ރައީސުލްޖުމްހޫރިއްޔާ ޑރ. މުހައްމަދު މުއިއްޒު ދިވެހި ގައުމާއި ރައްޔިތުންގެ ހައްގުގައި ނިންމަވަމުން ގެންދަވާ ނިންމެވުންތަކަކީ ފަސޭހަފުޅު ނިންމެވުންތަކެއް ނޫން ކަމަށް ވިދާޅުވެ، ފިޝަރީޒް މިނިސްޓަރު އަހްމަދު ޝިޔާމް ރައީސް މުއިއްޒަށް ތައުރީފު ކުރައްވައިފިއެވެ.

އެކްސްގައި ޝިޔާމް މިއަދު ކުރެއްވި ޕޯސްޓެއްގައި ވިދާޅުވީ ދިވެހިރާއްޖޭގެ ވީދެމުންދާ އިޖްތިމާއީ ފޭރާން ހެޔޮކޮށް ދިވެހިރާއްޖޭގެ މާލީ ހާލަތު ރަނގަޅުކޮށް ދިވެހީންނަށް ދިވެހީންގެ ރާއްޖެ އަނބުރާ ހޯއްދަވައިދެއްވުގެ ބުރަ އުނދަގޫ މަސައްކަތްޕުޅު ރައީސް މުއިއްޒު ވެރިކަމުގެ އެންމެ ފުރަތަމަ ދުވަހުވެސް ފައްޓަވާފައިވާ ކަމަށެވެ.

ދިވެހި މުޖުތަމައުގެ ތެރޭގައި މޫލާފައި ހުރި ޖީލުތަކަށް ދެމިގެންދާ ވަރަށް ނުބައި ގިނަ އާދަތަކެއް ހުރި ކަމަކީ އެންމެން ވެސް ދަންނަ އަދި ގަބޫލުކުރާ ހަގީގަތެއް ކަމަށާއި އެހެންނަމަވެސް ތެދުވެރި ނިޔަތަކާއެކު އެކަންކަމަށް ކުރިމަތިލައްވައިގެން ހައްލުކުރައްވާނެ ވެރިން ގައުމުގައި ނެތް ކަމަށެވެ.

"ރައީސް ޑރ. މުއިއްޒުގެ ފަރާތްޕުޅުން މިއަދު މިފެންނަނީ ސިޔާސީ ވެރިންގެ ފަރާތްޕުޅުން އެއްގޮތަކަށްވެސް ނުފެންނަ ކަންކަމޭ ދެންނެވިޔަސް ކުށަކަށް ނުވާނެއެވެ. ނިންމަވަނީ ފަސޭހަފުޅު ނިންމެވުންތަކެއްނޫނެވެ. ސިޔާސީ ގޮތުން އެނިންމެވުންތައް މަގުބޫލު ނިންމެވުންތަކެއް ކަމަށް ގަބޫލުކުރައްވާ އެއްވެސް ސިޔާސީ ބޭފުޅެއްވެސް ނެތެވެ. ބައެއް ނިންމެވުންތަކަކީ ނުފޫޒުގަދަ ބައެއް ވިޔަފާރިވެރިންގެވެސް ނުރުހުންތެރިކަން އަމާޒުވާ ނިންމެވުންތަކެކެވެ. އެހެން ނަމަވެސް ރައީސް މިއަދު އެ ސާބިތު ކޮށްދެއްވަނީ މީ އެކަކު ދެމީހެއްގެ ގައުމެއްނޫން ކަމެވެ،" ޝިޔާމް ވިދާޅުވިއެވެ.

ޝިޔާމްގެ ޕޯސްޓުގައި ވިދާޅުވީ ރައީސް މުއިއްޒު ސާބިތުކޮށްދެއް ވަނީ އެމަނިކުފާނަކީ ދިވެހީންގެ ވެރިއެއްކަން ކަމަށެވެ. އެމަނިކުފާނު އެކުރައްވާ މަސައްކަތްޕުޅަކީ އަންނަން އޮތް ޖީލުތަކަށް މިގައުމު ސަލާމަތްކޮށްދެއްވުމުގެ މުހިއްމު ބުރަ މަސައްކަތްޕުޅު ކަމަށްވެސް ޝިޔާމް ވިދާޅުވިއެވެ.

"އަޅުގަނޑުމެން ބަލަންވީ މިކަންކަމުގައި އަޅުގަނޑުމެން ދިރިތިބީންނަށް އެމަނިކުފާނަށް ކޮށްދެވޭނީ ކޮންކަމެއްތޯއެވެ. މާދަމާ މިފަސްގަނޑުގައި ދިރިއުޅެން ތިބޭނީ ހަމަ އަޅުގަނޑުމެންގެ ދަރިންނާ ދަރިންގެ ދަރިންނެވެ. އަޅުގަނޑުމެންގެ ދަރިފަސްކޮޅެވެ" ޝިޔާމް ވިދާޅުވިއެވެ.

ޝިޔާމް މިފަދައިން ވިދާޅުވެފައި މިވަނީ ޒުވާނުންގެ މެދުގައި މަގްބޫލުވަމުން އައިސްފައިވާ ވޭޕް، ރާއްޖޭގައި ބޭނުން ކުރުން މަނާ ކުރުމަށް ނިންމަވާ ދުންފަތުގެ ބާވަތްތަކުން ނަގާ ޑިއުޓީ ބޮޑު ކުރުމަށް ރައީސް ނިންމަވާފައި ވަނިކޮށެވެ. އަދި ދައުލަތުގެ ހަރަދުތައް ކުޑަ ކުރުމަށްޓަކައި ސިޔާސީ މަގާމުތަކުގެ ތެރެއިން 228 މީހަކު މަގާމުން ވަކިކުރަން ވެސް ވަނީ ނިންމަވައިފައެވެ.

ހަމައެއާއެކު އިއްޔެ ދައުލަތުގެ ހަރަދުތައް ކުޑަ ކުރުމަށް ރައީސުލްޖުމްހޫރިއްޔާއަށް ލިބިވަޑައިގަންނަވާ މުސާރަ 50 ޕަސެންޓަށް ކުޑަކޮށް، ސިޔާސީ މީހުންގެ މުސާރައިން 10 ޕަސެންޓް އުނިކުރުމަށް ރައީސް ވަނީ ނިންމަވައިފައެވެ.