަދު ހެނދުނު ބައްދަލު ކުރައްވާފައެވެ. މީގެ އިތުރުން ރައީސް ޑރ. މުހައްމަދު މުއިއްޒާ ބައްދަލު ކުރެއްވުމަށް ވެސް އެ ހަރަކާތުން އެދިފައިވެއެވެ.