ރައީސުލްޖުމްހޫރިއްޔާ މަގާމުގެ ހުވާކުރައްވާ ދުވަސް ނޮވެމްބަރު 17ގެ ބަދަލުގައި ނޮވެމްބަރު 11 އަށް ބަދަލު ކުރުމަށާއި ރިޔާސީ އަދި ރައްޔިތުންގެ މަޖިލިސް އިންތިހާބު އެއްކޮށްލުމަށް ރައްޔިތުންގެ ފެންނަ ނުފެންނަ ވޯޓެއް ނަގާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.

ޖުމްހޫރީ ދުވަހާއި ގުޅިގެން މިރޭ ދަރުބާރުގޭގައި ބޭއްވި ރަސްމީ ޖަލްސާގައި ވާހަކަދައްކަވަމުން ރައީސް މުއިއްޒު ވިދާޅުވީ ރައީސުލްޖުމްހޫރިއްޔާ ކަމަށް އިންތިހާބުވާ ބޭފުޅާ ހުވާ ކުރައްވާ ތާރީހު މީގެކުރިން އޮންނަނީ ނޮވެމްބަރު މަހުގެ 11ވަނަ ދުވަހު ކަމަށެވެ. އެހެންނަމަވެސް ސިޔާސީ އޮއިވަރުގައި ޖެހި، ހަފްތާއެއްހާ ދުވަސް ފަހަތަށް ރައީސް ކަމުގެ ހުވާ ކުރުމުގެ ކައްސާލާފައިވާ ކަމަށެވެ.

"އަޅުގަނޑު އަމިއްލަ އަށް ނިންމާލެވޭ ވަރުގެ ކަމެއް ނޫނޭ އެއީ އެކަމަކު ގާނޫނު އޮތް ގޮތުން. އަދި މި ތިބަ މަޖިލިސް އިއްޒަތްތެރި މެމްބަރުންނަށް ވެސް ނުނިންމެނެއޭ. ރައްޔިތުންގެ ގާތަށް ދާން މި ޖެހެނީ. ރައްޔިތުން ގާތު އަހާލަން އެބަޖެހޭ ފެންނަ ނުފެންނަ ވޯޓަކަށް ޖުމްހޫރީ ދުވަސް، މާނައަކީ މި ދައުރު ނިމޭ ދުވަސް 2028 ގެ ނޮވެމްބަރު 11 އަށް ބަދަލުކުރަން. ހަފުތާއެއް ކުރުވުން. ރައްޔިތުން އެގޮތަށް ރުހެންތޯ އަޅުގަނޑު އަހާލާނަން ރައްޔިތުންގެ ގާތު،" ރައީސް ވިދާޅުވިއެވެ.

މީގެއިތުރުން ރިޔާސީ އިންތިހާބާއި މަޖިލިސް އިންތިހާބު އެއްކޮށްލުމަށް ރައްޔިތުންގެ ފެންނަ ނުފެންނަ ވޯޓެއް ނަންގަވާނެ ކަމަށާއި މިހާ އާބާދީ މަދު ގައުމަކަށް އެންމެ އެދެވޭނެ ގޮތަކީ އެއީ ކަމަށް ރައީސް މުއިއްޒު ފާހަގަކުރެއްވިއެވެ. ރައީސް ވިދާޅުވީ ރިޔާސީ އިންތިހާބު ނިމި، މަޖިލިސް އިންތިހާބާއި ދެމެދު އޮންނަނީ ދެތިން މަސް ކަމަށާއި އެކަމަށް އެތައް ހަރަދެއް ހިނގާ ކަމަށެވެ.

