ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ދޮންމަންމާފުޅާ ދޭތެރޭގައި ގޯސްކޮށް އެއްވެސް ކަމެއް ކުރައްވާފައި ނޯންނާނެ ކަމަށް އެމަނިކުފާނު ވިދާޅުވެއްޖެއެވެ.

މިއީ ރައީސްގެ ދޮންމަންމާފުޅާ ގުޅޭ ގޮތުން އެމަނިކުފާނު ވާހަކަފުޅު ދެއްކެވި ފުރަތަމަ ފަހަރެވެ. މި ވާހަކަތައް އެންމެ ފުރަތަމަ ފެންމަތިވީ ރިޔާސީ އިންތިހާބުގެ ތެރޭގައެވެ.

ނަމަވެސް އެ ދުވަސްވަރު ވެސް ރައީސް އެއިން އެއްވެސް ވާހަކައަކަށް ރައްދު ދެއްވާފަައެއް ނުވެއެވެ. އަލުން މި ވާހަކަތައް ދެކެވެން ފެށީ މޯލްޑިވްސް މީޑިއާ ކައުންސިލް އިން ދޭ ނޫސްވެރިކަމުގެ އެވޯޑުގައި "އަދަދު" ނޫހުން ރިޔާސީ އިންތިހާބުގެ ތެރޭގައި ދެއްކި ޑޮކިއުމަންޓްރީ އަށް އޯޑިއޯ ވީޑިއޯ ކެޓަގަރީން އެވޯޑު ލިބުމާއި ގުޅިގެންނެވެ.

ރާއްޖޭގެ ތަރައްގީއާ ގުޅޭ މާސްޓަ ޕްލޭން އިފްތިތާހް ކުރެއްވުމަށް ފަހު، ސޯޝަލް ސެންޓަރުން ނުކުމެވަޑައިގެންނެވި ވަގުތު ނޫސްވެރިޔަކު ވަނީ ރައީސްގެ ދޮންމަންމާފުޅާ މެދު އެމަނިކުފާނު ކަންކަން ކުރެއްވީ ގޯސްކޮށް ކަމަށް ބުނެ ބައެއް ފަރާތްތަކުން ދައްކަމުން ގެންދާ ވާހަކަތަކާއި ގުޅޭ ގޮތުން ސުވާލު ކޮށްފައެވެ.

ދޮންމަންމާފުޅާ ގުޅޭ ގޮތުން ފުރަތަމަ ފަހަރަށް މީޑިއާގައި ވާހަކަދައްކަވަމުން ރައީސް ވަނީ "އަދަދު" ނޫހުން ގެނެސްދިން ޑޮކިއުމަންޓްރީގައި ހުރި ވާހަކަތަކަކީ އެއްވެސް އަސްލެއް ނެތް ވާހަކަތަކެއް ކަމަށް ވިދާޅުވެފައެވެ. މިހާތަނަށް އެކަމާއި ގުޅޭ ގޮތުން އެއްވެސް ވާހަކައެއް ނުދެއްކެވީ އެމަނިކުފާނަކީ އެއްވެސް އިރެއްގައި މީހުންގެ ވާހަކަތައް ދައްކަވާ ބޭފުޅަކަށް ނުވާތީ ކަމަށާއި ނަމަވެސް އެ ވާހަކަ މިއަދު ދައްކަވަން ބޭނުންފުޅު ވަނީ އެކަން ބޮޑުވެފައި އޮތުމުން ކަމަށް ރައީސް ވިދާޅުވިއެވެ.

ރައީސް މުއިއްޒު ނޫސްވެރިންނާއި ބައްދަލުކުރައްވާ މިއަދު ވާހަކަދައްކަވަނީ: ދޮންމަންމާފުޅުގެ ވާހަކަތައް ގެނެސްދިން ޑޮކިއުމަންޓްރީގައި ވަނީ ހަގީގަތެއް ނޫންކަން ރައީސް ވިދާޅުވި —— ފޮޓޯ | ރައީސް އޮފީސް

ބައްޕާފުޅު އަވަހާރަވުމުން ތަރިކައާ މުދާ ބެހިއިރު ވެސް ހުރިހާ މުދަލަކާއި ފައިސާއެއް ދެއްވީ ދޮންމަންމާފުޅަށް ކަމަށް ރައީސް ވިދާޅުވިއެވެ. އަދި ލަންކާގައި ހުރި ގެއަކާއި އެގައުމުގައި ހުރި ގެސްޓުހައުސް ވެސް ދެއްވީ ދޮންމަންމާފުޅަށް ކަމަށް ރައީސް ވިދާޅުވިއެވެ.

"ބައްޕަގެ ގޯތި، ބިންތައް އޮތް ލަންކާގައި. ކޮލަމްބޯގައި ދެ ބިން، ކޭންޑީގައި ބިމެއް. މި ތިން ތަނުގައި ގޯތި އިމާރާތް ހަދާފައި ހުރީ،" ރައީސް ވިދާޅުވިއެވެ.

ތަރިކަ ބެއްސެވި ގޮތުގެ ތަފްސީލް ދެއްވަމުން ރައީސް ވިދާޅުވީ އެތަންތަނާއި ލަންކާގެ ބޭންކް އެކައުންޓުގައި ހުރި ފައިސާ ދޮންމަންމާފުޅަށް ދެއްވާފައިވާ ކަމަށެވެ. އެކަންކަން ކުރެއްވީ ބަދަލުގައި އެއްވެސް އެއްޗެއް ހޯއްދަވަން ނޫން ކަމަށް ވެސް ރައީސް ވިދާޅުވިއެވެ.

މާލޭގައި ހުރި ބައްޕާފުޅުގެ ހުރިހާ މުދަލެއް ދެއްވުމަށް ނިންމެވީ ދޮންމަންމާފުޅު ކަމަށް ވެސް ރައީސް ވިދާޅުވިއެވެ.

"އަޅުގަނޑު ގަބޫލުކުރަނީ ސިޔާސީ ވިސްނުމެއްގައޭ މިކަން ކުރަނީ. އޭގައި ނޯންނާނެ އަޅުގަނޑު އިތުރަށް ކުރި ކަމެއް،" ރައީސް ފާހަގަކުރެއްވިއެވެ.