އާސަންދަ ނިޒާމުން ކުރާ ހަރަދުގެ މިންވަރެއް ފައިނޭންސްކޮށް، ރައްޔިތުންގެ ބައިވެރިވުން އިތުރު ކުރުމަށްޓަކައި މަހަކު 60،000 ރުފިޔާ އަށްވުރެ ގިނައިން އާމްދަނީ ލިބޭ ނުވަތަ އިންކަމް ޓެކްސް ދައްކާ ފަރާތްތަކުގެ އަތުން އަންނަ އަހަރު "ހެލްތު ކޮންޓްރިއުބިއުޝަން" އެއް ނެގުމަށް ނިންމައިފިއެވެ.

އަންނަ އަހަރަށް ލަފާކުރާ ދައުލަތުގެ ބަޖެޓުގައިވާ ގޮތުގައި، އަންނަ އަހަރުގެ އޭޕްރީލް މަހުން ފެށިގެން މުއްސަނދިންގެ އަތުން "ހެލްތު ކޮންޓްރިއުބިއުޝަން" ނަގާނެއެވެ. އެ ކޮންޓްރިބިއުޝަންގެ ސަބަބުން މުޅި ނިޒާމު ޕްރޮގްރެސިވް ކުރެވި އެންމެ ފަގީރު ހާލުގައިވާ ފަރާތްތަކަށް މާލީ ބުރައަކާއި ނުލައި، ސިއްހީ ހިދުމަތްތައް ލިބޭކަން ކަށަވަރު ކުރަން ލިބޭ ޖާގަ އިތުރުވެގެން ދާނެ ކަމަށް ބަޖެޓުގައިވެއެވެ.

ބަޖެޓު ފޮތުގައި ބުނެފައި ވަނީ އެއީ ދެކުނު ކޮރެއާ ފަދަ ތަރައްގީވެފައިވާ ގިނަ ގައުމުތަކުގައި، ކާމިޔާބުކަމާއެކު ތަންފީޒު ކުރަމުން ގެންދާ މޮޑަލެއް ކަމަށެވެ. ބައެއް ގައުމުތަކުން އެފަދަ ކޮންޓްރިބިއުޝަން ނަގަމުން ދަނީ އިންކަމް ޓެކްސް ދައްކާ ވަގުތު ކަމަށްވެސް ބުނެފައިވެއެވެ.

މިއީ އާސަންދައިގެ ހަރަދުތައް ދެމެހެއްޓެނިވި މިންގަނޑެއްގައި ހިފެހެއްޓުމަށްޓަކައި ސަރުކާރުން ގެންނަ މުހިއްމު ދެ ބަދަލުތަކުގެ ތެރޭގައި ހިމެނޭ އެއް ބަދަލެވެ.

އާސަންދަ ހިދުމަތް ފޯރުކޮށްދޭ އަމިއްލަ ތަންތަނުން ހިދުމަތް ހޯދާއިރު، އާސަންދަ ސްކީމުން ކަވަރު ކުރަނީ ބިލްގެ ވަކި އަދަދެކެވެ. ބާކީ ބައި އަދާކުރަނީ ހިދުމަތް ހޯދާ މީހުންނެވެ. އާސަންދައިން ކަވަރު ކުރާ އަދަދު ޖުމްލަގޮތެއްގައި އެއްގޮތް ނަމަވެސް އަމިއްލަ ޖީބުން ދައްކަން ޖެހޭ ބައި އެކި ހޮސްޕިޓަލުތަކުގަ އާއި ކްލިނިކްތަކުގައި ތަފާތެވެ.

އެކި ކަހަލަ މެޑިކަލް ޕްރޮސީޖާތަކަށް ކަނޑއަޅާފައިވާ އަގުގެ އިތުރުން އެކި ކަހަލަ ކޮންސިއުމަބަލް އާއި އެޑްމިޓް ކުރަން ޖެހޭ ހާލަތްތަކުގައި އެކަމުގެ ހަރަދުތަކަށް ބިލު ކުރެއެވެ.

ފިނޭންސް މިނިސްޓްރީން ބުނީ އެކަމުގެ ސަބަބުން އާސަންދައިގެ އިތުރުން އެންސްޕާގެ މެޑިކަލް ވެލްފެއާ އަށް އޮންނަ ބުރަވެސް އިތުރުވާ ކަމަށެވެ. އެހެންކަމުން އާސަންދައިން ހިދުމަތްތަކަށް ކަނޑައަޅާފައިވާ ހަރަދުތައް ހިމަނައި، ސިއްހީ ހިދުމަތް ފޯރުކޮށްދޭ ތަންތަނުގެ އަގުތައް ހާމަނައިޒް ކުރުމުގެ މަސައްކަތް ކުރަން ރާވާފައިވާ ކަމަށް ބަޖެޓުގައިވެއެވެ.

މިއީ އާސަންދައިގެ ހަރަދުތައް ދެމެހެއްޓެނިވި މިންގަނޑެއްގައި ހިފެހެއްޓުމަށްޓަކައި ސަރުކާރުން ގެންނަ މުހިއްމު ދެ ބަދަލުތަކުގެ ތެރޭގައި ހިމެނޭ އަނެއް ބަދަލެވެ.

މީގެ އިތުރުން ވެސް އާސަންދައިގެ ހިދުމަތް ބޭނުން ކުރުމުގައި އެންމެ މުއްސަނދި ފަރާތްތަކަށް ޓާގެޓުކޮށް، ބޭހާއި އައުޓް ޕޭޝަން ހިދުމަތްތަކަށް ކޮންމެވެސް މިންވަރެއް އަމިއްލަ އަތުން ދައްކާ ގޮތަށް ބަދަލު ކުރުމަށް ވެސް ވަނީ ނިންމައިފައެވެ.