ޖުމްހޫރީ ދުވަހާއި ގުޅިގެން ބޭއްވި ރަސްމީ ޖަލްސާގެ ތެރެއިން: ފޮޓޯ | ރައީސް އޮފީސް

ރައީސްގެ ވާހަކަފުޅުގައި މިހާރު ރިޔާސީ އިންތިހާބުގެ ފުރަތަމަ ބުރުން އެއްވެސް ކެންޑިޑޭޓަކަށް 50 ޕަސެންޓަށްވުރެ މަތީން ނުލިބިއްޖެ ނަމަ ރިޔާސީ އިންތިހާބުގެ ދެވަނަ ބުރެއް އޮންނަ އޮތުން ބަދަލު ކުރުމަށް އެޓާނީ ޖެނެރަލް އޮފީހުން ޕްރިފަރެންޝަލް ނިޒާމެއްގެ ދިރާސާ ކުރަމުން އަންނަ ކަމަށް ވިދާޅުވިއެވެ.

"އެއްބުރުން އެއްވަނަ، ދެވަނަ ސާފުވާ ގޮތަށް، އަޅުގަނޑު ހިތުން ބައެއް ގައުމުތަކުގައި، އަވައްޓެރި ބައެއް ގައުމުތަކުގައި ވެސް އޮވޭ އެހެން. އެކަމަކު، ދިރާސާ ކޮށްފައި އަޅުގަނޑު ގަސްދުކުރަން އެއީ އަޅުގަނޑުމެންގެ ގައުމަށް އެންމެ ރަނގަޅު ގޮތް ކަމަށް ވަންޏާ ރައްޔިތުންގެ މަޖިލިސް މެދުވެރިކޮށް، އެކަން އެދޭ ކަމަށް ވަންޏާ ދެން އަންނަ ރިޔާސީ އިންތިހާބުން ފެށިގެން ދެ ބުރު ނޯންނަ ގޮތަށް، އެއްބުރުން މީހަކު ހޮވައި ނިންމޭ ގޮތަށް ކަންކަން ބަދަލުކުރަން،" ރައީސް މުއިއްޒު ވިދާޅުވިއެވެ.

ރައީސް ވިދާޅުވީ މިފަދަ ކަންކަން ކުރުމުން މިހާރު ކުރާ އެތައް ހަރަދެއް ކުޑަވެގެން ދާނެ ކަމަށެވެ.

ޖުމްހޫރީ ދުވަހުގެ ރަސްމީ ޖަލްސާގައި ކުރީގެ ރައީސް ވަހީދުގެ ދެކަނބަލުން: ފޮޓޯ | ރައީސް އޮފީސް

ރާއްޖާގެ ތިން ރައީސަކު ހުވާ ކުރެއްވީ ނޮވެންބަރު 11ގައެވެ. އެއީ ރައީސް އިބްރާހިމް ނާސިރާއި ރައީސް މައުމޫން އަބްދުލްގައްޔޫމާއި ރައީސް މުހައްމަދު ނަޝީދެވެ.

ނަމަވެސް ރައީސް ވަހީދުގެ ވެރިކަމުގައި ބޭއްވި ރިޔާސީ އިންތިހާބު ސުޕްރީމް ކޯޓުން ބާތިލުކުރުމުން، އާ ރައީސަކު އިންތިހާބު ކުރަންޖެހޭ ތާރީހު ފަހަނަ އަޅައި ގޮސް، އިންތިހާބު ބޭއްވުނީ ނޮވެންބަރު 16، 2013ގައެވެ. ޖެހިގެން އައި ދުވަހު، ނޮވެންބަރު 17، 2013ގައި ވެރިކަމުގެ ހުވާ ކުރެއްވީ ރައީސް ޔާމީނެވެ. އެ ދުވަހުން ފެށިގެން ރިޔާސީ ދައުރު ފުރިހަމަވާ ތާރީހަކީ ކޮންމެ ފަސް އަހަރަކަށްފަހު އަންނަ ނޮވެންބަރު 17 ކަމަށް އޮތީވެފައެވެ. ރައީސް ޔާމީންގެ ވެރިކަމަށްފަހު، ރައީސް ސާލިހު ވެސް ވެރިކަމުގެ ހުވާ ކުރެއްވީ ނޮވެންބަރު 17، 2018ގައެވެ.