ރައްޔިތުންގެ މަޖިލީހުގެ ބަހުސް މަރުހަލާގައި ވާހަކަ ދައްކަވަމުން، ހޯރަފުށީ ދާއިރާގެ މެންބަރު އަލީ މޫސާ "ބަލާވެރިކަމަށް" މިއަދު ގޮވައިފިއެވެ.

މިއަހަރަށް ހަރަދު ކުރުމަށް ފާސްކުރި 49.8 ބިލިއަން ރުފިޔާގެ ބަޖެޓުން ދެކޮޅު ނުޖެހިގެން، ކުރިއަށް އޮތް ދެ މަހަށް ހަރަދު ކުރުމަށް މަޖިލީހަށް ސަރުކާރުން މިއަދު ހުށަހެޅި 5.1 ބިލިއަން ރުފިޔާގެ ސަޕްލިމެންޓްރީ ބަޖެޓުގެ ބަހުސްގައި ވާހަކަ ދައްކަވަމުން މެންބަރު އަލީ މޫސާ ވިދާޅުވީ އެ ބަޖެޓް ހުށަހަޅަން ޖެހުނީ ކުރީ ސަރުކާރުގެ ސަބަބުން ކަމަށެވެ.

"އަޅުގަނޑުމެން ބަޖެޓް ކުރެވިފައި މިވާ 1.5 ބިލިއަން ރުފިޔާ [ސަޕްލިމެންޓްރީ ބަޖެޓަކީ]އަކީ ހަމަ މުތުލަގަށް ކުރީ ސަރުކާރުގެ 'ބަލާވެރިކަމާހުރެ' އަޅުގަނޑުމެންނަށް ޖެހިފައިވާ އެއްޗެއް،" ޕީއެންސީ ތަމްސީލު ކުރައްވާ އަލީ މޫސާ ވިދާޅުވިއެވެ.

އަލީ މޫސާ ވިދާޅުވީ ސަޕްލިމެންޓްރީ ބަޖެޓް ހުށަހަޅަންޖެހުނީ ކުރީގެ ސަރުކާރުގެ ދަރަނީގެ ބިލުތައް ދައްކަން ޖެހިގެން ކަމަށެވެ.

ކުރީ ސަރުކާރު ނިމިގެންދިޔައިރު 10 ބިލިއަން ރުފިޔާގެ ބިލު ނުދައްކާ އޮތް ކަމަށާއި އޭނާ ތަމްސީލު ކުރައްވާ ހޯރަފުށީ ދާއިރާގައި 200 މިލިއަން ރުފިޔާގެ މަޝްރޫއު ހިންގިއިރު، އެ މަޝްރޫތަކަށް ދެއްކީ 10 ޕަސެންޓް ފައިސާ ކަމަށެވެ. އޭގެ އިތުރަށް އަރާ ފައިސާ ދައްކާ ހަލާސްކުރަނީ މި ސަރުކާރުން ކަމަށް އޭނާ ވިދާޅުވިއެވެ.

އަލީ މޫސާ މަޖިލީހަށް އިންތިހާބުވެވަޑައިގެންނެވީ އެ ގޮނޑީގައި ކުރިން އިންނެވި މަޖިލީހުގެ ނައިބު ރައީސް އަހުމަދު ސަލީމް (ސައްލެ)އާ ވާދަކުރައްވައި 137 ވޯޓު ހޯއްދަވައިގެންނެވެ. ސަލީމަށް ލިބިވަޑައިގެންނެވި 1469 ވޯޓެވެ. އަދި އަލީ މޫސާއަށް ލިބިވަޑައިގެންނެވީ 1606 ވޯޓެވެ.