އަންނަ އަހަރަށް ލަފާކޮށް ސަރުކާރުން ހުށަހަޅާފައިވާ ބަޖެޓަކީ އުއްމީދެއް ނެތް އަދި ރައްޔިތުންގެ ޖީބަށް އަތް ބާނަން ހުށަހެޅި ބަޖެޓެއް ކަމަށް އެމްޑީޕީގެ ރައީސް ޝާހިދު ވިދާޅުވެއްޖެއެވެ.

ސަރުކާރުން ވަނީ އަންނަ އަހަރަށް 56 ބިލިއަން ރުފިޔާގެ ބަޖެޓެއް ފާސްކުރަން ރައްޔިތުންގެ މަޖިލީހަށް ހުށަހަޅައިފައެވެ.

އެކަމާ ގުޅިގެން ޝާހިދު "އެކްސް"ގައި ކުރެއްވި ޕޯސްޓެއްގައި ވަނީ މި ސަރުކާރަށް އަހަރެއް ވާން ގާތްވެފައި ވަނިކޮށް ހުށަހެޅި ބަޖެޓްގައި އެއްވެސް ޕްލޭނެއް ނެތް ކަމަށާއި އަދި ވެފައިވާ ވައުދުތައް ފުއްދޭނެ ގޮތެއް ބަޖެޓުން ފެންނަން ނެތް ކަމަށެވެ. އަދި ބަޖެޓްގައި ހަރަދު ކުޑަކުރަން ހުށަހަޅާފައިވަނީ ރައްޔިތުންނާ ގުޅުންހުރި ދާއިރާތަކުން އެކަނި ކަމަށާއި ނަމަވެސް ސިޔާސީ މަގާމުތަކަށް ކުރާ ހޭދަ ކުޑަކުރަން ކުރާ މަސައްކަތެއް ނެތް ކަމަށް ވިދާޅުވިއެވެ.

އެހެންވެ, އެ ބަޖެޓްގެ ސަބަބުން ރައްޔިތުންގެ ދިރިއުޅުމުގެ ފެންވަރު ދަށްވެ, އިގްތިސާދީ ދުވެލި ދަށްވާނެ ކަމަށް ޝާހިދު ވިދާޅުވިއެވެ. އަދި އެ ބަޖެޓަކީ ރައްޔިތުންގެ އުއްމީދުތަކުގައި ކޮޅުފައިން ޖެހުމަށްފަހު ރައްޔިތުންގެ ޖީބަށް އަތް ބާނާނެ ބަޖެޓެއް ކަމަށް ޝާހިދުގެ ވިދާޅުވިއެވެ.

އެ ޕޯސްޓުގައި ޝާހިދު ވިދާޅުވި ގޮތުގައި ބަޖެޓްގައި ހުންނަންޖެހޭ މުހިންމު ތަފްސީލުތައް ވެސް ސަރުކާރުން ވަނީ ފޮރުވައިފައެވެ. އެގޮތުން މުވައްޒަފުންގެ މުސާރަ އާއި ތަރައްގީގެ މަޝްރޫއުތަކަށް ފައިސާ ބެހިގެންދާނެ ގޮތުގެ ތަފްސީލެއް ނެތްއިރު, ބަޖެޓުގެ 12 ބިލިއަން ރުފިޔާ ހަރަދު ކުރަން ނިންމާފައި އޮތީ ކޮން މަޝްރޫއުތަކަކަށް ކަން އެނގެން ނެތް ކަމަށް ވެސް އެ "ޕޯސްޓު"ގައި ޝާހިދު ވިދާޅުވިއެވެ.

އެހެންވެ, އެއީ ވައްކަމާއި ފަސާދައަށް ހުޅުވޭ ދޮރެއް ކަމަށް އޭނާގެ ޓްވީޓްގައިވެއެވެ.

ޝާހިދު ވިދާޅުވި ގޮތުގައި ބަޖެޓްގެ ބޮޑު ބައެއް ބޭރުގެ ބޭންކްތަކުން ހޯދުމަށް ބަޖެޓްގައި ހިމަނާފައި އޮތް ނަމަވެސް, މި ސަރުކާރުގެ ހާރިޖީ ސިޔާސަތުގެ ސަބަބުން އެ ފައިސާތައް ހޯދުމަށް ވެސް ސަރުކާރު އޮތީ ނުކުޅެދިފައެވެ.